Асклепіядаў верш

Асклепія́даў верш — вершаваны памер антычнай (мэтрычнай) сыстэмы вершаваньня, вынайдзены старажытнагрэцкім паэтам Асклепіядам Самоскім (III ст. да н. э.). Гэты верш зьяўляецца па сутнасьці мадыфікацыяй пэнтамэтра, у якім першая і перадапошняя дактылічныя стопы ўсечаныя на адзін кароткі склад.

Асклепіядаў верш у беларускай літаратуры

У беларускай паэзіі асклепіядаў верш ужыты толькі адзін раз — у перакладзеным М. Багдановічам «Помніку» старажытнарымскага паэта Гарацыюса:

Лепшы медзі сабе памятнік справіў я,

Болей ўсіх пірамід царскіх падняўся ён,

Не зруйнуе яго сівер, ні едкі дождж,

Ні гадоў чарада, вечнага часу рух.

Не саўсім я памру, лепшая часьць мяне

Не зазнае хаўтур; слава мая ўвесь час

Між патомкаў расьці будзе, пакуль усхадзіць

Зможа з дзевай удвух на Капітольлі жрэц.

Літаратура

• Рагойша В. П. Паэтычны слоўнік. — 3-е выд., дапрац. і дапоўн. — Менск: Беларуская навука, 2004. — 576 с. — 2000 ас. — ISBN 985-08-0598-6
• Рагойша В. П. Тэорыя літаратуры ў тэрмінах. — Менск: Беларуская энцыклапедыя, 2001. — 384 с. — 1000 ас. — ISBN 985-11-0197-4