Царква Ўваскрасеньня Хрыстова (Антопаль)

Помнік сакральнай архітэктуры
Царква Ўваскрасеньня Хрыстова
Царква Ўваскрасеньня Хрыстова
Краіна	Беларусь
Мястэчка	Антопаль
Каардынаты	52°12′12″ пн. ш. 24°47′12″ у. д.
Канфэсія	Беларускі экзархат
Эпархія	Берасьцейская і Кобрынская япархія
Архітэктурны стыль	народнае дойлідзтва Беларусі[d]
Статус	Дзяржаўны сьпіс гісторыка-культурных каштоўнасьцяў Рэспублікі Беларусь
Царква Ўваскрасеньня Хрыстова на мапе Беларусі Царква Ўваскрасеньня Хрыстова
Царква Ўваскрасеньня Хрыстова на Вікісховішчы

Царква Ўваскрасеньня Хрыстова — помнік архітэктуры XIX стагодзьдзя ў Антопалі. Знаходзіцца ў цэнтры места, на гістарычным Рынку. Дзее. Твор традыцыйнай беларускай драўлянай архітэктуры з элемэнтамі стылю клясыцызму. Аб’ект Дзяржаўнага сьпісу гістарычна-культурных каштоўнасьцяў Беларусі.

Гісторыя

Царква, 1916 г.

Новую драўляную царкву ў Антопалі збудавалі ў 1854 годзе на месцы старой царквы за кошт уладальніка мястэчка князя Юльяна Гедройца паводле заказанага ім праекту, зацьверджанага ў 1852 годзе. У 1866 годзе перад царквой паставілі званіцу.

Архітэктура

Помнік традыцыйнай беларускай драўлянай архітэктуры з элемэнтамі стылю клясыцызму. Гэта прастакутны ў пляне 1-зрубны будынак пад 2-схільным дахам з вальмай над алтарнай часткай. Галоўны фасад вылучаецца стылізаваным 4-калённым портыкам, над франтонам якога ўзвышаецца купал на 8-гранным сьветлавым барабане. Такая ж вежачка (меншага памеру) месьціцца над апсыднай часткай. Вэртыкальна ашаляваныя сьцены рытмічна праразаюцца аркавымі аконнымі праёмамі ў кілепадобных ліштвах і брусамі-сьцяжкамі ў прасьценках.

Унутраная прастора падзяляецца чатырма калёнамі на тры нэфы і мае характар базылікі. Апсыда вылучаецца драўляным іканастасам XIX—XX стагодзьдзяў. Над уваходам месьцяцца кансольныя хоры. У інтэр’еры захоўваюцца абразы: XVII ст. — «Тройца», XVIII ст. — «Тройца новазапаветная», «Маці Божая Замілаваньне», «Маці Божая Адзігітрыя», «Маці Божая Адзігітрыя Чанстахоўская», «Спас Пантакратар», «Сьвяты Ільля», «Маці Божая Балесная», «Пакланеньне вешчуноў», «Спас з прадстаячымі», «Прарокі», «Сьвяты Стэфан» (1796), «Сьвяціцель» (1791), канца XIX ст. — «Аляксандар Неўскі», драўляныя скульптуры сьвятых.

Перад царквой стаіць драўляная 2-ярусная каркасная званіца пад шатровым дахам з купалам у завяршэньні. На могілках прыпісная цагляная капліца.

Літаратура

Аб’ект Дзяржаўнага сьпісу гісторыка-культурных каштоўнасьцяў Рэспублікі Беларусь, шыфр  113Г000181

• Кулагін А. Праваслаўныя храмы Беларусі: Энцыкл. даведнік. — Менск: Беларуская Энцыкляпэдыя, 2007.— 653 с.: іл. ISBN 978-985-11-0389-4.

Вонкавыя спасылкі

• Царква Ўваскрасеньня Хрыстова ў Антопалі, Radzima.org