Касьцёл Сьвятой Кацярыны (Заграб)

касьцёл
Касьцёл Сьвятой Кацярыны харв. Crkva sv. Katarine
Краіна	Харватыя
Месцазнаходжаньне	Заграб
Каардынаты	45°49′09″ пн. ш. 15°58′09″ у. д.
Канфэсія	каталіцтва
Эпархія	Заграбская архідыяцэзія[d]
Архітэктурны стыль	барока
Дата заснаваньня	1632
Будаваньне	1620—1632 гады
Касьцёл Сьвятой Кацярыны на мапе Харватыі Касьцёл Сьвятой Кацярыны
Касьцёл Сьвятой Кацярыны на Вікісховішчы

Касьцёл Сьвятой Кацярыны (па-харвацку: Crkva sv. Katarine u Zagrebu) — касьцёл ў Заграбу, Харватыя, катэдра Заграбскае архіяпархіі. Помнік архітэктуры барока, лічыцца адным з найпрыгажэйшых храмаў Заграбу. Асьвечаны ў гонар Сьвятой Кацярыны.

Разьмешчаны ў цэнтры гораду — у Верхнім горадзе, на пляцы Сьвятой Кацярыны.

Гісторыя

На месцы сучаснага касьцёлу Сьвятой Кацярыны з XIV стагодзьдзя існаваў дамініканскі касьцёл, які падчас турэцкага ўварваньня выкарыстоўваўся ў якасьці вайсковага складу.

У першай палове XVII стагодзьдзя быў перададзены езуітам. Паколькі касьцёл быў у занядбаным стане, езуіты пабудавалі на яго месцы ў 1620-32 гадох новы. Касьцёл цалкам згараў пры пажарах у 1645 і 1674 гг., але дзякуючы харвацкім магнатам, быў адбудаваны наноў.

Пасьля забароны езуітаў (1773 г.) касьцёл Сьв. Кацярыны быў перададзены ў 1783 г. у склад парафіі Сьвятога Марка, а з 1874 году стаў катэдрай. У ХІХ-XX стагодзьдзях неаднаразова рэканструяваўся.

Апісаньне

Касьцёл — аднанэфавае збудаваньне з шасьцю бакавымі капліцамі і апсыдай. У капліцах разьмешчаны пяць драўляных алтароў (XVII стагодзьдзе) і адзін мармуровы (1729 год). Інтэр’еры ўпрыгожаны карцінамі Бэрнарда Бобіча і Антоніё Куадрыё. Скляпеньні нэфу са сцэнамі з жыцьця Сьвятой Кацярыны належаць аўтарству Джуліё Куальі, а алтар Сьвятога Ігната — Франчэска Робба.

Галерэя

Інтэр’ер касьцёлу	Алтар Сьв. Ігната Ляёлы	Алтар Сьвятога Духа	Фрагмэнты скляпеньняў

Вонкавыя спасылкі

Касьцёл Сьвятой Кацярыны (Заграб) — сховішча мультымэдыйных матэрыялаў

• Касьцёл Сьвятой Кацярыны ў Заграбу www.zagreb-touristinfo.hr