Чараўніцы

«Чараўні́цы» — беларускі жаночы музычны калектыў (ВІА), што выступаў у савецкі час (1971—1991).

Чараўніцы
Гады	1971—1991 2011 — дасюль
Краіна	Беларусь
Месца ўтварэньня	Беларусь
Мова	беларуская, расейская
Жанр	поп, джаз, рок
Выдавец	Мэлёдыя
charovnicy.by

Утвораны ў 1971 годзе Генадзем Летынскім на базе гарадзенскага ДК Тэкстыльшчыкаў. Удзельніцы групы — выпускніцы Гарадзенскай музычнай вучэльні. З 1974 году прыняты ў штат Белдзяржфілярмоніі.

Рэпэртуар складаўся зь беларускіх народных песень, сучаснай папулярнай музыкі. Удзельніцы ВІА адрозьніваліся выдатнымі вакальнымі дадзенымі, валоданьнем харэаграфіяй і многімі музычнымі інструмэнтамі.

Ляўрэат 6-га Ўсесаюзнага конкурсу артыстаў эстрады 1979 году. Падчас таго выступу зламаліся абедзьве гітарныя калёнкі. Музыкі пад клявішы і ўдарныя скончылі кампазыцыю, а дудкі выканалі свой пройгрыш. Усё гэта спалучалася з танцам. Журы, пад старшынствам Аркадзя Райкіна, апладзіравала стоячы, а Ёсіф Кабзон сказаў: «Вы нас проста зачаравалі».

«Чараўніцы» пасьпяхова гастралявалі ня толькі па Беларусі, але і па гарадах СССР, а таксама пабывалі ў Вугоршчыне і НДР, выступалі перад савецкімі салдатамі ў Аўганістане.

У 1989 годзе «Чараўніцы» адзіны беларускі калектыў, які абралі для ўдзелу ў культурнай праграме 13-га Сусьветнага фэстывалю моладзі і студэнтаў, які праходзіў у Пхэньяне. Пад акампанэмэнт маскоўскага аркестру гурт выканаў папуры на джазавыя тэмы Глена Мілера. Неўзабаве ў Маскве ў канцэртнай зале «Расея» зь велізарным аншлягам прайшоў сольны канцэрт «Чараўніц».

У 1991 годзе калектыў спыніў сваё існаваньне. За гады сваёй дзейнасьці яго склад неаднаразова мяняўся.

Упершыню пасьля доўгага перапынку «Чараўніцы» сабраліся і выступілі ў 2011 годзе, на сольным канцэрце Надзеі Мікуліч. З гэтага моманту было вырашана аднавіць творчую дзейнасьць. Калектыў запісаў новыя песьні, выступаў з канцэртамі, здымаў кліпы.

З ансамблем супрацоўнічалі такія вядомыя кампазытары, як Юры Семяняка, Ігар Лучанок, Эдуард Ханок, Уладзімер Мулявін, Яўген Глебаў, Алег Елісеенкаў. Фірмай «Мэлёдыя» было выпушчана некалькі кружэлак.

Склад

Бягучы склад

• Людміла Навумовіч, вакал, дырэктар (з 1980)
• Вольга Макушынская, вакал, музычны кіраўнік (з 1986)
• Паліна Базылева, вакал (з 2012)
• Ганна Церахава, саксафон (з 2012)
• Людміла Пасмурцава, труба, шэйкер, мастацкі кіраўнік (з 1980)
• Сьвятлана Рагула, саксафон (з 1986)

Дыскаграфія

На фірме «Мелёдыя» было выпушчана некалькі кружэлак:

• 1979, фірма «Мэлёдыя», Рыскі завод, С 60-11063-64

Першы бок:

1. Я зачарована табой (У. Буднік — У. Някляеў)
2. Не за вочы чорныя (Юры Семяняка — Адам Русак)
3. Ты ўспомні ўсё (Ігар Лучанок — Аркадзь Куляшоў)
4. Я чакаю цябе (У. Буднік — В. Пятроў)

Другі бок:

1. Ручаёчак, ручаёк (Б. Фёдараў — Н. Тулупава)
2. Я не магу пра Вас забыцца (Ігар Лучанок — П. Броўка)
3. Пацалунак (Ігар Лучанок — Уладзімер Карызна)
4. На новае лета (беларуская нар. песьня)
5. Удзень, уночы (Б’ёрн Ульвэўс, Бэні Андэрсан — расейскі тэкст У. Жукава)

• 1982, фірма «Мэлёдыя», Ленінградзкі завод, С62-18751-004, працягласьць: 00:12:42 (міньён)

Першы бок:

1. Музыка (Э. Зарыцкі — Уладзімер Карызна, апрацоўка А. Бурнштэйна)
2. Неделька (расейская народная песьня, апрацоўка А. Архіпава)

1. Такі сон (Э.Зарыцкі — Д.Бядуля)
2. Пах чабаровы (У. Буднік — К. Кірыенка)

Літаратура

• Д.П. «ЧАРАЎНІЦЫ» // Энцыклапедыя беларускай папулярнай музыкі (бел.) / уклад. Дз. Падбярэзскі і інш. — Мінск: Зміцер Колас, 2008. — С. 329–330. — 368 с. — 2000 ас. — ISBN 978-985-6783-42-8

Вонкавыя спасылкі

• Удзельніца вакальна-інструмэнтальнага ансамбля «Чараўніцы» з гітарай