Міхаіл Пташук

Міхаі́л Пташу́к (28 студзеня 1943, в. Федзюкі, Ляхавіцкі раён — 26 красавіка 2002, Масква) — беларускі кінарэжысэр, актор, прадусар.

Міхаіл Пташук
па-беларуску: Міхаіл Мікалаевіч Пташук
Дата нараджэньня	28 студзеня 1943(1943-01-28)
Месца нараджэньня	Федзюкі, Ляхавіцкі раён, Берасьцейская вобласьць, Беларусь
Дата сьмерці	26 красавіка 2002(2002-04-26) (59 гадоў)
Месца сьмерці	Масква, Расея
Прычына сьмерці	дарожна-транспартнае здарэньне
Месца пахаваньня	Усходнія могілкі
Месца вучобы	Тэатральны інстытут імя Барыса Шчукіна[d] (1967) Вышэйшыя курсы для сцэнарыстаў і рэжысэраў[d]
Занятак	кінарэжысэр, сцэнарыст
Месца працы	Беларусьфільм
Сябра ў	Саюз кінэматаграфістаў СССР[d]
Узнагароды
IMDb	ID nm0699675

Скончыў рэжысэрскі факультэт Тэатральнай вучэльні імя Барыса Шчукіна (1967), Вышэйшыя рэжысэрскія курсы Дзяржкіно СССР (1972; майстэрня Георгія Данэліі). Працаваў рэжысэрам у тэатрах Масквы і Казані. З 1974 на кінастудыі «Беларусьфільм». Сябра КПСС (з 1978). Загінуў у аўтакатастрофе.

Атрымалі шырокую вядомасьць яго экранізацыі вядомых літаратурных твораў беларускіх пісьменьнікаў — «Вазьму твой боль» (паводле Івана Шамякіна, 1982), «Чорны замак Альшанскі» (2 сэрыі, паводле Ўладзімера Караткевіча, 1983), «Знак бяды» (паводле Васіля Быкава, 1986). Сярод фільмаў канца 1980—1990-х — гістарычна-палітычныя стужкі «Наш браняпоезд» (1988), «Каапэратыў „Палітбюро“» (1992), «У жніўні 44-га…» (2000). Паставіў тэлевізійны фільм «Нас выбраў час» (1978), фільм-спэктакль Менскага тэатру «Вольная сцэна» «Макбет» (1997).

Работы М. Пташука неаднаразова атрымлівалі высокія ўзнагароды на прэстыжных кінафэстывалях. Для яго творчай манеры ўласьцівы абвостраная ўвага да складаных гістарычна-філязофскіх праблем, псыхалягічная заглыбленасьць, упэўненасьць рэжысэрскага почырку і да т. п.

Заслужаны дзеяч мастацтваў БССР (1982). Народны артыст БССР (1990). Дзяржаўная прэмія БССР (1982) за экранізацыю раману І. Шамякіна «Вазьму твой боль»; прэмія Ленінскага камсамолу (1980) за кінафільм паводле твору У. Халіпа і А. Петрашкевіча «Время выбрало нас».

Загінуў у аўтамабільнай катастрофе ў Маскве — па дарозе на атрыманьне кінапрэміі Ніка.

Фільмаграфія

• 1973 — «Пра Віцю, пра Машу і марскую пяхоту» (сцэнар — А. Усаў, апэратар — Ю. Кліменка);
• 1975 — «Лясныя арэлі» (сцэнар — І. Пяткевіч, апэратар — Ю. Марухін);
• 1978 — «Час выбраў нас» (сцэнар — А. Петрашкевіч, У. Халіп, апэратары — Ю. Марухін (1—2 сэрыі), В. Нікалаеў);
• 1980 — «Вазьму твой боль» (сцэнар — І. Шамякін, апэратар — В. Нікалаеў);
• 1984 — «Чорны замак Альшанскі»;
• 1986 — «Знак бяды»;
• 1988 — «Наш бронецягнік» (сцэнар — Я. Грыгор’еў, апэратар — Ю. Ялхоў);
• 1992 — «Каапэратыў „Палітбюро“» (сцэнар — Я. Грыгор’еў, апэратар — С. Мачыльскі);
• 1995 — «Гульня ўяўленьня» (сцэнар — Э. Брагінскі, апэратар — В. Спарышкоў);
• 1995 — «Макбэт» (сцэнар — А. Дудараў, апэратар — В. Спарышкоў);
• 2000 — «У жніўні 44-га…» (сцэнар — У. Багамолаў, апэратар — В. Спарышкоў);
• 2001 — «Песьня Розы» (сцэнар — В. Сакалоўскі, апэратар — Д. Гучыарда).

Вонкавыя спасылкі

• Міхаіл Пташук (анг.) на сайце IMDb