Тамаш Сапега

Тамаш Сапега (да 1598 — паміж 2 і 8 красавіка 1646, Вільня) — дзяржаўны дзяяч Вялікага Княства Літоўскага. Ваявода вэндэнскі (1641—1643) і наваградзкі (з 1643).

Тамаш Сапега

Тамаш Сапега. З Коданскай галерэі, 1709
Герб «Ліс»
Асабістыя зьвесткі
Нарадзіўся	да 1598
Памёр	2—8 красавіка 1646 Вільня, Рэч Паспалітая
Пахаваны	Касьцёл Сьвятога Яна Хрысьціцеля і кляштар францішканаў
Род	Сапегі
Бацькі	Мікалай Сапега Рэгіна з Дарагастайскіх
Жонка	Сузанна з Храптовічаў

Біяграфія

З коданскай лініі магнацкага роду Сапегаў гербу «Ліс», сын Мікалая, ваяводы наваградзкага, і Рэгіны з Дарагастайскіх. Меў братоў Паўла і Казімера Мікалая.

У 1617 годзе навучаўся ў езуіцкім калегіюме ў Любліне, у 1619—1621 гадох — у Кракаўскім унівэрсытэце. У 1621—1625 гадох працягваў адукацыю за мяжой — у Інгальштаце (1621), Падуе (1622), Балёньні (1623) і Лёвэне (1625).

Па вяртаньні на Радзіму быў пры двары караля і вялікага князя Жыгімонта Вазы, дзе ў 1632 годзе страціў руку ў паядынку зь Юрыем Зяновічам. Браў удзел у вайне з Маскоўскай дзяржавай на чале ўласнай гусарскай харугвы.

У 1640 годзе абіраўся маршалкам Галоўнага Трыбуналу. У красавіку 1641 году атрымаў урад ваяводы вэндэнскага, а на мяжы 1642 і 1643 — ваяводы наваградзкага. Удзельнічаў у перамовах з маскоўскімі пасламі.

Ажаніўся з Сузаннай Храптовіч (шлюб да 1638), не пакінуў нашчадкаў. Павахалі Т. Сапегу ў касьцёле францішканаў у Гальшанах.

Літаратура

• Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — 788 с. — ISBN 985-11-0378-0

Вонкавыя спасылкі

Тамаш Сапега — сховішча мультымэдыйных матэрыялаў