188-я інжынэрная брыгада

188-я гвардзейская інжынэрная брыгада — вайсковае злучэньне Ўзброеныя сілаў Беларусі, створанае ў кастрычніку 1991 году ў Новым Пашкаве (Магілёўскі раён) ў якасьці 188-й інжынэрна-сапэрнай брыгады.

188-я інжынэрная брыгада
Нарукаўны знак брыгады (2024 год)
Гады існаваньня	ад 1 кастрычніка 1991 (32 гады таму)
Краіна	Беларусь
Падпарадкаваньне	Міністэрства абароны Беларусі
Уваходзіць у	Сухапутныя войскі Беларусі
Тып	інжынэрныя войскі
Функцыя	абсталяваньне пераправы і разьмінаваньне
Дысьлякацыя	Новае Пашкава (Магілёўскі раён)
Узбраеньне	водаачышчальня «ВФС-2,5», разьмінавальнік «УР-77» і экскаватар «ЭАВ-4421»
Вядомыя камандзіры	палкоўнік Аляксандар Цагойка (зь 2021 году)

Вайсковая часьць 72471 мела машынадром.

Прызначэньне

На 2024 год 188-я інжынэрная брыгада выконвала наступныя задачы ў складзе інжынэрных войскаў Беларусі:

• абсталяваньне пунктаў водазабесьпячэньня са здабычай і ачысткай вады;
• разьмінаваньне пабудовы і мясцовасьці, пераробліваньне і ўтрыманьне праходу ў разбурэньнях і інжынэрнай загародзе;
• абсталяваньне і ўтрыманьне пераправы праз водную перашкоду;
• інжынэрнае маскаваньне пабудовы і войска;
• падрыхтоўка і ўтрыманьне шляху падвозу і вывазу, руху і манэўру войска;
• выкананьне разбурэньня, абсталяваньне і ўтрыманьне інжынэрнай загароды;
• умацаваньне раёну разгортваньня пункту кіраваньня, займанай войскам пазыцыі і рубяжу;
• інжынэрная выведка пабудовы, мясцовасьці і праціўніка.

Тэхніка

На 2024 год 188-я інжынэрная брыгада мела наступную тэхніку:

• 8-тонную фільтравальную станцыю «ВФС-2,5» прадукцыйнасьцю 2,5 кубамэтры за гадзіну для абясшкоджваньня, абеззаражваньня, дэзактывацыі і ачысткі вады ад прыроднага забруджваньня (час разгортваньня да атрыманьня чыстай вады складаў 40 хвілінаў, спажываная магутнасьць 8 кіляват і 40 гадзінаў працы на запасе рэагентаў);
• колавы шляхапракладнік «ПКТ-2» для расчысткі ад сьнегу, хмызьняку і драбналесься, а таксама для ўладкаваньня пераезду праз роў;
• шляхапракладнік «БАТ-2» для падрыхтоўкі дарогі і плакладваньня калённага шляху;
• плавальны транспартэр «ПТС-2» для перавозкі грузу і людзей праз водную перашкоду;
• устаноўку разьмінаваньня «УР-77» для выбуховага праробліваньня праходу ў мінным полі дзеля пропуску па ім тэхнікі;
• інжынэрную машыну разгароджваньня «ІМР-2» для забесьпячэньня прасоўваньня праз зону разбурэньня;
• палкавкую землярыйную машыну «ПЗМ-2» для рыцьця траншэі і катлавану пры абсталяваньні пункту кіраваньня і пазыцыі войска;
• вайсковы гідраўлічны аднакоўшавы экскаватар «ЭАВ-4421» для пагрузкі і разгрузкі пры абсталяваньні пункту кіраваньня і пазыцыі войска.

Мінуўшчына

1 кастрычніка 1991 году ў Новым Пашкаве (Магілёўскі раён) стварылі 188-ю гвардзейскую інжынэрна-сапэрную брыгаду, якую 11 студзеня 1992 году падпарадкавалі ўраду Беларусі. 20 сакавіка 1992 году 188-я брыгада ўвайшла ў склад Узброеных cілаў Беларусі, якія 6 траўня перайшлі ў падпарадкаваньне Міністэрства абароны Беларусі. 1 ліпеня 2004 году 188-ю брыгаду пераўтварылі ў 188-ю гвардзейскую цэнтральную базу разгортваньня інжынэрных войскаў. 1 сакавіка 2008 году база стала 188-й гвардзейскай інжынэрнай брыгадай. У 2012—2013 гадох 188-я брыгада праводзіла 6—8 разьмінаваньняў падводных выбуховак, якія не разарваліся, за год. Штогод вадалазы брыгады праводзілі 50—60 гадзінаў падводных трэніровак для пацьверджаньня кваліфікацыі. Навучаньне для атрыманьня доспуску да падводнай працы праходзілі ў навучальным цэнтры ў Пінску (Берасьцейская вобласьць).

На 2019 год 188-я брыгада была адзінай у Беларусі, дзе рыхтавалі вадалазаў для Ўзброеных сілаў Беларусі, а таксама іншых сілавых ведамстваў краіны, у тым ліку для спэцпадразьдзяленьня «Алмаз». За 2019 год пад вадой разьмінавалі 15 знаходак часоў Нямецка-савецкай вайны. Агулам абясшкодзілі звыш 300 выбуховых прадметаў. Улетку 2020 году да палявых збораў у брыгадзе на 42 дні прыцягнулі 36 жаўнераў-рэзэрвістаў, зь якімі адпрацоўвалі ўсталёўку мэханізаванага моста. Ад траўня па ліпень 2021 году на базе 188-й брыгады пад загадам яе камандзіра Аляксандра Цагойкі вялі падрыхтоўку да Армейскіх міжнародных гульняў. За 2020—2022 гады сіламі брыгады абясшкодзілі каля 700 мінаў і снарадаў Нямецка-савецкай вайны.

Мапа стрэльбішча «Пашкава» (2024 год)

12 студзеня 2024 году Савет міністраў Беларусі ўхваліў Пастанову № 20 «Аб забесьпячэньні дзейнасьці палігонаў і вайсковых стрэльбішчаў Узброеных сілаў Рэспублікі Беларусь», якой вызначыў межы і зону бясьпекі стрэльбішча «Пашкава» на поўдзень ад Новага і Старога Пашкава. Межы зоны бясьпекі, якія выклалі ў рамках Сусьветнай геадэзічнай сыстэмы (СГС-84), сумясьцілі зь межамі лясьніцтваў, аўтадарог, вадаёмаў і лініяў электраперадачы. Межы стрэльбішча і зоны бясьпекі вакол яго мелі пазначаць папераджальнымі знакамі пра забарону праходу і праезду. Згодна зь 7-м пунктам Палажэньня аб усталяваньні межаў вайсковых стрэльбішчаў, уздоўж іх прадугледжвалася зрабіць супрацьпажарныя разрывы ў выглядзе мінэралізаванай паласы шырынёй прынамсі 30 мэтраў. У 9-м пункце згадвалася, што ў межах зоны бясьпекі забаранялася знаходжаньне насельніцтва. Паводле 10-га пункту, начальнік стрэльбішча і яго камандзір мелі прынамсі за 10 дзён да пачатку падрыхтоўкі войска давесьці пра яе да кіраўніцтва Магілёўскага раённага выканаўчага камітэту і «Магілёўскай лясной гаспадаркі». У сваю чаргу Магілёўскі райвыканкам меў апавясьціць пра тое насельніцтва за 5 дзён да пачатку на ўласнай вэб-бачыне і згадаць пра забарону праходу ў зону бясьпекі стрэльбішча. Сярод іншага, Пастанова зьмяшчала схему зоны бясьпекі.