Адольф Зянюк
Адольф Зянюк (1895, в. Сухаволя, Сакольскі павет — 23 верасьня 1937, Сандамір, Польшча) — беларускі грамадзка-палітычны дзяяч, адвакат.
Адольф Зянюк | |
| Дата нараджэньня | 1895 |
|---|---|
| Месца нараджэньня |
|
| Дата сьмерці | 1938 |
| Месца сьмерці | |
| Месца вучобы | |
| Месца працы | |
| Сябра ў | Гарадзенскі гурток беларускай моладзі і Беларускі студэнцкі саюз |
Нарадзіўся пад Горадняй у в. Сухаволя Сакольскага павету.[1] Скончыў гімназію ў Горадні. Далучыўся да беларускага руху, будучы ў 3-й клясе гімназіі. Нацыянальную сьвядомасьць вынес з роднай хаты.
Адзін з заснавальнікаў Гарадзенскага гуртка беларускай моладзі. У гуртку прыймаў актыўны ўдзел ва ўсіх яго працах. Удзельнічаў у спэктаклях гуртка. Уваходзіў у склад рэдкалегіі часопісу «Колас беларускай нівы». Пісаў мастацкія апавяданьні. Паводле ўспамінаў Зоські Верас меў вельмі прыгожы почырк і ўласна ён перапісаў матэрыялы для часопісу-аднаднёўкі «Колас беларускай нівы», які ў колькасьці 50 ас. быў надрукаваны на шапірографе.[2] З восені 1913 — апошні кіраўнік гуртка.
Паступіў на юрыдычны факультэт Пецярбурскага ўнівэрсытэту. Дбаючы аб агульным разьвіцьці, хадзіў на лекцыі хіміі і філязофіі. Прымаў сталы ўдзел у дзейнасьці беларускіх студэнцкіх арганізацыяў у Пецярбургу, а таксама ў грамадзкім беларускім руху. Як сталы сябра сустрэчаў у праф. Браніслава Эпімах-Шыпілы, быў у курсе ўсіх беларускіх падзеяў у Пецярбургу, і таму, паводле сьведчаньня Зоські Верас, зьяўляўся сваеасаблівым сувязным паміж Пецярбургам і Менскам.[2] Яго лісты да Зоські Верас адлюстроўвалі ўсё жыцьцё беларускага руху ў Пецярбургу, і таму іх чыталі супольна з усімі менскімі беларусамі, якія зьбіраліся ў Беларускай хатцы (Захараўская, 18), а лісты Зоські Верас пра беларускую дзейнасьць у Менску чыталі на сходах у прафэсара Б. Эпімах-Шыпілы. 16 сьнежня 1914 году на вечарыне ў Эпімах-Шыпілы прачытаў рэфэрат «Стасунак беларусаў да іх суседзяў».
У 1916 годзе мабілізаваны ў войска. Скончыў вайсковую вучэльню ў Кіеве, пасьля чаго юнкерам пападае ў Перм.
У 1920-я гады навучаўся ў Віленскім унівэрсытэце. Сябра ўправы Беларускага студэнцкага саюзу. У 1925 выдавец-рэдактар часопісу «Студэнцкая думка».[3] Скончыў Віленскі ўнівэсытэт Стэфана Баторыя у 1927 годзе. У 1928 годзе прызначаны кіраўніком беларускага аддзелу на Віленскім радыё, дзе кожны тыдзень чытаў беларускія лекцыі. Верагодна, дзякуючы ягоным клопатам, у 1930-я гады на радыё, якое трансьлявалася на ўсю Польшчу, часта выступаў хор БСС пад кіраўніцтвам Рыгора Шырмы.
Працаваў судзьдзёй у Вільні, на Палесьсі. 8 лістапада 1930 году Адольф Зянюк, асэсар судовы ў акрузе апэляцыйнага суду ў Вільні, быў прызначаны судзьдзём павятовага суду ў Століне ў Пінскай акрузе акруговага суду.[4] Вядома, што ў 1932-1933 г. быў кіраўніком гарадзкога апэляцыйнага суду ў Сандаміры.[5]
Маючы ўсяго трохі за сорак гадоў, заўчасна памёр на пасадзе гарадзкога судзьдзі ў Сандаміры 29 верасьня 1937 году.[6]
Крыніцы
рэдагаваць- ^ На паштоўках — беларуская моладзь Сакольшчыны // Ніва, 6 красавіка 2008
- ^ а б Зоська Верас. Успаміны. Старое Гродна
- ^ Мастыка Андрэй. Беларускі студэнцкі саюз Віленскага універсітэта Стэфана Баторыя (1919-1939)
- ^ Ruch służbowy. Dodatek do dzennika urzędowego Ministerstwa sprawiedliwości, № 36. Warszawa, 20 grudnia 1930. C. 296.
- ^ Kalendarz sądowy na rok 1933. Warszawa, 1932. C. 79.
- ^ Dzennik urzędowy Ministerstwa sprawiedliwości, № 10. Warszawa, 20 października 1937. C. 117.
Літаратура
рэдагаваць- Зоська Верас. Я помню ўсё. Успаміны, лісты. / Укладаньне, падрыхтоўка тэксту, прадмова, камэнтар: Міхась Скобла. Вокладка: Іван Паўлёнак. — Kraków: Zakład graficzny «Colonel» S. A., 2013. — С. 19, 22—25, 28, 39, 46, 72, 112, 114, 118, 150, 151, 154, 227. — 475 с. — (Гарадзенская бібліятэка). — ISBN 978-83-7893-104-1
- Андрэй Мастыка. Беларускі студэнцкі саюз Віленскага універсітэта Стэфана Баторыя (1919-1939): бакалаўрская праца / навуковы кіраўнік прафэсар Алесь Смалянчук. — Вільня: Эўрапейскі гуманітарны ўнівэрсытэт, 2009. — 82 с.
- Сяргей Чыгрын Адольф Зянюк — рэдактар «Студэнцкай думкі». // Час спагадлівым не бывае : Гісторыка-краязнаўчыя і літаратуразнаўчыя артыкулы. — Менск: Кнігазбор, 2016. — С. 3—6. — ISBN 978-985-7089-98-7.