Бэрнард Мэйдаф
Бэрнард Лоўрэнс Мэйдаф (нар. 1938, Нью-Ёрк, ЗША) — амэрыканскі брокер, які за 20 гадоў стварыў найбольшую ў гісторыі ЗША фінансавую піраміду на $65 млрд[4].
Бэрнард Мэйдаф | |
| анг. Bernard Lawrence Madoff | |
 2009 г. | |
| Род дзейнасьці | брокер |
|---|---|
| Дата нараджэньня | 29 красавіка 1938 (86 гадоў) |
| Месца нараджэньня | Нью-Ёрк, ЗША |
| Дата сьмерці | 14 красавіка 2021[1][2] (82 гады) |
| Месца сьмерці | |
| Месца вучобы | |
| Занятак | біржавы маклер, фінансіст, эканаміст, банкір |
| Навуковая сфэра | фінансы[3], інвэстыцыя[3] і фінансавае злачынства[d][3] |
| Бацька | Ральф Мэйдаф (1910—1972) |
| Маці | Сыльвія Мюнтэр (1911—1974) |
| Жонка | Рута Мэйдаф (з 1959 г.) |
| Дзеці | 2 сыны: Марк (1964—2010) і Эндру (1966—2014) |
| Сайт | madofftrustee.com |
| Дадаткова | зьняволены за махлярства на $65 млрд |
29 чэрвеня 2009 г. фэдэральны акруговы суд Нью-Ёрка вырак яго за 11 злачынстваў да 150 гадоў пазбаўленьня волі ў турме[4].
Жыцьцяпіс
рэдагавацьНарадзіўся ў нью-ёрскай акрузе Кўінс у габрэйскай сям’і сантэхніка. Прадзеды былі перасяленцамі з Эўропы: Польшчы, Румыніі і Аўстрыі. Мае старэйшую сястру Сондру Вайнэр і малодшага брата Пітэра Мэйдафа. У 1956 г. скончыў Дальне-Рокавэйскую школу. Затым год наведваў дзяржаўны Ўнівэрсытэт Алабамы (Таскалуса), дзе ўступіў у студэнцкае брацтва «Сыгма Альма Мю». Пасьля перавёўся ў прыватны Каледж Хофстры (Хэмпстэд, акруга Насаў, штат Нью-Ёрк), які скончыў у 1960 годзе са ступеняй бакаляўра мастацтваў у паліталёгіі[5].
Пры канцы 1960 г. заснаваў у Нью-Ёрку таварыства з абмежаванай адказнасьцю «Каштоўныя паперы Мэйдафа» для гандлю капеечнымі акцыямі[5]. Статутны капітал склалі $5000, заробленыя ў якасьці ратавальніка на вадзе і ўсталёўвальніка распырсквальнікаў. Яшчэ $50 000 для заснаваньня прадпрыемства пазычыў айчым Сол Альпэрн, які быў рахункаводам і зьвярнуўся да сваіх сяброў. Спачатку прадпрыемства выступала рынкаўтваральнікам на пазабіржавым рынку ружовых папераў Нацыянальнага бюро расцэнак (каціровак), для якіх вылічала цэнавую разьбежку попыту-прапановы між заяўкамі на куплю і продаж. Рассылаць расцэнкі (каціроўкі) на акцыі сталі праз кампутары. У лютым 1971 году ў Нью-Ёрку заснавалі біржу «Насдак» пасьля выпрабаваньня такога спосабу рассылкі. Прадпрыемства Мэйдафа працягвала выконваць заяўкі раздробных брокераў па-за біржай. Празь некалькі гадоў ТАА «Каштоўныя паперы Мэйдафа» стала найбольшым рынкаўтваральнікам біржы «Насдак». Таксама прадпрыемства ўпершыню сярод вядомах брокераў увяло плату за паток заявак, якую дылер даваў за права выконваць заяўкі кліентаў. Цягам 3-х год Мэдаф быў старшынём біржы «Насдак».
З канца 1980-х гадоў Бэрнард Мэйдаф пачаў выплачваць адсоткі па старых укладах за грошы новых укладальнікаў, для чаго стаў падрабліваць даведкі пра ўкладаньне сродкаў[5]. У 1992 г. Камісія па каштоўных паперах і біржах ЗША (ККПБ ЗША) пачала расьсьледаваньне махлярства з боку прадпрыемства «Авэліна і Бенэс» з удзелам Мэдафа. Справу закрылі пасьля вяртаньня грошай 2-м укладальнікам, якія падалі скаргу. У 1999 г. фінансавы аналітык бостанскай кампаніі «Рэмпарт» Гары Макропалас паведаміў ККПБ ЗША пра махлярскае завышэньне прыбытковасьці ТАА «Каштоўныя паперы Мэйдафа», аднак падразьдзяленьне Камісіі ў Бостане (штат Масачусэтс) пакінула зварот без адказу ў 2000 і 2001 гадах. У 2005 і 2007 гадах Макропалас беспасьпяхова прадставіў шырэйшыя доказы супрацоўніцы падразьдзяленьня ККПБ у Нью-Ёрку.
У 2004 г. юрыстка ККПБ з аддзела праверак і аглядаў на адпаведасьць Жэнэвьевэта Ўокер-Лайтфут параіла начальніку свайго падразьдзяленьня Марку Донах’ю дапытаць Мэдафа, бо выкрыла шматлікія неадпаведнасьці ў справаздачнасьці яго прадпрыемства. Аднак вышэйшы намесьнік начальніка аддзела Эрык Сўонсан загадаў спыніць расьсьледаваньне супраць Мэдафа, якое ў выніку закрылі ў 2005 годзе. Пагатоў у 2003 г. Сўонсан стаў сустракацца з пляменьніцай Бэрнарда Мэдафа — Шанай Мэдаф, зь якой заручыўся ў 2006 г., калі пакінуў ККПБ. У 2007 г. Эрык Сўонсан і Шана Мэдаф пабраліся шлюбам. Галоўны інспэктар ККПБ Коц налічыў 6 расьсьледаваньняў супраць Бэрнарда Мэдафа з 1992 г. да яго арышту 11 сьнежня 2008 году[5].
10 сьнежня 2008 г. сыны Бэрнарда Мэдафа — Марк і Эндру — паведамілі ў Фэдэральнае бюро расьсьледаваньняў ЗША аб прызнаньні іх бацькі ў тым, што кіраваньне актывамі ў ТАА «Каштоўныя паперы Мэйдафа» было фінансавай пірамідай. На наступны дзень супрацоўнікі ФБР арыштавалі Бэрнарда Мэдафа па абвінавачаньні ў махлярстве з каштоўнымі паперамі. 12 сакавіка 2009 г. Мэдаф прызнаў віну за 11 злачынстваў з канца 1980-х гадоў, у выніку якіх з рахункаў звыш 4800 кліентаў зьнікла $65 млрд[4]. 29 чэрвеня 2009 г. фэдэральны акруговы суд Нью-Ёрка вырак яго да 150 гадоў пазбаўленьня волі ў турме і абавязаў вярнуць больш як 24 000 ахвярам фінансавай піраміды $17,179 млрд, што зьменшыла іх выніковыя страты да амаль $50 млрд[6].
Крыніцы
рэдагаваць- ^ Muere en prisión el financiero Bernie Madoff (гішп.) — Barcelona: La Vanguardia Ediciones, SL, 2021. — 246170 экз.; 205331 экз. — ISSN 1133-4835
- ^ а б Sacks E. Bernie Madoff, mastermind behind largest Ponzi scheme in history, dies at 82 — NBC News, 2021.
- ^ а б в Нацыянальная служба Чэскай рэспублікі
- ^ а б в Сяргей Кізіма. Шакуючая будучыня амэрыканскай дэмакратыі // Зьвязда : газэта. — 19 чэрвеня 2012. — № 116 (27231). — С. 4. — ISSN 1990-763x.
- ^ а б в г Стваральніка найбуйнейшай у гісторыі фінансавай піраміды асудзілі на 150 гадоў // Газэта «Наша ніва», 29 чэрвеня 2009 г. Праверана 23 студзеня 2018 г.
- ^ Беларусы па фінансавай дасьведчанасьці не адстаюць ад эўрапейцаў і амэрыканцаў // Беларускае тэлеграфнае агенцтва, 4 лістапада 2015 г. Праверана 23 студзеня 2018 г.
 |
Гэта — накід артыкула пра біяграфію асобы. Вы можаце дапамагчы Вікіпэдыі, пашырыўшы яго. |