Вікіпэдыя

Сэрвалюкс

земляробчае прадпрыемства Беларусі

Каардынаты: 53°54′19″ пн. ш. 30°20′31″ у. д. / 53.90528° пн. ш. 30.34194° у. д. / 53.90528; 30.34194

«Сэрвалюкс» — земляробчае прадпрыемства Беларусі, заснаванае ў кастрычніку 1999 году ў Магілёве.

«Сэрвалюкс»
Тып закрытае акцыйнае таварыства
Заснаваная 21 кастрычніка 1999 (24 гады таму)
Заснавальнікі ТАА «Сэрвалюкс» (ЗША)
Уласьнікі Яўген Баскін
Краіна Беларусь
Разьмяшчэньне Магілёў
Адрас Ленінскі раён, вул. Міронава, д. 4[1]
Ключавыя фігуры Яўген Баскін (генэральны дырэктар)
Галіна сельская гаспадарка
Прадукцыя каўбаса, корм, мяса птушкі, тварог, сыр, яйкі
Лік супрацоўнікаў 10 800 (2023 год)
Даччыныя кампаніі «Агралінк», «Смалявічы Бройлер»

На 2023 год налічваў 25 вытворчых пляцовак і 10 800 супрацоўнікаў. За 2022 год вырабілі 600 000 тонаў камбікармоў, 213 900 тонаў мяса птушкі, 67 000 тонаў перапрацаванага мяса і 25 900 малочных вырабаў. За мяжу паставілі 70 % мяса птушкі, 60 % малочных вырабаў і 12 % мясных вырабаў. У асноўным экспартавалі ў Расею і 8 краінаў Азіі — Азэрбайджан, Армэнію, Грузію, Казахстан, Кітай, Кыргыстан, Манголію і Ўзбэкістан[2]. Продажы ладзілі пад 9 уласнымі таварнымі знакамі «Альфур» (халяльная ежа), «Кабандас» (закускі), «Карапузікі» (каўбаса для дзяцей), «Крэм Нуво» (мяккі тварог і тварожны сыр), «Ландэрс» (паўцьвёрды і сычужны сыр), «Ласункавы край» (каўбаса), «Мішутка» (дзіцячае харчаваньне), «Пятруха» (кураціна) і «Сэрвалюкс» (вырабы для страўняў)[3]. Прадстаўніцтвы працавалі ў Менску (прасп. Незалежнасьці, д. 177) і Маскве (Паўночна-Заходняя адміністрацыйная акруга, раён Харашова-Мнёўнікі, вул. Адзіля, д. 2)[1]. Быў найбольшым вытворцам мяса птушкі ў Беларусі.

Будова рэдагаваць

На 2023 год «Сэрвалюкс» ажыцьцяўляў:

  • расьлінаводзтва на 17 000 га, 13 500 гектарах ворыва і 8500 га для таварных вырабаў і 5000 га для кармоў праз падразьдзяленьне «Смалявічы Дэйрыз» у Кастрычніцкім пасёлку і «Сэрвалюкс Агра» ў Магілёўскім раёне (Мяжысеткі)[4];
  • камбікормавую вытворчасьць паводле 240 рэцэптураў на 2000 тонаў за содні пры ёмістасьці элеватара 144 000 тонаў і гадавой магутнасьці 600 000 тонаў праз «Чырванасьцяжны камбікормавы завод» у Смалявіцкім раёне (Кастрычніцкі) і «Экамол Агра» ў Аршанскім раёне (Крашына)[5];
  • племянную птушкагадоўлю ў 202 птушніках на 100 млн інкубацыйных яек за год 2-х пародаў з вывадам 85 % куранятаў праз «Агралінк» у Быхаве (Магілёўская вобласьць) і падразьдзяленьне «Генэтык» у Слуцкім раёне (Селішча)[6];
  • найбольшую ў Беларусі вытворчасьць мяса птушкі пры забоі за гадзіну 26 800 галоваў з гадавым абсягам 213 900 тонаў у жывой вазе і пастаўкай у 10 краінаў праз «Смалявічы Бройлер» у Кастрычніцкім пасёлку, «Сэрвалюкс Агра» і прадстаўніцтва «Сергіеў Пасад» у Расеі[7];
  • распрацоўку і дасьледаваньне ў рамках 7 міжнародных праектаў са страўнямі, 20 праграмаў з пастаўнікамі вузлоў і сыравіны, што дазволіла стварыць 67 вырабаў на аснове 300 дэгустацыяў праз Навукова-інавацыйны інжынірынгавы асяродак у Кастрычніцкім пасёлку[8];
  • вытворчасьць кулінарных вырабаў і мясных паўфабрыкатаў на плошчы 1 га сіламі 200 супрацоўнікаў пры магутнасьці 1300 тонаў за месяц і 11 200 тонаў за год праз падразьдзяленьне «Юніміт» у Кастрычніцкім пасёлку[9];
  • вытворчасьць мясных каўбасаў паводле 170 рэцэптураў магутнасьцю 2500 тонаў за месяц і 17 900 тонаў за год праз падразьдзяленьне «Белміт» у Быхаве і «Юніміт» у Смалявіцкім раёне[10];
  • вытворчасьць малочных вырабаў на 60 % з уласнай сыравіны пры штодзённай перапрацоўцы 160 тонаў малака і гадавой магутнасьці 25 900 тонаў з экспартам на 13,7 млн даляраў праз «Смалявічы Малако»[11];
  • малочна-таварнае фэрмэрства на 4200 галоваў пры содневай вытворчасьці 80 тонаў малака на «Смалявічы Дэйрыз» у Кастрычніцкім пасёлку[12];
  • раздробны гандаль са збытам 22 000 тонаў малочных вырабаў і 12 000 тонаў мяса птушкі праз 284 крамы «Задняпроўе» пад таварным знакам «Пятруха»[13];
  • прамысловую ачыстку на 70 000 кв.м у 300 заказчыкаў са збытам 700 тонаў 50 сродкаў абеззаражваньня і мыцьця праз «Сэрвіс Салюшнс»[14];
  • праектаваньне і забудову, якімі ахапілі за 10 гадоў 150 спраектаваных будынкаў і 78 узьведзеных пабудоваў праз уласную праектна-канструктарскую службу[15];
  • інфармацыйна-тэхналягічныя паслугі з апрацоўкай 45 000 заявак за год сіламі 80 супрацоўнікаў «Сэрвалюкс Тэхноладжыс»[16].

Мінуўшчына рэдагаваць

21 кастрычніка 1999 году Яўген Баскін заснаваў у Магілёве замежнае прадпрыемства «Сэрвалюкс», што належала аднайменнаму ТАА ў ЗША (Сан-Францыска), утворанаму 17 чэрвеня[17]. Яно месьцілася па Першамайскай вуліцы, д. 77[18].

У 2002 годзе «Сэрвалюкс» пачаў збыт для «Магілёўскай бройлернай птушкафабрыкі» ў Мяжысетках (Дашкаўскі сельсавет), дзе за год вырабілі 5500 тонаў мяса птушкі. 23 сьнежня 2004 году ў Быхаве заснавалі птушкафабрыку бацькоўскага статку «Агралінк», дзе пачалі ўзводзіць інкубатары. 12 кастрычніка 2006 году «Сэрвалюкс» набыў «Магілёўскую бройлерную птушкафабрыку», якую пераўтварылі ў падразьдзяленьне «Сэрвалюкс Агра». У 2006 годзе стварылі раздробную гандлёвую сетку «Квартал смаку», а ў 2007-м — сетку фірмовага гандлю «Пятруха». 23 ліпеня 2007 году «Сэрвалюкс» стаў уласьнікам кантрольнага пакету паёў камбікормавага заводу «Экамол» у Аршанскім раёне (Крашына), чыю магутнасьць да 2014 году павялічылі да 350 000 тонаў. Пры гэтым кармы сталі выпускаць як для птушкі, гэтак і для жывёлы. 17 сакавіка 2008 году «Сэрвалюкс» стаў сумесным ЗАТ. 9 сьнежня 2008 году набылі магілёўскую сетку харчовых крамаў «Задняпроўе». У 2009 годзе пабудавалі сьвінакомплекс «Сэрвалюкс Генэтык» у Віньніцкай вобласьці Ўкраіны (Ражычнае сяло) пры падтрымцы ўраду Нідэрляндаў.

У 2011 годзе ўзьвялі новую вытворчасьць куранятаў «Сэрвалюкс Агра», дзе ў 2012 годзе запусьцілі ачыстныя збудаваньні. У 2013 годзе «Агралінк» павялічыў вытворчую магутнасьць да 40 млн содневых куранятаў за год, што зрабіла яго найбольшым племянным прадпрыемствам Беларусі ў галіне птушкагадоўлі. Яшчэ ў 2013 годзе пабудавалі забойны цэх. 24 ліпеня 2013 году набылі «Смалявіцкую бройлерную птушкафабрыку» ў Кастрычніцкім пасёлку. Ёй таксама належалі 7 фэрмаў на 8000 тыс. галоваў буйной рагатай жывёлы. Сярод іншага, стварылі ўласную праектную службу і будаўнічую арганізацыю, дзе за 2013 год выканалі 85 % патрэбных праектавальных і 65 % будаўнічых працаў. Пры гэтым давялося ўзводзіць вонкавыя пабудовы энэргазабесьпячэньня для падлучэньня да элекрасетак «Белэнэрга». У 2013 годзе да 40 % вырабаў паставілі ў Расею, дзе працавалі гандлёвыя дамы ў Смаленску і Маскве. За 2013 год «Сэрвалюкс» вырабіў 413 000 тонаў кармоў, 113 000 тонаў мяса птушкі, 24 500 тонаў збожжа і 18 600 тонаў малака. На 2014 год «Сэрвалюкс» наймаў сярод замежнікаў некаторых адмыслоўцаў зь Нідэрляндаў і Польшчы ў галіне перавозак, складзкой справы, продажаў і інфармацыйных тэхналёгіяў празь нястачу адпаведных мясцовых кадраў. У 2014 годзе старшыня ўраду Беларусі Міхаіл Мясьніковіч улучыў кіраўніка «Сэрвалюкса» Яўгена Баскіна ў склад міжведамаснай працоўнай групы рэфармаваньня аграпрамысловага комплексу[19].

У 2014 годзе перабудавалі камбікормавы завод і запусьцілі ачыстныя збудаваньні на вытворчасьцях. У 2016 годзе запусьцілі малочна-таварную фэрму на 4200 галоваў і абнавілі перапрацоку малака. Таксама ўкаранілі вузавае ўтрыманьне бацькоўскага статку. 28 лістапада 2017 году набылі «Слуцкі племптушказавод» у Селішчы, дзе ў 2018 годзе стварылі падразьдзяленьне «Генэтык». У 2017 годзе ў Кастрычніцкім пасёлку (Смалявіцкі раён) пачалі будоўлю мясаперапрацоўчага заводу «Юніміт», які запусьцілі ў 2019 годзе. Таксама ў 2017 годзе перайшлі на робатызаванае пакаваньне вырабаў. 11 траўня 2017 году галаўную сядзібу «Сэрвалюкса» перанесьлі ў новы будынак па вуліцы Міронава, д. 4. У 2018 годзе пачалі пастаўкі ў Кітай, а доля «Сэрвалюкса» на беларускім рынку птушкагадоўлі перавысіла 50 %[20]. У 2019 годзе набылі пляцоўку ў Маскоўскай вобласьці, дзе ў 2021 годзе запусьцілі вытворчасьць «Сэрвалюкс Пасад» (Туракова). У 2020 годзе стварылі асяродак дасьледаваньня і распрацоўкі харчаваньня, а таксама запусьцілі пляцоўку электроннага гандлю[2].

Крыніцы рэдагаваць

  1. ^ а б Зьвесткі для сувязі (рас.) // ЗАТ «Сэрвалюкс», 2023 г. Праверана 21 лютага 2023 г.
  2. ^ а б Прадпрыемства (рас.) // ЗАТ «Сэрвалюкс», 2023 г. Праверана 21 лютага 2023 г.
  3. ^ Брэнды (рас.) // ЗАТ «Сэрвалюкс», 2023 г. Праверана 21 лютага 2023 г.
  4. ^ Расьлінаводзтва (рас.) // ЗАТ «Сэрвалюкс», 2023 г. Праверана 21 лютага 2023 г.
  5. ^ Камбікормавая вытворчасьць (рас.) // ЗАТ «Сэрвалюкс», 2023 г. Праверана 21 лютага 2023 г.
  6. ^ Племянная птушкагадоўля (рас.) // ЗАТ «Сэрвалюкс», 2023 г. Праверана 21 лютага 2023 г.
  7. ^ Вытворчасьць мяса птушкі (рас.) // ЗАТ «Сэрвалюкс», 2023 г. Праверана 21 лютага 2023 г.
  8. ^ Навукова-інавацыйны інжынірынгавы асяродак (рас.) // ЗАТ «Сэрвалюкс», 2023 г. Праверана 21 лютага 2023 г.
  9. ^ Кулінарныя вырабы і паўфабрыкаты (рас.) // ЗАТ «Сэрвалюкс», 2023 г. Праверана 21 лютага 2023 г.
  10. ^ Вытворчасьць мясакаўбасных вырабаў (рас.) // ЗАТ «Сэрвалюкс», 2023 г. Праверана 21 лютага 2023 г.
  11. ^ Вытворчасьць малочных вырабаў (рас.) // ЗАТ «Сэрвалюкс», 2023 г. Праверана 21 лютага 2023 г.
  12. ^ Малочна-таварнае фэрма (рас.) // ЗАТ «Сэрвалюкс», 2023 г. Праверана 21 лютага 2023 г.
  13. ^ Раздроб (рас.) // ЗАТ «Сэрвалюкс», 2023 г. Праверана 21 лютага 2023 г.
  14. ^ Прамысловая санітарыя і гігіена (рас.) // ЗАТ «Сэрвалюкс», 2023 г. Праверана 21 лютага 2023 г.
  15. ^ Праектаваньне і забудова (рас.) // ЗАТ «Сэрвалюкс», 2023 г. Праверана 21 лютага 2023 г.
  16. ^ Інфармацыйна-тэхналягічныя паслугі (рас.) // ЗАТ «Сэрвалюкс», 2023 г. Праверана 21 лютага 2023 г.
  17. ^ ТАА «Сэрвалюкс», Каліфорнія, ЗША (анг.) // Партал «Адкрытыя карпарацыі», 2023 г. Праверана 21 лютага 2023 г.
  18. ^ СЗАТ «Сэрвалюкс», УНП 800000560 (рас.) // ТАА «БізІнспэкт», 2023 г. Праверана 21 лютага 2023 г.
  19. ^ Яўген Баскін. Посьпехі ў зоне рызыкі // Зьвязда : газэта. — 3 красавіка 2014. — № 61 (27671). — С. 1, 5. — ISSN 1990-763x.
  20. ^ Ігар Карней. СВК, ААТ, ЗАТ — што прыйшло на зьмену беларускім калгасам, якія ўлады зноў узяліся «аздараўляць» // Беларуская служба Радыё «Свабода», 10 кастрычніка 2018 г. Праверана 21 лютага 2023 г.

Вонкавыя спасылкі рэдагаваць

  Гэта — накід артыкула пра Беларусь. Вы можаце дапамагчы Вікіпэдыі, пашырыўшы яго.
Атрымана з «https://be-tarask.wikipedia.org/w/index.php?title=Сэрвалюкс&oldid=2368848»