Шылува

Шылува́ (па-летувіску: Šiluva, па-польску: Szydłowo) — мястэчка ў Летуве, у гістарычнай вобласьці Жамойці. Цэнтар староства ў Расенскім раёне Ковенскага павету. Знаходзіцца за 20 км на поўнач ад Расенаў. Насельніцтва — 635 чал. (2011).

Шылува
лет. Šiluva
Касьцёльны пляц і капліца Дзевы Марыі
Герб Шылувы
Першыя згадкі:	XV стагодзьдзе
Краіна:	Летува
Павет:	Ковенскі
Раён:	Расенскі
Староства:	Шылуўскае
Вышыня:	142 м н. у. м.
Насельніцтва:	635 чал. (2011)
Часавы пас:	UTC+2
летні час:	UTC+3
Тэлефонны код:	+370-37
Паштовы індэкс:	LT-60052
Геаграфічныя каардынаты:	55°31′50″ пн. ш. 23°13′30″ у. д.
Шылува на мапе Летувы Шылува
Галерэя здымкаў у Вікісховішчы

Шылува — адзін з цэнтраў каталіцкіх пілігрымак Летувы.

Мінуўшчына

Базыліка нараджэньня Найсьвяцейшай Дзевы Марыі

Шылува ўпершыню згадваецца ў крыніцах пад 1457 рокам у сувязі з будаўніцтвам Касьцёлу Нараджэньня Найсьвяцейшай Дзевы Марыі ды апосталаў Пятра і Барталямэя летувіскім шляхцічам Пэтрасам Гедгаўдасам. Пазьней мястэчка стала вядомым дзякуючы фэсту Нараджэньня Найсьвяцейшай Дзевы Марыі.

З прыходам Рэфармацыі ў XVI стагодзьдзі мноства жыхароў Шылувы навярнуліся ў кальвінізм, а касьцёл быў разрабаваны і ўрэшце закрыты. Апошні пробашч, Ян Галубка, закапаў рэліквіі і дакумэнты побач з касьцёлам.

У 1608 року дзецям, якія пасьвілі авечак, аб’явілася Дзева Марыя, паказаўшы месца, дзе закапаныя дакумэнты. У 1622 року зь іхняй дапамогай каталікі здолелі вярнуць сабе касьцёл. На месцы аб’яўленьня паўстаў драўляны касьцёл і стаў ладзіцца фэст, а абраз Дабраславёнай Дзевы Марыі з Божым Дзіцём стаў лічыцца цудадзейным.

У 1786 року была збудаваная базыліка Нараджэньня Найсьвяцейшай Дзевы Марыі, якая захавалася да нашага часу.

За расейскім часам ў Шылуве распаўсюджвалася літаратура, якую дастаўлялі кніганошы з Прусіі, таму расейскія ўлады забаранілі сьвяткаваньне фэсту. Ягонае адзначэньне ўзнавілася пасьля атрыманьня Летувой незалежнасьці ў 1918 року. Пасьля далучэньня Балтыкі да СССР у 1940 року савецкія ўлады спрабавалі забараніць традыцыю, аднак канчаткова ня здолелі гэтага зрабіць. Напрыклад, у 1979 року падчас пілігрымкі КДБ перакрыла ўсе дарогі да Шылувы з прычыны нібыта эпідэміі сьвіной чумы.

Дом Яна Паўла II

Пасьля аднаўленьня незалежнасьці Летувы ў 1990 року аднавіўся і старажытны фэст у гонар Дзевы Марыі, на які зьбіраліся пілігрімы з розных кутоў краіны. У 1993 року падчас візыту ў Летуву Папа Ян Павал II пабываў у пілігрымцы да касьцёлу Дзевы Марыі ў Шылуве. На дзясятую гадавіну папскага візыту была адкрытая новая ўстанова для пілігрымаў і сэмінарыстаў пад назовам „Дом Яна Паўла II“ (лет. Jono Pauliaus II namai).

Турыстычная інфармацыя

• Барокавы касьцёл нараджэньня Найсьвяцейшай Дзевы Марыі(lt) (1760—1786)
• Неагатычная капліца (1912—1924)

Вядомыя ўраджэнцы

• Язэп Аляшкевіч — беларускі і польскі маляр
• Мэндэль Закс — жыдоўскі рабін
• Эймунтас Някрошус — савецкі і летувіскі рэжысэр

Глядзіце таксама

• Маці Божая Шылуўская(en)

Літаратура

• Słownik geograficzny Królestwa Polskiego i innych krajów słowiańskich. Tom XII: Szlurpkiszki — Warłynka. — Warszawa, 1892. — S. 97