Вікіпэдыя

Мікалай Карпянкоў

беларускі вайсковы і дзяржаўны дзяяч

Мікала́й Мікала́евіч Карпянко́ў (нар. 6 верасьня 1968, Менск) — дзяяч рэжыму Аляксандра Лукашэнкі ў Беларусі.

Мікалай Карпянкоў
Намесьнік міністра ўнутраных справаў Беларусі
19 лістапада 2020 — цяперашні час
Прэзыдэнт: Аляксандар Лукашэнка
Прэм’ер-міністар: Раман Галоўчанка
Папярэднік: Юры Назаранка
Асабістыя зьвесткі
Нарадзіўся: 6 верасьня 1968(1968-09-06) (56 гадоў)
Адукацыя: Менская сувораўская вайсковая вучэльня (1985), Ульянаўская танкавая вучэльня (1989), Акадэмія МУС Беларусі (2003)
Узнагароды:
юбілейны мэдаль «65 гадоў Перамогі ў Вялікай Айчыннай вайне 1941—1945 гг.» ордэн «За службу Радзіме» III ступені За асабістую мужнасьць мэдаль „За адзнаку ў вайсковай службе“ мэдаль «За бездакорную службу» I ступені мэдаль «За бездакорную службу» II ступені мэдаль «За бездакорную службу» III ступені юбілейны мэдаль «100 год міліцыі Беларусі» юбілейны медаль «90 год міліцыі Беларусі»

Намесьнік міністра ўнутраных справаў Рэспублікі Беларусь — камандуючы Ўнутранымі войскамі Беларусі (з 2020 г.). Генэрал-маёр (2021). З чэрвеня 2021 году ўнесены ў санкцыйныя сьпісы ЭЗ, ЗША, шэрагу іншых краінаў.

Біяграфія

рэдагаваць

Скончыў Менскую сувораўскую вучэльню (1985 г.), танкавую вучэльню ў расейскім Ульянаўску (1989 г.), пасьля чаго служыў у савецкім і беларускім войску. З 1993 г. працаваў у структурах МУС Беларусі. Быў камандзірам баявой групы спэцпадразьдзяленьня Міністэрства ўнутраных справаў Беларусі «Беркут» (1992—1994), на базе якога ў 1994 годзе было створана спэцпадразьдзяленьне «Алмаз»[1].

З 1995 па 2003 год служыў на розных пасадах у Службе бясьпекі А. Лукашэнкі. У 2003 г. скончыў Акадэмію МУС Беларусі. З 2003 па 2010 гг. зноў камандаваў аддзелам «Алмазам» МУС. На гэтай пасадзе ўдзельнічаў у палітычных рэпрэсіях і ціску на праціўнікаў прэзыдэнта А. Лукашэнкі, у прыватнасьці, падчас прэзыдэнцкай выбарчай кампаніі 2006 г.[2][3][4] Супрацоўнікі «Алмаза» ўдзельнічалі ў разгоне акцыі пратэсту 19—20 жніўня 2010 году. Кандыдата ў прэзыдэнты Ўладзімера Някляева асабіста зьбіваў камандзір «Алмазу» Мікалай Карпянкоў[5].

З 2011 па 2012 год займаў розныя кіраўнічыя пасады ў МУС Беларусі. З кастрычніка 2012 году па 2014 год быў начальнікам управы наркакантролю і супрацьдзеяньня гандлю людзьмі (УНСГЛ) МУС Беларусі[6]. 15 ліпеня 2013 году выступіў за ўхваленьне Дэкрэту прэзыдэнта Беларусі аб спагнаньні за распаўсюд опійнага маку ў памеры ад 1-й да 8 тысячаў эўра і канфіскацыі самахода, гаража і кватэры, якія выкарыстоўвалі пры яго распаўсюдзе[7]. Пад яго загадам за 2013 год улік спажыўцоў курыльных сумесяў вырас з 8% да 65%. Доля спайсу сярод канфіскаваных дурманаў павялічылася да 70%[8]. 6 траўня 2014 году прапанаваў унесьці ў Закон Беларусі «Аб наркатычных рэчывах, прэкурсорах і іх аналягах» панятак «базавай структуры», каб скараціць час залічэньня новых дурманаў у аналягі да некалькіх дзён. Дзеля гэтай самай задачы прапанаваў стварыць антынаркатычную камісію з удзелам 3-х ведамстваў — Дзяржаўнага камітэту судовых экспэртызаў Беларусі, Міністэрства аховы здароўя Беларусі і Міністэрства ўнутраных справаў Беларусі. Сярод іншага, прапанаваў зьмяніць Указ прэзыдэнта ад 1 лютага 2010 году № 60 «Аб захадах удасканаленьня выкарыстаньня нацыянальнага сэгмэнту сеткі Інтэрнэт» з тым, каб забараніць доступ да сеціўных крамаў, якія прадаюць дурманы. Таксама Карпянкоў прапанаваў увесьці адміністрацыйную адказнасьць за ўжываньне дурманаў. Урэшце Карпянкоў адзначыў: «На мой погляд, барацьба супраць наркотыкаў павінна весьціся ў 4-х кірунках:

З 2014 г. па 19 лістапада 2020 г. кіраваў Галоўнай управай па барацьбе з арганізаванай злачыннасьцю і карупцыяй (ГУБАЗіК) МУС Беларусі. 19 лістапада 2020 г. прызначаны намесьнікам міністра ўнутраных справаў Беларусі, які загадвае Ўнутранымі войскамі Беларусі[10]. 30 сьнежня 2020 году быў адным з амаль 50 вайскоўцаў 5 ведамстваў, якім А. Лукашэнка уручыў узнагароды на базе Атраду міліцыі асаблівага прызначэньня ГУУС Менскага гарвыканкаму за супрацьстаяньне «ў тыя жнівеньскія дні» пасьля прэзыдэнцкіх выбараў. Узнагароды разам з Карпянковым атрымалі прадстаўнікі Дзяржаўнага памежнага камітэту Беларусі, Міністэрства абароны Беларусі, МУС Беларусі, Камітэту дзяржаўнай бясьпекі Беларусі і Службы аховы прэзыдэнта Беларусі[11]. 4 сакавіка 2021 году ў Палацы незалежнасьці ў Менску атрымаў ад А. Лукашэнкі пагоны генэрал-маёра[12].

Падчас пратэстаў у Беларусі ў 2020—2021 гг.

рэдагаваць

Падчас масавых мірных пратэстаў у Менску грамадзянаў, ня згодных з вынікамі прэзыдэнцкіх выбараў, Мікалай Карпянкоў быў заўважаны сярод сілавікоў, якія займаліся непасрэдным разгонам пратэстаў і зьбіцьцём грамадзянаў.

6 верасьня 2020 г. Карпянкоў разьбіў дручком шкляныя дзьверы ў кавярню «O’Petit»[13]. Паводле афіцыйнае інфармацыі, міліцыянты перасьледвалі актыўных удзельнікаў пратэстаў, якія іх правакавалі, а потым паспрабавалі схавацца ў кавярні[14].

Паводле сьведчаньняў аднаго з пацярпелых, 29 верасьня 2020 году ў РУУС Першамайскага раёну Менску Карпянкоў камандаваў групаю сілавікоў, якая выбівала ілжывыя паказанні, пасьля паказаныя па канале «Беларусь 1», ад групы схопленых ГУБАЗіК людзей, якіх зьбіцьцём і пагрозамі прымушалі сказаць на камэру, што ім нібыта заплацілі каардынатары[15]. Відавочца запомніў, што Карпянкоў здымаў відэа асабіста, а яму пагражаў 16 гадамі турмы, калі той ня скажа, што атрымаў тысячу даляраў ад каардынатара[15].

Паводле сьведчаньняў, 13 кастрычніка 2020 г. Карпянкоў разам зь іншымі сілавікамі выкраў на вуліцы грамадзяніна М. Харошына, даставіў яго ў Першамайскі РАУС Менску, дзе прымяніў да Харошына катаваньні[16].

У лістападзе 2020 году Сьвятлана Ціханоўская абвясьціла пра запуск працэсу міжнароднага прызнаньня ГУБАЗіК, якім да таго часу кіраваў Карпянкоў, і АМАП тэрарыстычнымі арганізацыямі ў сувязі з учыненымі імі злачынствамі ў час падаўленьня пратэстаў супраць фальсыфікацыі выбараў і гвалту з боку рэжыму Лукашэнкі[17].

20 лістапада 2020 г. Карпянкоў быў унесены ў санкцыйныя сьпісы Латвіі і Эстоніі[18].

15 студзеня 2021 г. незалежныя СМІ апублікавалі аўдыёзапіс, на якім чалавек, апазнаны як Мікалай Карпянкоў, зрабіў некалькі скандальных выказваньняў наконт пратэстаў. Паводле аналізу зьместа запісу, ён мог быць зроблены ў кастрычніку 2020 г.

На запісе Карпянкоў абразьліва адгукаўся аб пратэстоўцу Аляксандры Тарайкоўскім, застрэленым сілавікамі:


  Тарайкоўскі, так, п’яніца і дэбіл. Ён памёр, канечне, ад гумовай кулі, якая прыляцела яму ў грудзі. Ён стаяў там у ціштоцы, і, я думаю, з зваротнага боку цішоткі яна не застране[19].  

Спасылаючыся на прыказы Лукашэнкі, Карпянкоў на запісе заахвочваў сілавікоў выкарыстоўваць зброю супраць пратэстоўцаў, у тым ліку забіваць іх:


  прэзыдэнт казаў, што калі прэ на цябе, выкарыстоўвай зброю, нелетальную. Ва ўпор: па нагах, у жывот, па яйках. Каб зразумеў, што ён нарабіў, калі ачуняе. Ну нанясіце яму нешта такога кшталту: ці пакалечыць, ці зьнявечыць, ці забіць. Прымяняць зброю яму наўпрост у лоб, у твар, туды, пасьля чаго ён ужо ніколі ня вернецца ў той стан, у якім ён быў.

Адкачаюць, дык адкачаюць. Ня будзе мець паловы галаўнога мозгу, ну, так яму і трэба. Бо ў асноўным усе тыя, хто выходзіць на вуліцы на дадзены момант паўдзельнічаць у рэйкавай вайне, хто блякуе дарогі, атакуе міліцыянтаў, кідае «кактэйлі Молатава», — тыя ж тэрарысты. Гэта лішнія людзі ў нашай краіне. І гэтаму было прысьвечана сёньня вельмі-вельмі шмат, на той невялікай нарадзе, якую праводзіў галава дзяржавы. ...

Мы з усіх бакоў прыкрытыя галавой дзяржавы ў пляне выкарыстаньня зброі[19].

 

Карпянкоў таксама паведаміў пра намер уладаў стварыць канцэнтрацыйны лягер для ўдзельнікаў пратэстаў:


  Ствараецца база зьвестак. У гэтай базе зьвестак, хто патрапіў другі раз, той павінен там і застацца. Сказана распрацаваць, зрабіць лягер, не для ваеннапалонных, не для інтэрнаваных нават, а лягер для асабліва востракапытных, такі для адсяленьня. І паставіць калючы дрот, атрымліваецца, па пэрымэтры. Два памяшканьні зрабіць, топка — паверх, карміць — паверх, каб працавалі. Але іх там трымаць, пакуль усё не супакоіцца[19].  

2 лютага 2021 году TUT.BY атрымаў вынікі фанаскапічнае экспэртызы запісу, апублікаванага BYPOL, які мае «велізарнае грамадзскае значэньне» й які выклікаў рэзананс ня толькі ў Беларусі, але й за яе межамі. У аўдыёзапісе гаворка ідзе пра забойства Аляксандара Тарайкоўскага, ужываньне смяротнае зброі й «лагеры для востракапытных». Экспэртыза пацьвердзіла, што голас на запісе належыць Мікалаю Карпянкову, і ня выявіла прыкметаў мантажу[20].

Санкцыі ЭЗ, ЗША, іншых краінаў

рэдагаваць

Карпянкоў станавіўся суб’ектам забароны на паездкі й замарожваньня актываў Эўрапейскім Зьвязам як частка сьпісу беларускіх чыноўнікаў, адказных за палітычныя рэпрэсіі, падтасоўку вынікаў галасаваньня й прапаганду[21]. Згодна з рашэньнем Эўрапейскай рады(be) ад 21 чэрвеня 2021 году як кіраўнік ГУБАЗіК Карпянкоў «нясе адказнасьць за бесчалавечнае й прыніжаючае годнасьць абыходжаньне з грамадзянамі, якія ўдзельнічалі ў мірных пратэстах»: іх адвольныя затрыманьні, зьбіцьцё групаю пад яго камандаваньнем, пагрозы прымяненьня агнястрэльнае зброі, у тым ліку на прыкладзе інцыдэнту ў кавярні «O’Petit» і апублікаванага аўдыёзапісу, — сур’ёзныя парушэньні правоў чалавека, зьвязаныя з прыгнётам грамадзянскае супольнасьці й дэмакратычнай апазыцыі[22]. 6 ліпеня да чэрвеньскага пакету санкцый ЭЗ далучыліся Альбанія, Ісьляндыя, Ліхтэнштайн, Нарвэгія, Паўночная Македонія, Чарнагорыя[23].

21 чэрвеня 2021 году Карпянкоў быў уключаны і ў Сьпіс спэцыяльна вызначаных грамадзянаў і заблякаваных асобаў ЗША, за асабістае кіраўніцтва супрацоўнікамі ГУБАЗіК па перасьледу й зьбіцьцю мірных дэманстрантаў і аўдыёзапіс з абмеркаваньнем будаўніцтва лягеру для затрыманых і рэкамэндацыям сілавікам страляць пратэстоўцам у твар і геніталіі, які прасачыўся[24][25]. Акрамя таго, Карпянкова ў свае санкцыйныя сьпісы ўключылі Вялікабрытанія[26], Канада[27], Швайцарыя[28].

Погляды

рэдагаваць

Лічыцца, што спавядае расейскі фашызм[Крыніца?]. Сярод іншага, у час сьвяткаваньня 100-годзьдзя беларускай міліцыі зачытваў даклад, дзе пра беларускую старонку ў гісторыі міліцыі не было ані слова. Паводле сьведчаньня былога начальніка другога аддзелу трэцяй управы ГУБАЗіКу Аляксандра Азарава, «Для яго Беларусь і Расея — гэта адзінае цэлае. Украінцаў ён лічыць фашыстамі, а супраціўнікаў рэжыму — маргіналамі, праплачанымі Захадам»[29].

Крыніцы

рэдагаваць
  1. ^ Полковник милиции Карпенков Николай Николаевич (рас.). mnsvu.org (3-1-2019). Праверана 24-1-2021 г.
  2. ^ Казулін патрабуе вызваліць Радзівіла — Радыё Свабода, 10.03.2006
  3. ^ «Спачатку ім плацілі штодня, але ўжо няма грошай». Былы намесьнік камандзіра баявой групы «Алмаза» аб працы сілавікоў — Радыё Свабода, 11.11.2020
  4. ^ Козулина избивали бойцы спецподразделения по борьбе с терроризмом [[[Аляксандар Казулін|Казуліна]] зьбівалі байцы спэцадзелу па барацьбе з тэрарызмам] — Белорусский партизан, 29.05.2006
  5. ^ Борис Пастернак. (21-12-2020) Площадь-2010 (рас.). Беларускі партызан. Праверана 24-1-2021 г. Архіўная копія ад 24-1-2021 г.
  6. ^ Сьвятлана Барысенка. «Выпадкі сьмерці ад наркотыкаў мы расцэньваем як тэракт супраць моладзі» // Зьвязда : газэта. — 12 сакавіка 2014. — № 45 (27655). — С. 8. — ISSN 1990-763x.
  7. ^ Сьвятлана Барысенка. За ўжываньне наркарэчываў давядзецца адказаць // Зьвязда. — 16 ліпеня 2013.
  8. ^ Уладзіслаў Кулецкі. Рэальная пагроза // Зьвязда. — 22 сакавіка 2014. — № 53 (27663). — С. 2.
  9. ^ Юры Царык. Супраць наркотыкаў — адзіным фронтам // Зьвязда. — 7 траўня 2014. — № 83 (27693). — С. 4.
  10. ^ Вольга Мядзьведзева, Марыя Дадалка. Прэзыдэнт зрабіў шэраг кадравых прызначэньняў // Газэта «Зьвязда», 19 лістапада 2020 г. Праверана 30 чэрвеня 2021 г.
  11. ^ Вольга Мядзьведзева. «Наш абавязак перад цяперашнім і будучымі пакаленьнямі — захаваць краіну» // Зьвязда. — 31 сьнежня 2020. — № 255 (29369). — С. 2.
  12. ^ Марыя Дадалка. «Нацыя можа разьвівацца толькі на пазытыўных ідэях і справах» // Зьвязда. — 5 сакавіка 2021. — № 42 (29411). — С. 2.
  13. ^ Надзея Бужан. Кіраўнік ГУБАЗіКа Карпянкоў дубінкай разносіць вітрыну кафэ // Партал «Наша ніва», 6 верасьня 2020 г. Праверана 30 чэрвеня 2021 г.
  14. ^ Видео жесткого задержания в кофейне O’Petit: силовики в гражданском разбили дверь и достали людей [Відэа жорсткага затрыманьня ў кавярні O’Petit: сілавікі ў цывільным разьбілі дзьверы і дасталі людзей]
  15. ^ а б Фігурант «справы 11-ці ўдзельнікаў чата»: Карпянкоў асабіста здымаў «пакаяльнае відэа» на камэру // Праваабарончы цэнтар «Вясна», 29 чэрвеня 2021 г. Праверана 30 чэрвеня 2021 г.
  16. ^ МАТЕРИАЛЫ ПО ЗАЯВЛЕНИЮ О ПРЕСТУПЛЕНИИ № 7352-6073-4883-8822 — Похищение и применение пыток к Хорошину М. Л. [Матэрыялы па заяве аб злачынстве № 7352-6073-4883-8822 — выкраданьне і катаваньне Харошына М. Л.] — Адзіная кніга рэгістрацыі злачынстваў(ru)
  17. ^ Сьвятлана Ціханоўская запускае працэс прызнаньня ГУБАЗіК і АМАП тэрарыстычнымі арганізацыямі, Радыё Свабода, 20 лістапада 2020 р.
  18. ^ Латвия, Литва и Эстония добавили более 20 беларусов в санкционный список [Латвія, Летува і Эстонія дадалі больш за 20 беларусаў у санкцыйны сьпіс] — Мэдыязона, 20.11.2020
  19. ^ а б в Карпянкоў: «Мы створым лягеры для пратэстоўцаў» (рас.) // «Аб’яднаньне сілавікоў Беларусі» (Польшча), 15 студзеня 2021 г. Праверана 30 чэрвеня 2021 г.
  20. ^ Кто говорил про «лагерь для острокопытных» на слитой аудиозаписи? Мы получили результаты экспертизы (рас.). TUT.BY (2021-02-02). Праверана 2021-02-02 г. Архіўная копія ад 2021-02-02 г.
  21. ^ МГ. Эўразьвяз зацьвердзіў новы пакет санкцыяў супраць прадстаўнікоў Беларусі // Тэлеканал «Белсат», 21 чэрвеня 2021 г. Праверана 30 чэрвеня 2021 г.
  22. ^ COUNCIL IMPLEMENTING REGULATION (EU) 2021/997 — EUR-Lex(en), 21.06.2021
  23. ^ Declaration by the High Representative on behalf of the European Union on the alignment of certain third countries with the Council Decision (CFSP) 2021/1002 concerning restrictive measures in view of the situation in Belarus (анг.). Рада Эўрапейскага зьвязу (2021-07-06). Праверана 2021-09-10 г.
  24. ^ Treasury and International Partners Condemn Ongoing Human Rights Abuses and Erosion of Democracy in Belarus — Міністэрства фінансаў ЗША, 21.06.2021
  25. ^ OFAC Sanctions List Search, Міністэрства фінансаў ЗША
  26. ^ CONSOLIDATED LIST OF FINANCIAL SANCTIONS TARGETS IN THE UK (анг.). Office of Financial Sanctions Implementation HM Treasury (2021-06-25).
  27. ^ Consolidated Canadian Autonomous Sanctions List. Міністэрства міжнародных справаў Канады(en) (2015-10-19). Праверана 2021-06-29 г.
  28. ^ Searching for subjects of sanctions
  29. ^ «Запоем чытаў навіны „русского мира“ і крычаў, што на Кіеў трэба скінуць ядзерную бомбу». Што за людзі кіруюць ГУБАЗіКам, Радыё Свабода, 25 траўня 2022 г.

Вонкавыя спасылкі

рэдагаваць
Атрымана з «https://be-tarask.wikipedia.org/w/index.php?title=Мікалай_Карпянкоў&oldid=2509163»