Павал Шарамет
Па́вал Шараме́т (28 лістапада 1971, Менск — 20 ліпеня 2016, Кіеў) — беларускі журналіст, супрацоўнік Першага каналу расейскай тэлевізіі, адзін з арганізатараў вэбсайту «Беларускі партызан», аўтар (сумесна са Сьвятланай Калінкінай) кнігі «Случайный президент». Аўтар дакумэнтальных фільмаў «Чачэнскі дзёньнік», «Дзікае паляваньне», «1991 — апошні год імпэрыі», «Апошняя вышыня генэрала Лебедзя», «Карэйскі капкан», «Споведзь ката», «СНІД. Сьмерць з адкрытай датай».
Павал Шарамет | |
.jpg) | |
| Дата нараджэньня | 28 лістапада 1971 |
|---|---|
| Месца нараджэньня | |
| Дата сьмерці | 20 ліпеня 2016[1][2] (44 гады) |
| Месца сьмерці | |
| Месца пахаваньня | |
| Месца вучобы | |
| Занятак | журналіст, вядовец, тэлевядовец, рэдактар, галоўны рэдактар, тэлежурналіст, праваабаронец |
| Навуковая сфэра | журналіст |
| Маці | Людміла Шарамет[d] |
| Узнагароды | |
Біяграфія
рэдагавацьНарадзіўся 28 лістапада 1971 году ў Менску. Скончыў тры курсы гістфаку БДУ. Затым паступіў на факультэт міжнародных адносінаў Беларускага эканамічнага ўнівэрсытэту. Дыплёмная праца — афшорны бізнэс. Вольна валодаў ангельскай мовай.
У 1994—1995 гадох быў аўтарам і вядучым штотыднёвай аналітычнай праграмы «Праспэкт» на Беларускім тэлебачаньні. Атрымаў у 1995 годзе прэмію Беларускага ПЭН-цэнтру імя Алеся Адамовіча як найлепшы тэлевізійны журналіст Беларусі.
У жніўні 1995 — жніўні 1996 — галоўны рэдактар «Беларускай дзелавой газэты».
Зь верасьня 1996 — супрацоўнік тэлекампаніі ОРТ: кіраўнік Беларускага бюро ОРТ, шэф-рэдактар аддзелу карэспандэнцкай сеткі ОРТ, намесьнік дырэктара Дырэкцыі інфармацыйных праграм ОРТ. Зь ліпеня 1999 па сакавік 2000 быў вядоўцам аналітычнай праграмы «Время» ОРТ, пасьля — кіраўніком аддзелу спэцыяльных праектаў Дырэкцыі дакумэнтальнага кіно расейскага Першага каналу.
У 1998 годзе быў асуджаны беларускім судом на тэрмін два гады ўмоўна за рэпартаж зь беларуска-летувіскай мяжы.
З 2012 году пачаў весьці блог журналіста ў інтэрнэт-газэце «Украінская праўда». З 2015 году быў вядоўцам на ўкраінскай радыёстанцыі Радыё «Вести»(uk), спачатку па выходных у праграме «Шоу Павла Шеремета»[3], потым па буднях у праграме «Ранок Павла Шеремета»[4].
У апошнім сваім запісе ў блогу на сайце «Беларускі партызан» ад 17 ліпеня 2016 году Павал Шарамет адзначыў, што ў Кіеве пастаянна знаходзіцца ва ўкраінскамоўным асяродзьдзі і заклікаў беларусаў размаўляць на беларускай мове[5].
Забіты 20 ліпеня 2016 году ў Кіеве. У аўтамабілі, на якім ехаў Павал Шарамет, здэтанавала закладзеная бомба[6]. У студзені 2021 г. ініцыятыва «Беларускі народны трыбунал» апублікавала аўдыёзапіс размовы 2012 году, на якім старшыня КДБ Беларусі Вадзім Зайцаў ставіў супрацоўнікам КДБ задачы па забойствах апанэнтаў рэжыму Лукашэнкі, у тым ліку Паўла Шарамета. У дачыненьні да Шарамета Зайцаў гаварыў менавіта пра забойства з дапамогай бомбы[7]. Ігар Макар, былы намесьнік камандзіра баявой групы падразьдзяленьня па барацьбе з тэрарызмам МУС «Алмаз», заявіў, што Іван Церцель быў адным з распрацоўшчыкаў пляну замаху, які адбыўся ў 2016 годзе[8].
Пахаваны на Паўночных могілках у Менску[9].
Узнагароды і намінацыіі
рэдагавацьНамінант прэміі ТЭФІ Акадэміі расейскай тэлевізіі як «найлепшы рэпартэр» 1999 году, фіналіст ТЭФІ-2001 у намінацыі «журналісцкае расьсьледаваньне» за фільм «Дзікае паляваньне». За ўнёсак у разьвіцьцё свабоды слова ў 1999 годзе стаў ляўрэатам Міжнароднай прэміі за свабоду прэсы(en) ад Камітэту па абароне журналістаў. У 2002 годзе атрымаў прэмію Парлямэнцкай асамблеі АБСЭ «За журналістыку і дэмакратыю».
Асабістае жыцьцё
рэдагавацьБыў жанаты, меў двух дзяцей.
Крыніцы
рэдагаваць- ^ В Киеве в результате взрыва автомобиля погиб известный журналист Павел Шеремет (рас.) // NEWSru.com — 2016.
- ^ а б Le journaliste biélorusse Pavel Cheremet assassiné à Kiev (фр.) // Le Monde / J. Fenoglio — Paris: Société éditrice du Monde, 2016. — ISSN 0395-2037; 1284-1250; 2262-4694
- ^ «Шоу Павла Шеремета», 20 верасьня 2015
- ^ «Ранок Павла Шеремета» на «Радио Вести», апошні этэр, 19 ліпеня 2016
- ^ Павел Шеремет: Уроки украинского (рас.)
- ^ У Кіеве забіты Павал Шарамет(недаступная спасылка)
- ^ Exclusive: Lukashenko plotted murders in Germany [Эксклюзіў: Лукашэнка плянаваў забойствы ў Нямеччыне] — EUObserver, 4 студзеня 2021
- ^ Экс-боец «Алмаза»: Председатель КГБ Тертель участвовал в разработке плана по ликвидации Шеремета (рас.). Хартыя’97. Праверана 2021-06-24 г.
- ^ У Менску адвіталіся з Паўлам Шараметам
Вонкавыя спасылкі
рэдагаваць| Вікіцытатнік зьмяшчае збор цытатаў, датычных тэмы артыкула: |
- Форум з Паўлам Шараметам(недаступная спасылка) Радыё «Свабода», 9 лютага 2006
- У Києві від вибуху в машині загинув журналіст Павло Шеремет