Уку Мазінг
У́ку Ма́зінг (па-эстонску: Uku Masing), пры нараджэньні Хуга Альбэрт Мазінг (па-эстонску: Hugo Albert Masing; 11 жніўня 1909, хутар Ліпа Райкюльскай воласьці, Хар’юскі павет Эстляндзкай губэрні, Расейская імпэрыя — 25 красавіка 1985, Тарту, Эстонская ССР) — эстонскі філёзаф, перакладнік, тэоляг, фальклярыст, філёляг. Пачынальнік эстонскай аналітычнай філязофіі. Пісаў таксама вершы, у асноўным на рэлігійныя тэмы. Быў прызнаным дасьледнікам фальклёру, пісаў для міжнароднага даведніку Энцыкляпэдыя казак. Ляўрэат узнагароды Праведнікі народаў сьвету інстытуту Яд Вашэм (1969) за ўратаваньне жыдоў падчас Галакосту ў Эстоніі, прафэсар Тартускага ўнівэрсытэту.
| Уку Мазінг | |
| Uku Masing | |
 | |
| Асабістыя зьвесткі | |
|---|---|
| Імя пры нараджэньні | Хуга Альбэрт Мазінг |
| Нарадзіўся | 11 жніўня 1909[1][2][3] |
| Памёр | 25 красавіка 1985[1][2][3] (75 гадоў) |
| Пахаваны | |
| Літаратурная дзейнасьць | |
| Род дзейнасьці | філёзаф, перакладнік, тэоляг, фальклярыст, філёляг |
| Мова | італьянская мова, нямецкая, ангельская мова і эстонская мова[4] |
| Узнагароды | Праведнік народаў сьвету |
Жыцьцяпіс
рэдагавацьХуга Мазінг нарадзіўся на хутары Ліпа (цяпер вёска ў воласьці Райкюла Раплаўскага павету Эстоніі) ў эвангельскай сям’і. Паказаў выдатныя вынікі ў вывучэньні моваў і да сканчэньня сярэдняе школы размаўляў на чатырох мовах. У 1926 пачаў вывучаць тэалёгію ў Тартускім унівэрсытэце. У 1930 скончыў унівэрсытэт са ступеньню магістра багаслоўя па Старым Запавеце і сэміталёгіі. Працягнуў навучаньне ў Цюбінгене і Бэрліне.
З 1933 пачаў выкладчыцкую практыку ў Тартускім унівэрсытэце, выкладаў тэалёгію і сэміцкія мовы.
18 студзеня 1937 року зьмяніў уласнае імя Хуга Альбэрт на Уку. У 1939 ажаніўся з Эхай Туулемаа.
У пэрыяд нямецкай акупацыі Эстоніі сям’я Мазінгаў хавала ва ўласнай хаце жыдоўскага студэнта Ізідара Левіна, будучага доктара філялягічных навук і прафэсара фальклярыстыкі. За гэты ўчынак Уку і Эха Мазінгі былі ўганараваныя званьнем Праведнікаў народаў сьвету[5].
Па вайне савецкія ўлады закрылі факультэт тэалёгіі ў Тарту, і Уку Мазінг працаваў у розных месцах, перакладаў паэзію. Браў таксама ўдзел у расьсьледаваньні нацысцкіх злачынстваў, у прыватнасьці, у канцлягеры Клёага.
Дзейнасьць
рэдагавацьПублікавацца зь вершамі, перакладамі і эсэ пачаў падчас навучаньня ва ўнівэрсытэце.
У 1938 далучыўся да ўплывовай суполкі эстонскіх паэтаў «Чараўнікі», заснаванай Антсам Орасам, куды ўваходзілі Хэйці Тальвік, Бэці Альвер, Паўль Війдынг, Бэрнард Кангра, Аўгуст Санг і Керсты Мэрылаас.
Аўтар працаў па фальклёры народаў сьвету. Большую частку напісаных за савецкім часам твораў распаўсюджваў самвыдатам.
Уку Мазінг валодаў 65 мовамі і перакладаў з 20 зь іх, у прыватнасьці з старажытнага іўрыту, санскрыту, грэцкай, арабскай, шумерскай і іншых.
Ён напісаў столькі твораў, што нявыдадзеныя рукапісы ацэньваюцца ў 10 000 старонак. Вывучэньнем, захаваньнем і распаўсюджваньнем ягонага даробку займаецца адмыслова створаная Калегія па спадчыне Уку Мазінга.
Крыніцы
рэдагаваць- ^ а б Uku Masing // Eesti biograafiline andmebaas ISIK (эст.)
- ^ а б Uku Masing // Store norske leksikon (бук.) — 1978. — ISSN 2464-1480
- ^ а б Masing Uku (1909 - 1985 ) // The Righteous Among the Nations Database (анг.)
- ^ Bibliothèque nationale de France data.bnf.fr (фр.): плятформа адкрытых зьвестак — 2011.
- ^ Martin Gilbert. The Righteous: The Unsung Heroes of the Holocaust. — Henry Holt and Company, 2003. — С. 31. — ISBN 9780805062601
Вонкавыя спасылкі
рэдагаваць- Uku Masing — Writer, theologian, philologist (анг.). Estonian Ministry of Foreign Affairs. Праверана 3 лістапада 2012 г.
- Masing Family (анг.) The Righteous Among The Nations. Yad Vashem. Праверана 3 лістапада 2012 г.