Замкавая вуліца (Горадня)

Вуліца Замкавая — вуліца ў цэнтральнай частцы Горадні.

Назва гістарычная. Даўжыня — 360 м.

Праходзіць ад Савецкай плошчы да Старога і Новага замкаў.

Перасякаецца з вуліцай вуліцы Давыда Гарадзенскага.

Гісторыя

Адна з найбольш старажытных вуліц Горадні. Праўдападобна, існавала яшчэ ў 12 ст., як дарога ад дзядзінца да гандлёва-рамеснага пасаду.

Дакумэнтальна ўзгадваецца упершыню 1530-х-1540-х гадах у актавых кнігах гарадзенскага гродзкага суду.

У пэрыяд Новага часу Замкавую вуліцу галоўным чынам насялялі жыды. У сярэдзіне 16 ст. яны валодалі 14 з 16 існуючых пляцаў. Выключэньнем былі пляцы, што ляжалі бліжэй Рынку.

У рэвізіі 1680 было зафіксавана 17 пляцаў Замкавай вуліцы.

Паралельна з назвай Замкавая вуліца насіла другую назву - вуліца Жыдоўская з рынку да замку. Раней побач з вуліцай праходзілі дзьве вуліцы з падобнымі назвамі - вуліца Цесная Жыдоўская і вуліца Школьная Жыдоўская, якія не захаваліся.

Цікавыя аб'екты

• Стары замак (Гарадзенскі гісторыка-археалягічны музэй);
• Новы замак (Гарадзенскі гісторыка-археалягічны музэй, Гарадзенская абласная бібліятэка імя Я. Карскага);
• былы палац Храптовічаў (Гарадзенскі музэй гісторыі рэлігіі);
• былая пажарная частка з пажарнай вежай (Гарадзенскі музэй гісторыі пажарнай службы);
• Помнік Вітаўту Вялікаму;
• Помнік ахвярам Гарадзенскага ґета;
• пры сутыку з Савецкай плошчай - месца ўзарванай камуністамі Фары Вітаўта (цяпер сквэрык).

Літаратура

Аб’ект Дзяржаўнага сьпісу гісторыка-культурных каштоўнасьцяў Рэспублікі Беларусь, шыфр  412Г000014

• Гродно. Энциклопедический справочник / Белорус. Сов. Энцикл.; Редкол.: И.П. Шамякин (гл.ред.) и др. — Мн.: БелСЭ, 1989. — 438 с., [12] л. ил.: ил., с. 220
• Ю.Гардзееў. Магдэбургская Гародня. Гародня-Wrocław, 2008, с 125-132