Караль Герман Стэмпень
Ка́раль Ге́рман Стэ́мпень (па-польску: Karol Herman Stępień; 21 кастрычніка 1910, Лодзь — 19 ліпеня 1943, Баравікоўшчына) — каталіцкі сьвятар, канвэнтуальны францішканін з кляштару айцоў францішканаў ў Івянцы. Бласлаўлёны Каталіцкага касьцёлу.
| Караль Герман Стэмпень | |
 | |
| Адукацыя | |
|---|---|
| Дзейнасьць | каталіцкі сьвятар |
| Нарадзіўся | 21 кастрычніка 1910[1] |
| Памёр | 19 ліпеня 1943[1] (32 гады) |
Жыцьцяпіс рэдагаваць
Караль Стэмпень уступіў у ордэн 2 верасьня 1929 году, узяўшы імя Герман. З-за сваіх здольнасьцяў быў накіраваны на вучобу ў Рым, на папскі багаслоўскі факультэт сьв. Банавэнтуры. Пасьвечаны ў законьнікі 3 верасьня 1930 году. 25 сьнежня 1937 году атрымаў сьвятарскае пасьвячэньне. Працягнуў навучаньне на багаслоўскім факультэце Ўнівэрсытэту Яна Казімера ў Львове, дзе атрымаў ступень магістра тэалёгіі. Пасьля заканчэньня пачаў працаваць вікарыем у францішканскіх касьцёлах. Яго дзейнасьць у парафіях ацэньвалася як поўная энтузіязму і гатоўнасьці служыць вернікам.
У час Другой сусьветнай вайны, падчас карнай апэрацыі «Герман» пасьля паўстаньня ў Івянцы (19 ліпеня 1943) у вёсцы Баравікоўшчына нацысты зьняволілі каля 300 жыхароў мястэчка Пяршаі. Іх усіх зьбіраліся забіць. Ён далучыўся да людзей разам з ксяндзом Ахілесам Пухалам, сказаўшы:
«Пастухі ня могуць пакінуць вернікаў!»
У выніку з усіх арыштаваных былі забітыя толькі два сьвятары, потым гэстапа спаліла іхнія целы ў хляве. Затрыманых людзей адпусьцілі.
Сьвятарам гестапаўцы выкалалі вочы, вырвалі языкі, зьбілі дротам і прывезьлі ў гумно, наклалі дрэва і спалілі. Пазьней мясцовыя людзі знайшлі попел і косткі забітых і пазналі іх па мэдальёнах і крыжыках[2].
Месца расстрэлу забітых у Баравікоўшчыне было адзначана капліцай-сьвятыняй. Парэшткі пакутнікаў цяпер знаходзяцца ў рэліквіярыі ў касьцёле сьв. Юрыя ў Пяршаях.
Сьвятары-пакутнікі праявілі гераічную любоў да людзей, якіх выратавалі сваёй сьмерцю, таму а. Стэмпеня і а. Пухалу Папа Ян Павал II бэатыфікаваў разам зь іншымі 108 пакутнікамі Другой сусьветнай вайны.
Крыніцы рэдагаваць
- ^ а б Herman Stępień // GCatholic.org — 1997.
- ^ Галгофа пяршайскіх ксяндзоў, Працоўная слава, 18.07.2013
Літаратура рэдагаваць
- Oprac. Ewa Tarnasiewicz-Klimowska, ZE WZGÓRZA…, Nr 129, czerwiec 2005, Błogosławieni męczennicy franciszkańscy ISSN 1505-974X.