Ленінскі (Берасьцейская вобласьць)
Ле́нінскі[2](Гатэчына) — пасёлак у Жабінкаўскім раёне Берасьцейскай вобласьці. Ленінскі ўваходзіць у склад і зьяўляецца цэнтрам Ленінскага сельсавету.
| Ленінскі | |
| трансьліт. Lieninski | |
._%D0%91%D1%80%D0%BE%D0%B2%D0%B0%D1%80._1904_(03).jpg)
| |
| Краіна: | Беларусь |
| Вобласьць: | Берасьцейская |
| Раён: | Жабінкаўскі |
| Сельсавет: | Ленінскі |
| Насельніцтва | |
| колькасьць: | 1781 чал. (2015) |
| колькасьць двароў: | 728 |
| Часавы пас: | UTC+3 |
| Тэлефонны код: | +375 1641 |
| Паштовы індэкс: | 225111[1] |
| СААТА: | 1225815026 |
| Нумарны знак: | 1 |
| Геаграфічныя каардынаты: | 52°9′55.64″ пн. ш. 24°6′31.10″ у. д. / 52.1654556° пн. ш. 24.1086389° у. д.Каардынаты: 52°9′55.64″ пн. ш. 24°6′31.10″ у. д. / 52.1654556° пн. ш. 24.1086389° у. д. |
Ленінскі на мапе Беларусі ±   Ленінскі | |
 Галерэя здымкаў у Вікісховішчы
| |
Гісторыя
рэдагавацьГатэчына (Гатачызна, Ацячызна), таксама Гатаўшчызна-Зьдзітавец згадваецца ў дакумэнтах Вялікага Княства Літоўскага з 2-й паловы XVII ст. як шляхецкі двор роду Фядзюшкаў. З XVIII ст. Гатэчына належыць роду Сяклюцкіх, затым маёнтак пераходзіць ва ўласнасьць князёў Бельскіх. З таго часу і да 1939 г. Бельскія былі пастаяннымі ўладальнікамі Ацячызны. Апошнім яе гаспадаром быў Эдвард Бельскі.
У маёнтку меўся стары драўляны дворак, пабудаваны пры Бельскіх у XVIII ст. Аднапавярховы, з высокім чатырохсхільным гонтавым дахам, ён меў форму доўгага простакутніка. З боку галоўнага ўваходу меўся невялікі ганак на чатырох драўляных слупах, на якія абапіраўся трохкутны шчыток. У 2-й палове XIX ст. Ксавэры Бельскі дабудаваў да левага крыла палацу чатыры службовыя пакоі.
Сядзібны дом меў шырокія сені і 13 пакояў. Рэпрэзэнтыўныя пакоі месьціліся ў правым крыле. У доме стаяла мэбля ў стылі Людовіка XV, на сьценах разьмяшчаліся ўнікальныя карціны, у прыватнасьці «Сьвятая сям’я» Рубэнса (верагодна — не арыгінал), два палатны мастака Граўза і палатно мастака Тэнірса «Два рыбакі зь сеткай». У вялікім сталовым пакоі вісела таксама шмат карцінаў, у тым ліку 15 партрэтаў прадстаўнікоў роду Бельскіх. Увесь гэты каштоўны збор мастацкіх твораў быў абрабаваны нямецкімі войскамі ў 1915 г.
Палац стаяў сярод маляўнічага старажытнага парку плошчай каля 20 га. Новую кампазыцыйную пляніроўку парку зрабіў у 1910 г. архітэктар Франсуа Шэнье. У непасрэднай блізкасьці ад палацу парк меў шэраг баскетаў, абкружаных стрыжанымі дрэвамі і кустамі. Перад домам разьмяшчаўся велізарны газон, побач рос старажытны (700—800 гадоў) дуб, далей 2 альтанкі, абсаджаныя 250-гадовымі каштанамі і вельмі старымі ліпамі, некалькі прагулачных кляновых і ліпавых алей. Асаблівую прыгажосьць парку надавалі каналы і сажалка.
Палацава-паркавы ансамбль моцна пацярпеў у гады 1-й і 2-й сусьветных войнаў, а падчас апошняй вайны палац быў спалены. У савецкія часы парк прыйшоў у заняпад. Сёньня плошча рэшткаў парку складае некалькі гектараў. Захаваліся старажытны дуб і частка дрэвастою лісьцевых парод.
Старажытны дуб у парку мае вышыню каля 25 м пры дыямэтры ствала 2,6 м. Зьяўляецца адным з найбольш самых старых у парках Беларусі і абвешчаны помнікам прыроды. Яго крона — шацёр у памеры 30×26 м.
Парк узяты на ўлік і пад ахову дзяржавы.
З 1905 г. у маёнтку Бельскіх працаваў бровар. Цяпер ён належыць СВК «Рагазьнянскі».
Насельніцтва
рэдагавацьУ 1816 г. у Гатэчыне жылі 112 сялянскіх сямей, у 1845 г. — 461 селянін. Згодна з устаўной граматай 1862 г., у маёнтку засталося 80 дваровых людзей; 410 былых прыгонных атрымалі волю ад памешчыка I. Бельскага бяз выкупу. Паводле перапісу 1897 г. Гатэчына (Ацячызна) складалася зь сядзібы і будкі № 18 пры Маскоўска-Варшаўскай шашы, дзе агулам жылі 48 чалавек.
- 1999 год — 1677 чалавек
- 2010 год — 1705 чалавек
- 1 студзеня 2015 году — 1781 чалавек, 728 прыватных гаспадарак[3]
Інфраструктура і сацыяльныя аб’екты
рэдагавацьУ аграгарадку Ленінскі знаходзіцца сядзіба СВК «Рагазьнянскі», існуе фэрмэрская гаспадарка «АтэчызнаАгра», вырабляе мёд на продаж пчаляр-прыватнік.
У аграгарадку дзейнічаюць таксама[3]:
- філіялы ААТ «Беларусбанк»,
- аддзяленьне паштовай сувязі,
- Дом культуры,
- сярэдняя школа,
- ясьлі-сад,
- крама,
- амбуляторыя,
- комплексны прыёмны пункт.
У Ленінскім таксама працуе дзіцячая школа мастацтваў (адна зь дзьвюх у Жабінкаўскім раёне), народны ансамбль «Музычны вянок». У траўні 2014 году з ініцыятывы пэдагогаў дзіцячай школы мастацтваў у аграгарадку Ленінскі ўпершыню ў Жабінкаўскім раёне ладзіўся творчы конкурс эстраднай песьні «Мы сьпяваем» для выканаўцаў ва ўзросьце ад 6 да 18 гадоў.[4]
Крыніцы
рэдагаваць- ^ Белпошта
- ^ Назвы населеных пунктаў Рэспублікі Беларусь: Брэсцкая вобласць: нарматыўны даведнік / І. А. Гапоненка і інш.; пад рэд. В. П. Лемцюговай. — Менск: Тэхналогія, 2010. — 319 с. ISBN 978-985-458-198-9. (pdf, djvu, online) С. 129
- ^ а б Ленинский сельсовет
- ^ Анатоль Ростаў. Чым культурная ніва багатая? // Сельская праўда, 5 сакавіка 2015 г.
Вонкавыя спасылкі
рэдагаваць
Ленінскі (Берасьцейская вобласьць) — сховішча мультымэдыйных матэрыялаў