Уладзімер Уладзімеравіч Мацкевіч
- Вікіпэдыя мае артыкулы пра іншых асобаў з прозьвішчам Мацкевіч.
Уладзімер Уладзімеравіч Мацкевіч (14 траўня 1956, г. Чарамхова, Іркуцкая вобласьць, РСФСР) — грамадзка-палітычны дзеяч, філёзаф, палітоляг, распрацоўшчык канцэпцыі рэформы адукацыі, аўтар каля 50 навуковых прац, старшыня Рады міжнароднага кансорцыюма «ЭўраБеларусь(be)». Паводле адукацыі псыхоляг. Выбарчая акруга — Ангарская.
| Уладзімер Мацкевіч | |
 | |
| Кіраўнік Рады міжнароднага кансорцыюму "ЭўраБеларусь" | |
|---|---|
| Асабістыя зьвесткі | |
| Нарадзіўся: |
14 траўня 1956 (68 гадоў) г. Чарамхова, Іркуцкая вобласьць, РСФСР |
| Партыя: | |
| Адукацыя: | |
Жыцьцяпіс
рэдагавацьПаходзіць зь сям’і рэпрэсаваных беларусаў, якія былі высланыя ў Сыбір пасьля Другой сусьветнай вайны. Нарадзіўся ў 1956 годзе ў Іркуцкай вобласьці Расеі. Празь дзесяць гадоў сям’я пераехала ў Горадню, дзе хлопец і скончыў школу. Працаваў фрэзэроўшчыкам на заводзе карданных валоў у Горадні. Потым служыў у войску ў Закарпацкай вобласьці Ўкраіны. Пасьля паступіў у Ленінградзкі дзяржаўны ўнівэрсытэт на псыхоляга, у час вучобы зблізіўся з Маскоўскім мэтадалягічным гуртком.
Да 1994 году Мацкевіч жыў то ў Ленінградзе, то ў Вільні, то ў Рызе, то ў Маскве. Потым прыехаў у Беларусь, дзе праз год атрымаў беларускае грамадзянства.
У 1990-я гады шчыльна супрацоўнічаў зь Міністэрствам адукацыі. У пэрыяд між 1997 і 2001 гадамі ўзначальваў цэнтар мэтадалёгіі Рэспубліканскага інстытуту прафэсійнай адукацыі (РІПА). У 1999–2000 гадах Мацкевіч браў актыўны ўдзел у дыялёгу грамадзка-палітычных сілаў, які адбываўся пад эгідай АБСЭ. Пасьля гэтага ён страціў працу ў сыстэме дзяржаўнай адукацыі.
У 2003 годзе Мацкевіча нечакана запрасілі весьці ток-шоў «Выбар» на тэлеканале АНТ. Яго праца доўжылася там толькі 9 выпускаў, і пасьля тэмы пра беларускую мову, дзе многія гледачы выказаліся за больш шырокі ўжытак нацыянальнай мовы, Мацкевіча звольнілі.
Мацкевіч падтрымаў стварэньне аргкамітэту Беларускай хрысьціянскай дэмакратыі. Адной з апошніх палітычных ініцыятываў стала кампанія ў падтрымку незалежнасьці Беларусі «Сьвежы вецер». Яна ўзьнікла ў адказ на актыўнае абмеркаваньне і падпісаньне інтэграцыйных «карт» паміж Расеяй і Беларусьсю. У сьнежні 2019 году падчас масавых акцый супраць інтэграцыі актывісты кампаніі «Сьвежы вецер» ініцыявалі жывыя ланцугі ў цэнтры Менску.
Мацкевічу належыць ідэя Лятучага ўнівэрсытэту — некалькі дзясяткаў курсаў лекцый ад вядомых у Беларусі мысьляроў.
Арышт
рэдагаваць4 жніўня 2021 году пасьля ператрусу арыштаваны КДБ Беларусі па падазрэньні ў арганізацыі пратэстаў[1]. 6 жніўня сумеснаю заяваю васьмі арганізацыяў, сярод якіх «Вясна», Беларуская асацыяцыя журналістаў, Беларускі Хэльсінскі камітэт, быў прызнаны палітычным вязьнем[2][3], а група «Хрысьціянская візія» Каардынацыйнай рады зьвярнулася да беларускай і сусьветнай хрысьціянскай супольнасьці з заклікам выступіць у ягоную падтрымку.[4]
Галадоўка ў СІЗО
рэдагавацьАд 3 лютага 2022 году абвясьціў галадоўку ў сьледчым ізалятары №1 у Менску. Ён патрабаў зьмены меры стрыманьня на не зьвязаную са зьняволеньнем, завяршэньня сьледзтва ў ягонай справе і прызначэньня даты суду. Мацкевіч паведамляў, што першыя дзесяць дзён «будзе галадоўка на вадзе», а калі па сканчэньні гэтага тэрміну патрабаваньні ня выканаюць, тады гатовы перайсьці да «сухой галадоўкі»[5].
15 лютага зьняволены філёзаф і мэтадоляг Уладзімер Мацкевіч пачаў сухую галадоўку, паколькі ўлады ня выканалі ягоных патрабаваньняў. Ад «кансультацыі» турэмнага псыхоляга ён адмовіўся: лічыць, што няма прычын зь ёй размаўляць, бо ад яе не залежыць выкананьне ягоных патрабаваньняў. 16 лютага яго двойчы агледзеў лекар СІЗА. Мацкевіч адчуваў слабасьць, страціў больш за 7 кіляграмаў вагі з моманту пачатку галадоўкі. Пастара і лекара (не з сыстэмы МУС) да палітвязьня не дапусьцілі[6].
23 чэрвеня 2022 году Менскі абласны суд прысудзіў Мацкевічу пяць гадоў калёніі ўзмоцненага рэжыму. Філёзафу паставілі ў віну «грубае парушэньне грамадзкага парадку» падчас пратэстнай акцыі ў Менску 25 кастрычніка 2020 года.
4 лютага 2023 году яго зьмясьцілі на тры месяцы зьмясьцілі ў памяшканьне камэрнага тыпу (ПКТ) шклоўскай калёніі № 17[7] .
Асабістае жыцьцё
рэдагавацьАктыўны вернік, пратэстант кальвінісцкага толку. У 2006 годзе філёзаф далучыўся да посту-галадоўкі вернікаў царквы «Новае жыцьцё», у якіх забіралі будынак. Тады ўлады пакінулі іх у спакоі.
Крыніцы
рэдагаваць| Вікіцытатнік зьмяшчае збор цытатаў, датычных тэмы артыкула: |
- Персона. Владимир Мацкевич: страна на военном положении
- Имена. Международный консорциум «ЕвроБеларусь».
- ^ Арина Ползик. (2021-08-12) Философ в неволе. Кто такой Владимир Мацкевич и в чем его подозревают? (рас.). Нямецкая хваля. Архіўная копія ад 2021-08-12 г.
- ^ Павел Мыльников. (2021-08-06) Правозащитники Беларуси признали философа Мацкевича политзаключенным (рас.). Нямецкая хваля. Архіўная копія ад 2021-08-08 г.
- ^ Заява аб прызнанні Таццяны Вадалажскай і Уладзіміра Мацкевіча палітзняволенымі (бел.). Вясна (2021-08-06). Архіўная копія ад 2021-08-09 г.
- ^ Група «Хрысьціянская візія» Каардынацыйнай рады Беларусі (2021-10-10) Заявление группы Координационного совета «Христианское видение» по поводу уголовного преследования христианско-реформатского интеллектуала Владимира Мацкевича (рас.) Царква і палітычны крызіс у Беларусі
- ^ Філёзаф Уладзімер Мацкевіч у СІЗА перайшоў на сухую галадоўку. Ён схуднеў на 7 кіляграм, адчувае слабасьць, Радыё Свабода, 15 лютага 2022
- ^ Схуднеў на 7 кіляграм, адчувае слабасьць. Апошнія навіны пра галадоўку палітвязьня Мацкевіча, Рады1ё Свабода, 15 люты 2022
- ^ Палітвязьня філёзафа Мацкевіча зьмясьцілі ў ПКТ на тры месяцы
Вонкавыя спасылкі
рэдагавацьУ іншым моўным разьдзеле існуе паўнейшы артыкул на гэтую тэму: «Уладзімір Уладзіміравіч Мацкевіч» (бел.) Вы можаце дапамагчы Вікіпэдыі, пашырыўшы гэты артыкул з дапамогай перакладу. Для дадатковай інфармацыі націсьніце [Разгарнуць].
|