Сяргей Уладзімеравіч Абламейка
Сярге́й Уладзі́меравіч Абламе́йка (1956; Вярэнаў, Гарадзенская вобласьць, цяпер Беларусь) — беларускі матэматык, акадэмік Акадэміі навук Беларусі (2009), чалец-карэспандэнт Акадэміі навук Беларусі (2004), доктар тэхнічных навук (1990), прафэсар (1992), акадэмік міжнароднай Акадэміі навук інфармацыі, інфармацыйных працэсаў і тэхналёгіі (1995), акадэмік Беларускай інжэнэрнай акадэміі (1995), рэктар Беларускага дзяржаўнага ўнівэрсытэту (з 2008 па 2017).
Сяргей Уладзімеравіч Абламейка | |
| Дата нараджэньня | 24 верасьня 1956 (68 гадоў) |
|---|---|
| Месца нараджэньня | Вярэнаў, Гарадзенская вобласьць, Беларуская ССР, СССР |
| Месца вучобы | Беларускі дзяржаўны ўнівэрсытэт (1978) |
| Занятак | матэматык, прафэсар унівэрсытэту, спэцыяліст у галіне інфарматыкі |
| Навуковая сфэра | Інфарматыка |
| Месца працы | Беларускі дзяржаўны ўнівэрсытэт |
| Вядомы як | Распрацоўнік кампутарнага распазнаньня выяваў(en) (1998) |
| Сябра ў | Каралеўская акадэмія эканамічных і фінансавых навук[d][1] і Эўрапейская акадэмія[2] |
| Навуковая ступень | доктар тэхнічных навук[d] |
| Навуковы кіраўнік | Алег Семянкоў |
| Вучні | Аляксандар Тузікаў(ru), Валер Старавойтаў(ru) |
| Узнагароды |  Дзяржаўная прэмія Рэспублікі Беларусь (2002), прэмія Нацыянальнай акадэміі навук Беларусі (1998, 2007)[3] |
| Сайт | bsu.by/be/main.aspx?guid=235901 |
- Вікіпэдыя мае артыкулы пра іншых асобаў з прозьвішчам Абламейка.
Біяграфія
рэдагаваць- У 1978 скончыў Беларускі дзяржаўны ўнівэрсытэт па спэцыяльнасьці «матэматыка».
- Пачынаючы з 1978 працаваў у Аб’яднаным інстытуце праблем інфарматыкі НАН Беларусі (да 2002 меў назву Інстытут тэхнічнай кібэрнэтыкі) на пасадах стажора-дасьледчыка, малодшага навуковага супрацоўніка, старэйшага навуковага супрацоўніка, з 1986 загадчык лябараторыі апрацоўкі і распазнаваньня графічнай інфармацыі, з 1998 намесьнік дырэктара, з 2002 — генэральны дырэктар.
- У 1984 годзе абараніў кандыдацкую, а ў 1990 — доктарскую дысэртацыю.
- У 1998—2003 працаваў прафэсарам у БДУІРы, у 1989—1998 і з 2003 выкладае ў БДУ.
- З 1996 навуковы сакратар, з 2002 намесьнік старшыні Нацыянальнай рады па космасу Рэспублікі Беларусь.
- З 2005 году акадэмік-сакратар Аддзяленьня фізыкі, матэматыкі і інфарматыкі НАН Беларусі.
- 31 кастрычніка 2008 прызначаны рэктарам Беларускага дзяржаўнага ўнівэрсытэту.
21 кастрычніка 2011 г. стаў 1-ым беларускім сябрам Эўрапейскай акадэміі (Лёндан, Ангельшчына)[4].
Навуковая дзейнасьць
рэдагавацьСяргей Абламейка зьяўляецца вядомым навукоўцам у галінах інфарматыкі, апрацоўкі графічнай інфармацыі і распазнаваньня выяваў. Пад яго кіраўніцтвам і непасрэдным удзеле распрацаваныя тэорыя, мэтады і альгарытмы апрацоўкі і распазнаваньня графічнай інфармацыі. Ім распрацаваныя прынцыпы пабудовы і мэтадалёгія стварэньня аўтаматызаваных сыстэмаў апрацоўкі графічнай інфармацыі. Пад яго кіраўніцтвам быў створаны шэраг пэўных аўтаматызаваных сыстэмаў і праграмных комплексаў апрацоўкі графічнай інфармацыі з прымяненьнем у картаграфіі, дасьледваньні зямной паверхні, мэдыцыне, машынабудаўніцтве і прыладапабудове. Дадзеныя сыстэмы ўкаранёныя і працуюць на шматлікіх прадпрыемствах, як цывільных, так і прадпрыемствах Міністэрства абароны Рэспублікі Беларусь. Пад яго кіраўніцтвам абаронена 9 кандыдацкіх і 2 доктарскія дысэртацыі.
Прымае актыўны ўдзел у міжнародных навуковых канфэрэнцыях. Зьяўляецца галоўным рэдактарам часопіса «Весці НАН Беларусі, серыя фізіка-матэматычных навук» і журнала «Інфарматыка», чальцом рэдакцыйных калегій міжнародных часопісаў «Pattern Recognition», «Pattern Recognition Letters», «Machine Graphics and Vision», «Pattern Recognition and Image Analysis», «Вестник компьютерных и информационных технологий», якія выдаюцца ў Эўропе, ЗША, Расеі, а таксама беларускіх часопісаў «Даклады НАН Беларусі» і «Навука і інавацыі». У 1998 за вялікі ўклад у разьвіцьцё тэорыі апрацоўкі графічнай інфармацыі С. У. Абламейка першым з навукоўцаў дзяржаваў СНД абраны галоўным чальцом Міжнароднай асацыяцыі па распазнаваньні выяваў (IAPR). У 2004 годзе абраны віцэ-прэзыдэнтам, а ў 2006 — першым віцэ-прэзыдэнтам IAPR. У 1995 абраны галоўным чальцом Брытанскага інстытуту інжэнэраў па электратэхніцы (IEE), старэйшым чальцом Амэрыканскага інстытуту інжэнэраў па электратэхніцы і электроніцы (IEEЕ), у 2001 абраны інжэнэрам па Хартыі Інжэнэрнай Радай Эўропы.
Аўтар больш за 350 навуковых прац, у тым ліку 11 манаграфіяў. Больш за 180 прац апублікавана на ангельскай мове ў міжнародных журналах і працах міжнародных канфэрэнцыяў.
Асноўныя навуковыя працы:
- An Introduction to Interpretation of Graphic Images. Bellingham, Wash., USA: SPIE Optical Engineering Press, 1997.
- Обработка изображений: технология, методы, применение. Мн.: Амалфея, 1999 (Сумесна з З. М. Лагуноўскім).
- Machine Interpretation of Line Drawing Images. London: Springer, 2000 (сумесна з T. Pridmore).
- Географические информационные системы. Создание цифровых карт. Мн.: ИТК НАН Беларуси, 2000 (сумесна з Р. П. Апарыным, А. М. Кручковым).
- Разработки Республики Беларусь в области исследования и использования космического пространства. Мн., 2001 (у суаўтарстве).
Узнагароды й прэміі
рэдагаваць- прэмія Ленінскага камсамолу Беларусі (1990)
- прэмія НАН Беларусі за найлепшую манаграфію (1998)
- Дзяржаўная прэмія Рэспублікі Беларусь (2002)
- Ордэн Францішка Скарыны (2007)
| Папярэднік Васіль Стражаў |
Рэктар Беларускага дзяржаўнага ўнівэрсытэту з 2008 году |
Наступнік — |
Санкцыі
рэдагавацьПасьля хвалі рэпрэсій супраць апазыцыі ў сувязі з прэзыдэнцкімі выбарамі 2010 году, Сяргей Абламейка, тагачасны рэктар БДУ, быў уключаны ў Чорны сьпіс ЭЗ. Яму быў забаронены ўезд у краіны Эўрапейскага Зьвязу, ягоныя актывы на тэрыторыі ЭЗ павінны былі быць замарожаныя.
У сваім рашэньні ЭЗ адзначыў, што Абламейка
|
нясе адказнасьць за выключэньне некалькіх студэнтаў з Унівэрсытэту за тое, што яны ўдзельнічалі ў дэманстрацыях 19 сьнежня 2010 г. і ў іншых мірных дэманстрацыях у 2011 г.[5] | 
|
Крыніцы
рэдагаваць- ^ https://racef.es/es/academicoscorrespondiente-extranjero/sablameyko
- ^ https://www.ae-info.org/ae/User/Ablameyko_Sergey
- ^ Акадэмік Абламейка Сяргей Уладзімеравіч // Нацыянальная акадэмія навук Беларусі, 12 ліпеня 2015 г. Праверана 21 кастрычніка 2015 г.
- ^ Надзея Нікалаева Рэктар БДУ — дзейны член Эўрапейскай акадэміі // Зьвязда : газэта. — 26 кастрычніка 2011. — № 204 (27068). — С. 1. — ISSN 1990-763x.
- ^ .Council Decision 2012/642/CFSP of 15 October 2012 concerning restrictive measures against Belarus, EUR-Lex(en), 2012
Літаратура
рэдагаваць- Савік М. П. Майстар распазнавання вобразаў // Маладосць. 1999. №5-6.
- Вощула М. Люди науки: Сергей Абламейко // Наука и инновации. 2004, №5
- Сергей Владимирович Абламейко (К 50-летию со дня рождения) // Весці НАН Беларусі. Сер. фіз.-матэм. навук. 2006, №3.