Вікіпэдыя

Уладзімер Шымаў

Уладзі́мер Мікала́евіч Шы́маў (нар. 29 лістапада 1948, Радолаўка, Прыморскі раён, Запароская вобласьць, Украіна) — беларускі дзяржаўны й эканамічны дзяяч, навуковец-эканаміст, рэктар БДЭУ з чэрвеня 2002.

Уладзімер Шымаў
Міністар эканомікі РБ
1 ліпеня 1996 — 14 чэрвеня 2002
Прэзыдэнт: Аляксандар Лукашэнка
Прэм’ер-міністар: Сяргей Сідорскі
Наступнік: Андрэй Кабякоў
Рэктар БДЭУ
2002 — 2019
Наступнік: Вячаслаў Шуцілін
Асабістыя зьвесткі
Нарадзіўся: 29 лістапада 1948 (75 гадоў)

Сьцяг Украінскай ССР Радолаўка, Прыморскі раён, Запароская вобласьць, Украіна
Адукацыя:
Узнагароды:

Біяграфія рэдагаваць

Нарадзіўся ва Ўкраіне, паводле паходжаньня этнічны баўгарын.

У 1967 паступіў у Маскоўскі дзяржаўны ўнівэрсытэт ім. М. В. Ламаносава на геаграфічны факультэт. Скончыўшы ўнівэрсытэт у 1972 з спэцыяльнасьцяй географ-эканаміст, паступіў у асьпірантуру Рады па вывучэньню прадукцыйных сілаў пры Дзяржпляне СССР, дзе ў 1976 абараніў дысэртацыю на сушуканьне навуковае ступені кандыдата эканамічных навук на тэму «Пытаньні мэтодыкі рэгіянальнае эканамічнае адзнакі прыродных рэсурсаў». Пасьля вучобы ў асьпірантуры быў накіраваны на працу ў Навукова-дасьледчы інстытут эканомікі й эканоміка-матэматычных мэтадаў плянаваньня Дзяржпляну БССР у Менску.

У 1977 з мэтай укамплектаваньня Гомельскага аддзелу інстытуту высокакваліфікаванымі навуковымі кадрамі пераведзены на працу ў Гомель, дзе працаваў старэйшым навуковым супрацоўнікам, загадчыкам сэктару. У 1982—1989 працаваў у Гомельскім каапэратыўным інстытуце Цэнтрасаюзу ў якасьці дацэнта, загадчыка катэдры, прарэктара па вучэбнай працы.

У 1988 у МДУ ім. М. В. Ламаносава абараніў дысэртацыю на сушуканьне навуковай ступені доктара эканамічных навук на тэму «Вымярэньне й плянаваньне рэгіянальнае эканамічнае эфэктыўнасьці грамадзкае вытворчасьці (пытаньні мэтадалёгіі)». З 1989 працаваў намесьнікам дырэктара па навуковай працы Навукова-дасьледчага эканамічнага інстытуту Дзяржпляну БССР.

У 1995 быў прызначаны на пасаду Першага намесьніка Міністра эканомікі Рэспублікі Беларусь, а ў 1996—2002 — міністар эканомікі Рэспублікі Беларусь. У 2001—2002 сябар Прэзыдыюму Рады Міністраў Рэспублікі Беларусь, у 1999—2002 — сябар ураду Саюзнае дзяржавы Расеі й Беларусі.

Кіраваў распрацоўкай і непасрэдна распрацоўваў шматлікія рэспубліканскія праграмы стратэгічнага характару, у т.л: Праграма пераходу эканомікі рэспублікі да рынкавых адносінаў, Праграма структурнае перабудовы эканомікі Беларусі, Асноўныя кірункі сацыяльна-эканамічнага разьвіцьця Беларусі на 1996—2000 гг., Праграма сацыяльна-эканамічнага разьвіцьця Рэспублікі Беларусь на 2001—2005 гг. і інш.

2002—2019 — рэктар БДЭУ.

Сябар рэдкалегіі навукова-тэарэтычнага часопісу «Беларуская думка» (1991), заснавальнік і галоўны рэдактар навукова-практычнага часопісу «Белорусский экономический журнал».

Ціск на грамадзкіх актывістаў рэдагаваць

У канцы 2005 г. Шымаў падпісаў загад аб адлічэньні студэнткі-выдатніцы Тацяны Хомы з факультэту міжнародных эканамічных адносінаў БДЭУ пасьля ўдзелу ў канфэрэнцыі Эўрапейскага саюзу студэнтаў (European Students' Union, ESIB), на якой яна была абраная ў склад кіраўніцтва гэтай арганізацыі.[1] Гэта выклікала актыўныя міжнародныя пратэсты і заяву міністра адукацыі Швэцыі. Эўрапейская ўнівэрсытэцкая асацыяцыя (European University Association) замарозіла супрацоўніцтва з БДЭУ ў сувязі з гэтым скандалам.[1][2][3] На студэнтаў БДЭУ, блізкіх да Тацяны Хомы, аказваўся ціск з боку адміністрацыі БДЭУ і КДБ[4].

Шымаў публічна матываваў адлічэньне Хомы яе самавольным выездам за мяжу падчас навучальнага працэсу[5] і адмовіўся сустракацца з дэлегацыяй амбасадараў эўрапейскіх краінаў, якія хацелі абмеркаваць зь ім сытуацыю[6]. Падчас паездкі Шымава на навуковую канфэрэнцыю ў Вену ў 2008 г. яго сустрэла дэманстрацыя студэнтаў, якія пратэставалі супраць адлічэньня Хомы[7].

Пасьля пратэстаў, зьвязаных з прэзыдэнцкімі выбарамі 2006 г., студэнтаў БДЭУ, якія ўдзельнічалі ў пратэстах, пад пагрозай выключэньня прымушалі публічна каяцца за гэта[8].

У 2008 годзе розгалас у СМІ атрымалі пагрозы адлічэньня з БДЭУ студэнткі Маўлюды Атакулавай, актывісткі «Маладога Фронту», якая неаднаразова арыштоўвалася за ўдзел у пратэсных акцыях[9]. Студэнты пачалі зьбіраць подпісы ў падтрымку Атакулавай, Шымаў вырашыў не падпісваць рашэньне аб яе выключэньні[10].

У тым жа 2008 годзе праваабаронцы ўключылі Ўладзімера Шымава як рэктара аднаго зь беларускіх унівэрсытэтаў, адкуль студэнты выключаліся па палітычных матывах, у сьпіс дзеячоў рэжыма Лукашэнкі, якім прапаноўвалася забараніць уезд у Польшчу[11].

Сям’я рэдагаваць

Сын Яраслаў Шымаў — журналіст расейскай службы Радыё Свабода[12][13].

Сын Усевалад Шымаў — палітоляг, публіцыст, аўтар «СБ - Беларусь Сегодня»[14] і шэрагу расейскіх нацыяналістычных сайтаў[12].

Працы рэдагаваць

  • Национальная экономика Беларуси: Потенциалы. Хозяйственные комплексы. Направления развития. Механизмы управления — Мн.: БГЭУ, 2005;
  • Региональная эффективность общественного производства: проблемы, методы измерения, пути повышения. — Мн., 1986;
  • Теоретические и методологические основы структурной перестройки экономики Беларуси. — Мн.,1996 (у сааўтарсьцьве, адказны рэдактар);
  • Прогнозирование социально-экономического развития Республики Беларусь: вопросы теории и методики.- Мн.,1996 (у сааўтарсьцьве, адказны рэдактар);
  • Словарь современных экономических и правовых терминов. — Мн., 1999; 2002 (кол. авторов, отв. редактор);
  • Экономическое развитие Беларуси на рубеже веков: проблемы, итоги, перспективы.- Мн., 2003.
  • Национального атласа Республики Беларусь. — Мн., 2003. (галоўны рэдактар)

Крыніцы рэдагаваць

  1. ^ а б Таццяна Хома: "Я ўсё роўна скончу Беларускi эканамiчны ўнiверсiтэт" Generation.by, 9 сьнежня 2005 г.
  2. ^ Riding Roughshod Over Rights in Belarus - US COMMISSION ON SECURITY AND COOPERATION IN EUROPE]
  3. ^ Тацяна Хома: "Імідж БДЭУ ад гэтага пацярпеў – гэта дакладна" - Радыё Свабода, 5 сьнежня 2005 г.
  4. ^ [1] - Радыё Свабода, 27.03.2008
  5. ^ Што думаюць студэнты БДЭУ пра выключэньне Т.Хомы? - Радыё Свабода, 8.12.2005
  6. ^ Рэктар БДЭУ адмовіўся сустрэцца з эўрапейскімі амбасадарамі - Generation.by, 7.12.2005
  7. ^ Аўстрыйскія студэнты сустрэнуць рэктара БДЭУ Шымава акцыяй пратэсту - Generation.by, 27.03.2008
  8. ^ Дэкан БДЭУ патрабаваў публічнага пакаяньня студэнткі (фота) - Радыё Свабода, 19.04.2006
  9. ^ Людвісе Атакулавай пагражаюць адлічэньнем з вучобы - Вясна (цэнтар), 11.04.2008
  10. ^ Рэктар БДЭУ не рашыўся выключыць Атакулаву - Наша Ніва, 23 красавіка 2008 г.
  11. ^ 472 Belarusian officials may face Polish travel ban - Вясна (цэнтар), 19.03.2008
  12. ^ а б Сышоў з пасады Уладзімір Шымаў, які 17 гадоў узначальваў БДЭУ - Наша Ніва, 16.05.2019
  13. ^ Дзе вучацца дзеці беларускіх рэктароў? - Generation.by, 30.09.2011
  14. ^ Публікацыі Ўсевалада Шымава на sb.by

Вонкавыя спасылкі рэдагаваць

Атрымана з «https://be-tarask.wikipedia.org/w/index.php?title=Уладзімер_Шымаў&oldid=2451830»