Бабруйская апэрацыя
Бабруйская апэрацыя — наступ Чырвонай арміі СССР 24—29 чэрвеня 1944 году на заняты нямецкім войскам Бабруйск (Магілёўская вобласьць, Беларуская ССР) падчас Другой сусьветнай вайны. Была складовай часткай апэрацыі «Багратыён». У ходзе ажыцьцяўленьня Чырвоная армія разьбіла галоўныя войскі 9-й нямецкай арміі і заняла 9 раённых цэнтраў 4 абласьцей Беларускай ССР: Качэрычы, Клічаў, Асіпавічы і Бабруйск (Магілёўская вобл.); Глуск, Карпілаўка і Парычы (Палеская вобласьць), Жлобін (Гомельская вобласьць) і Старыя Дарогі (Менская вобласьць). Чырвонаармейцы забілі каля 50 тыс. нямецкіх жаўнераў і афіцэраў, падбілі і захапілі 366 нямецкіх танкаў, больш за 5 тыс. гарматаў і мінамётаў, каля 16 тыс. аўтамашынаў. Бабруйскі наступ дазволіў Чырвонай арміі працягнуць прасоўваньне далей на Менск і Слуцак[1]. Разам з тым, страты Чырвонай арміі перавысілі страты нямецкага войска.
Бабруйская апэрацыя | |||||||||||
|---|---|---|---|---|---|---|---|---|---|---|---|
 | |||||||||||
| |||||||||||
Супернікі | |||||||||||
| Нямецкая дзяржава | СССР | ||||||||||
Камандуючыя | |||||||||||
| Ганс Ёрдан(de) | Канстанцін Ракасоўскі | ||||||||||
Колькасьць | |||||||||||
| 130 тыс. вайскоўцаў | 418 541 вайсковец[2] | ||||||||||
Страты | |||||||||||
| 50 тыс. забітых[1], 20 тыс. палонных | 70 тыс. забітых | ||||||||||
Расклад сілаў
рэдагавацьНямецкае войска налічвала каля 130 тыс. жаўнераў, больш за 2500 гарматаў, больш за 370 танкаў і штурмавых гарматаў. 6-ы паветраны флёт(de) Паветранага войска Нямеччыны ажыцьцяўляў прыкрыцьцё з дапамогай каля 700 самалётаў. Склад:
- 9-я армія(de) (генэрал Ганс Ёрдан) у складзе 10 дывізіяў — 35-ы армейскі корпус(uk) (3), 41-ы танкавы корпус(uk) (3), 55-ы армейскі корпус(uk) (2), 707-я пяхотная дывізія(de), 20-я танкавая дывізія(de);
- 2 дывізіі 4-й арміі[1].
Баявыя злучэньні Чырвонай арміі СССР налічвалі 418 541 вайскоўца, 1297 танкаў і самаходных гарматаў, 9758 гарматаў і мінамётаў, 2033 самалёты[2]. Склад:
- 1-ы Беларускі фронт (генэрал Канстанцін Ракасоўскі) — 3-я армія(ru) (генэрал-лейтэнант Аляксандар Гарбатаў), 28-я армія(ru) (Аляксандар Лучынскі(uk)), 48-я армія(ru) (Пракоп Раманенка(ru)), 65-я армія(ru) (Павал Батаў), 16-я паветраная армія(ru) (генэрал-палкоўнік Сяргей Рудзенка(uk)), конна-мэханізаваная група (Іса Пліеў);
- Дняпроўская вайсковая флятылія (капітан 1-га рангу Вісарыён Грыгор'еў(ru));
- злучэньні авіяцыі далёкага дзеяньня[1].
Ажыцьцяўленьне
рэдагаваць24 чэрвеня 1944 г., апоўдні, 224 савецкія бамбавікі і штурмавікі зьдзейсьнілі паветраны налёт на нямецкую абарону. У выніку на поўдзень ад пасёлка Парычы (Палеская вобласьць) савецкія 28-я і 65-я арміі прасунуліся на 10 км па правым беразе ракі Бярэзіна і занялі 50 вёсак Парыцкага раёну. 25 чэрвеня 1-ы гвардзейскі танкавы корпус(ru) (генэрал Міхаіл Паноў(ru)) паглыбіўся на 20 км у бок Бабруйска з поўдня і выйшаў у тыл нямецкаму войску ў Парычах[1]. На поўнач ад Бабруйска пачалася гарматная падрыхтоўка наступу, што ўрэшце прывяла да зьнішчэньня 134-й нямецкай пяхотнай дывізіі(de) (35-ы армейскі корпус). У выніку 26 чэрвеня 3-я савецкая армія перайшла раку Друць.
26 чэрвеня савецкая конна-мэханізаваная група выйшла да ракі Пцічы на ўсход ад Глуску (Палеская вобл.). 65-я армія выйшла да Бярэзіны на поўдзень ад Бабруйску і перарэзала шашу Бабруйск — Слуцак. Дняпроўская вайсковая флятылія зрабіла ўдалую высадку(uk) ў Здудзічах (Парыцкі раён). Чырвоная армія заняла Парычы. Пасьля бамбаваньня 16-й савецкай паветранай арміяй і ўводу танкавых войскаў, часьці 48-й арміі занялі Жлобін (Гомельская вобласьць). 9-ы савецкі танкавы корпус(ru) (генэрал-маёр Барыс Бахараў) абышоў Бабруйск з поўначы і заняў Качэрычы (Магілёўская вобл.). 27 чэрвеня 28-я армія заняла Глуск і пас. Карпілаўка (Палеская вобл.). 1-ы гвардзейскі танкавы корпус перарэзаў шляхі на захад і паўднёвы захад ад Бабруйска. 9-ы танкавы корпус закончыў акружэньне 40-тысячнага нямецкага войска ў Бабруйскім катле пры злучэньні з 1-ым гвардзейскім танкавым корпусам[1]. У акружэньні апынуліся 5 з 10 дывізіяў 9-й нямецкай арміі, у тым ліку 35-ы армейскі корпус, 20-я танкавая дывізія і часьці 41-танкавага корпусу. У выніку вярхоўны камандзір Узброеных сілаў Нямеччыны Адольф Гітлер (1935—1945) зьняў Ганса Ёрдана з пасады камандзіра 9-й арміі. Пасаду заняў Нікалаюс Форман(de).
28 чэрвеня Чырвоная армія заняла: пасёлак Цялуша (Бабруйскі раён), празь які праходзіла чыгунка з Бабруйска на Жлобін; Клічаў і Сьвіслач (Асіпавіцкі раён) на поўнач ад Бабруйска; Асіпавічы (Магілёўская вобл.) і Старыя Дарогі (Менская вобл.) на захад ад Бабруйска. 12-я нямецкая танкавая дывізія(de) прыбыла на падмацаваньне да ракі Сьвіслач на паўночны захад ад Бабруйска. Начальнік штаба 9-й арміі сустрэў камандзіра 12-й дывізіі словамі: «Рады вас бачыць. 9-я армія больш не існуе». Вярхоўнае камандаваньне войскаў Нямеччыны(de) загадала 9-й арміі адступаць. Камэндант Бабруйску Адольф Гаман атрымаў для ўтрыманьня места 383-ю пяхотную дывізію(de) (35-ы армейскі корпус). У Бабруйскай крэпасьці пакінулі некалькі тыс. параненых нямецкіх вайскоўцаў. Рэшткі 20-й танкавай дывізіі ўтварылі вастрыё для прарыву з акружэньня 41-га танкавага корпусу. У выніку 12 тыс. нямецкіх вайскоўцаў адступілі з катла на ўсход ад Бабруйска праз пазыцыі 356-й савецкай стралковай дывізіі (65-я армія) па дарозе на Менск. 29 чэрвеня Чырвоная армія заняла Бабруйск і пасёлак Халопенічы (Глускі раён). У ходзе наступу савецкія партызаны захоплівалі пераправы і вялі выведку ў тыле нямецкага войска[1].
Крыніцы
рэдагаваць- ^ а б в г д е ё Рыгор Шавяла. Бабруйская апэрацыя 1944 // Энцыкляпэдыя гісторыі Беларусі ў 6 тамах / гал.рэд. Міхась Ткачоў, маст. Эдуард Жакевіч. — Менск: Беларуская энцыкляпэдыя імя Петруся Броўкі, 1993. — Т. 1. — С. 253-254. — 494 с. — 20 000 ас. — ISBN 5-85700-074-2
- ^ а б Мікола Хобатаў. Выданьне аб вызваленьні Магілёўшчыны // Магілёўскія ведамасьці : газэта. — 10 жніўня 2009.
Вонкавыя спасылкі
рэдагаваць| Расейская Вікікрыніца зьмяшчае арыгінальныя матэрыялы, датычныя тэмы гэтага артыкула: |
Бабруйская апэрацыя — сховішча мультымэдыйных матэрыялаў