Касьцёл Найсьвяцейшай Панны Марыі (Рэпля)

Помнік сакральнай архітэктуры
Касьцёл Найсьвяцейшай Панны Марыі
Касьцёл Найсьвяцейшай Панны Марыі
Краіна	Беларусь
Вёска	Рэпля
Каардынаты	53°18′38″ пн. ш. 24°12′11″ у. д.
Канфэсія	каталіцтва
Эпархія	Гарадзенская дыяцэзія
Архітэктурны стыль	нэаготыка
Аўтар праекту	Іван Плотнікаў[d]
Касьцёл Найсьвяцейшай Панны Марыі на мапе Беларусі Касьцёл Найсьвяцейшай Панны Марыі

Касьцёл Найсьвяцейшай Панны Марыі — помнік архітэктуры пачатку XX стагодзьдзя ў Рэплі. Знаходзіцца ва ўсходняй частцы колішняга мястэчка. Дзее. Твор архітэктуры нэаготыкі.

Гісторыя

Касьцёл, да 1945 г.

Вялікае Княства Літоўскае

Першы драўляны касьцёл у Рэплі збудавалі ў 1632 годзе. У 1730 годзе з фундацыі князя Міхала Юзэфа Масальскага збудавалі новы драўляны касьцёл.

Пад уладай Расейскай імпэрыі

Касьцёл. А. Канстанцінаў, 1915 г.

Па трэцім падзеле Рэчы Паспалітай (1795 год), калі Рэпля апынулася ў складзе Расейскай імпэрыі, касьцёл працягваў дзеяць. У 1850 годзе будынак адраманатавалі.

У 1902—1908 гадох у Рэплі збудавалі мураваны касьцёл. Будынак касьцёла пацярпеў у час Першай сусьветнай вайны.

Найноўшы час

Па вайне будынак касьцёла аднавілі. За савецкім часам касьцёл не зачыняўся.

Архітэктура

Помнік архітэктуры нэаготыкі. Гэта 3-нэфавая 2-вежавая базыліка з прастакутнай апсыдай і дзьвюма закрысьціямі. Цэнтральная частка галоўнага заходняга фасада завяршаецца прыступкавым шчытом з шэрагам пінакляў. Падобны шчыт разьмяшчаецца над апсыдай. Вежы 2-ярусныя, першы ярус чацьверыковы, другі — васьмігранны, завершаныя шатром. У цэнтры фасада месьціцца галоўны ўваход, дэкараваны прыступкавым франтонам, над уваходам — акно-ружа. Бакавыя фасады маюць стальчатыя аконныя праёмы, паміж імі разьмяшчаюцца контрфорсы.

Усярэдзіне нэфы падзяляюцца стальчатымі аркавымі праёмамі, перакрыцьце — цыліндрычныя скляпеньні з крыжовымі нэрвюрамі. У інтэр'еры захоўваюцца абразы пачатку XIX ст. «Сьвятая Сям'я» і «Сьвяты Казімер».

Касьцельны пляц атачаецца агароджай з бутавага каменю, галоўны ўваход праз 3-пралётную брамай з чырвонай цэглы. У куту агароджы капліца ў адзіным з касьцёлам архітэктурным стылі.

Галерэя

• Сучасныя здымкі
• 
  Брама
• 
  З боку апсыды
• 
  Інтэр'ер
• 
  Капліца

Літаратура

• Архітэктура Беларусі: Энцыклапедычны даведнік. — Менск: Беларус. энцыкл., 1993. — 620 с.: іл. ISBN 5-85700-078-5.
• Кулагін А. Каталіцкія храмы Беларусі: Энцыкл. даведнік / А. Кулагін; фатограф А. Дыбоўскі. — 2-е выд. — Менск: БелЭн, 2008. — 488 с.: іл. ISBN 978-985-11-0395-5.

Вонкавыя спасылкі

• Касьцёл Найсьвяцейшай Панны Марыі ў Рэплі, Radzima.org