Гаўр

Гаўр (па-француску: Le Havre) — горад на поўначы Францыі, месьціцца ў дэпартамэнце Прыморская Сэна рэгіёну Нармандыя. Гаўраўскі порт ёсьць адным з найбуйнейшых у Францыі. Насельніцтва складае 170 352 чалавекі, паводле дадзеных на 2016 год.

Гаўр
Le Havre
Герб Гаўра
Рэгіён:	Нармандыя
Дэпартамэнт:	Прыморская Сэна
Плошча:	46,95 км²
Насельніцтва:	170352 (2016)
Часавы пас: • летні час:	UTC+1 UTC+2
Паштовы індэкс:	76600, 76610, 76620
Геаграфічныя каардынаты:	49°29′24″ пн. ш. 0°06′00″ у. д.
Гаўр на мапе Францыі Гаўр
Галерэя здымкаў у Wikimedia Commons
http://www.ville-lehavre.fr

Геаграфія

Гаўр разьмешчаны на правым беразе Сэны. Да 1 студзеня 2016 Гаўр знаходзіўся ў складзе рэгіёну Верхняя Нармандыя, і рака аддзяляла гэты горад ад рэгіёну Ніжняя Нармандыя і суседняга гораду Анфлёр. На поўнач і на захад ад Гаўра знаходзіцца ўзьбярэжжа праліву Па-дэ-Кале.

Гісторыя

Гаўр — адзін з маладых гарадоў Францыі. Пры заснаваньні адміралам Гіёмам Гуф’е(en) ў 1517 годзе ён быў названы Францыскопалем (франц. Franciscopolis) у гонар караля Францыска I. Пасьля быў ​​перайменаваны ў Гаўр-дэ-Грас («прасьвядная гавань»). У 1562 годзе гугеноты перадалі горад ангельцам, але ўжо праз 2 гады ён вярнуўся да Францыі.

Да 1572 году горад стаў значным гандлёвым цэнтрам, адкуль накіроўваліся караблі да Ньюфаўндлэнду й Шпіцбэргену для лоўлі трэскі й кітоў. Да XVIII стагодзьдзя порт Гаўра стаў другім па велічыні ў Францыі пасьля Нанта.

Падчас Другой сусьветнай вайны горад быў амаль поўнасьцю зьнішчаны. Пасьля вайны па праекту Андрэ Пэрэ ён быў зноўку забудаваны сучаснымі пабудовамі характэрнага белага колеру.

Гарады-сябры

• Далянь, Кітай
• Пуэнт-Нуар, Рэспубліка Конга
• Саўтгэмптан, Вялікабрытанія
• Тампа, Фларыда, ЗША
• Санкт-Пецярбург, Расея

Вонкавыя спасылкі

Гаўр — сховішча мультымэдыйных матэрыялаў

• Афіцыйны сайт