Гарлачык белы

Гарлачык белы, вадзяніца (Nymphaea alba) — водная расьліна сямейства гарлачыкавых.

Гарлачык белы
Клясыфікацыя
Царства	Расьліны
Аддзел	Кветкавыя
Кляса	Двухдольныя
Атрад	Гарлачыкакветныя
Сямейства	Гарлачыкавыя
Род	Гарлачык
Від	Гарлачык белы
Бінамінальная намэнклятура
Nymphaea alba
Гарлачык белы на Віківідах  Гарлачык белы ў Вікісховішчы ITIS 503972 · NCBI 34301

Апісаньне

Шматгадовая водная бессьцябловая травяністая расьліна з тоўстым і доўгім гарызантальным карэнішчам са шматлікімі карэньчыкамі і ромбападобнымі меткамі ў месцах прымацаваньня чаранкоў адмерлага лісьця. Лісьце буйное (да 40 см дыямэтрам), плывучае, акругла-авальнае з сэрцападобнай асновай і доўгімі чаранкамі, зьверху цёмна-зялёнае, зьнізу чырванавата-фіялетавае. Кветкі буйныя (да 20 см дыямэтрам), адзіночныя, белыя, з завостранымі лісьцікамі калякветніка і серна-жоўтым плоскім рыльцам, слабадухмяныя. Аснова чашачкі закругленая (завязь да верхавінкі не звужана, уся ў тычынках). Плод — шара- або ягадападобная шматлістоўка.

Асаблівасьці біялёгіі

Цьвіце ў чэрвені-верасьні, пладаносіць у ліпені-лістападзе. Размнажэньне насеннае і вэгетатыўнае (карэнішчамі). Плод высьпявае пад вадой.

Пашырэньне

Пашыраны ў Эўропе, Міжземнамор’і, Малой Азіі. У Беларусі знаходзіцца ў асобных лякалітэтах і выспавых участках росту паблізу паўночна-ўсходняй мяжы арэала, часьцей сустракаецца ў даліне Прыпяці і нізоўях яе прытокаў, у старыцах Сажа, Нарава і басэйна Нёмана; у больш паўночных раёнах трапляецца на буйных азёрах — Нарач, Чарнова ў Гарадоцкім раёне і ў інш.

Месцы росту: стаячыя і з павольнай плыньню воды старыц, заток і поймавых азёраў з глеістым грунтам на глыбіні 50-250 см. Утварае значныя, дастаткова шчыльныя або разрэджаныя зарасьнікі.

Вырошчваецца аматарамі-акварыумістамі, як дэкаратыўная расьліна.