Валянтына Пашкевіч

Вікіпэдыя мае артыкулы пра іншых асобаў з прозьвішчам Пашкевіч.

Валянты́на Пашке́віч (дзяв. Жукоўская; 5 лютага 1916, Казельск, сёньня Калуская вобласьць, Расея — 25 сакавіка 2004) — беларускі пэдагог, грамадзкая і культурная дзяячка. Сястра Раісы Жук-Грышкевіч.

Валянтына Пашкевіч
Імя пры нараджэньні	Валянтына Мікалаеўна Жукоўская
Род дзейнасьці	Настаўніца
Дата нараджэньня	5 лютага 1916
Месца нараджэньня	Казельск, Калуская губэрня, Расейская імпэрыя
Дата сьмерці	25 сакавіка 2004
Месца сьмерці	Таронта, правінцыя Антарыё, Канада
Месца пахаваньня	Оквіл
Грамадзянства	Канада
Месца вучобы	Унівэрсытэт Стэфана Баторыя
Занятак	пэдагог, лексыкограф, грамадзкая дзяячка
Бацька	Мікалай Жукоўскі
Муж	Міхась Пашкевіч
Дзеці	Павал, Эва

Біяграфія

Нарадзілася ў радзіне выхадцаў зь Берасьцейшчыны. Скончыла гімназію імя Адама Міцкевіча ў Пружанах (1935), паступіла на клясычны факультэт Віленскага ўнівэрсытэту, праз два гады перавялася на фізыка-матэматычны факультэт. Брала актыўны ўдзел у Беларускім студэнцкім саюзе.

У Другую Сусьветную вайну жыла ў Бэрліне, працавала ў перакладніцкім бюро «Вінэта». Па капітуляцыі Нямеччыны апынулася ў Ватэнштэце (Ніжняя Саксонія), апекавалася беларускім скаўтынгам.

У ліпені 1949 пераехала ў Таронта, дзе праз год узяла шлюб з грамадзкім дзеячом М. Пашкевічам. Брала актыўны ўдзел у беларускім грамадзкім жыцьці, арганізавала й кіравала танцавальным гуртком. Кіравала беларускай суботняй школкай пры царкве сьв. Эўфрасіньні Полацкай.

Мае двох дзяцей: Паўлюка й Эву — і дзьве ўнучкі Ларысу й Галіну.

Працы

• Першая чытанка пасьля лемантара для беларускіх дапаўняльных школаў. — Кліўлэнд, 1968;
• Беларуская мова — Fundamental Byelorussian. — Toronto, 1974 (кніга 1), 1978 (кніга 2);
• Ангельска-беларускі слоўнік = English-Belarusian Dictionary: каля 30 000 словаў. — Менск, 2006. — 1028 с. ISBN 985-6783-15-1.