Майскі вальс

«Майскі вальс» — патрыятычная песьня 1985 году на словы паэта Міхаіла Ясеня і музыку Ігара Лучанка.

«Майскі вальс»
Песьня выканаўцы Яраслава Еўдакімава / ансамбля «Сябры»
Мова	расейская / беларуская
Напісаная	1985
Выдадзеная	1988
Запісаная	1986
Жанр	поп-музыка
Працягласьць	3:40
Лэйбл	«Мэлёдыя»
Аўтар(ы)	Міхаіл Ясень
Кампазытар(ы)	Ігар Лучанок

Прысьвячалася першым пераможным дням пасьля Другой сусьветнай вайны. У творы салдат грае вальс на гармоні на вуліцах Вены. Таксама ў песьні тройчы згадваецца Дунай, які выступае сымбалем міру, сяброўства і любові. Першапачаткова песьня выконвалася па-расейску. Пазьней ансамбль «Сябры» пачаў сьпяваць яе па-беларуску ў перакладзе паэта Язэпа Скурка. Затым Міхаіл Ясень сам пераклаў свой верш. Як адзначыў былы галоўны рэдактар часопіса «Роднае слова» Міхась Шавыркін: «беларускамоўны варыянт сэнсава паглыбіўся: вобраз салдата-музыкі набыў больш абагульненыя рысы, яго мэлёдыя вальса адлюстроўвае радасьць і боль свайго народа».

Верш

Вясна сорак пятага году. Чакаў цябе доўга Дунай! Народам Эўропы свабоду Ў кветках прынёс яркі май! На вуліцах Вены свабоднай Народу зьбіралася шмат. На вернай, параненай дужа гармоні Вальс родны іграў наш салдат. Прыпеў: Помніць Вена, помняць Альпы і Дунай Той пяшчотны і чароўны, ясны май! Віхры венцаў у тым вальсе скрозь гады Помніць сэрца і запомніць назаўжды! Натхнёна, і горда, і сьмела Вальс сонечны ў Вене гучаў. І Вена сьмяялася, пела, Як быццам сам Штраўс іграў! І хлопец з усьмешкай шчасьлівай Да сэрца гармонь прыціскаў, Як быццам Радзімы ён бачыў разьлівы, Як быццам яе абдымаў. Прыпеў. Над Венай сівой і бурлівай Плыў вальс, што прынесла вайна. Гучаў ён пяшчотна, шчасьліва. І ўсіх ап'яняла вясна. Вясна сорак пятага году! Цябе дачакаўся Дунай. Радзімы далёкай той вальс пераможны Салдат на гармоні іграў. Прыпеў. — Міхаіл Ясень, «Майскі вальс»