Ігар Войніч

Ігар Яўгенавіч Войніч (нарадзіўся ў 1965 годзе) — беларускі музыка, разам з Алесем Кішкіным, Зьмітром Сідаровічам і Валянцінам Агеевым заснавальнік гурту «Камэлот».

Ігар Яўгенавіч Войніч
Дата нараджэньня	1965(1965)
Грамадзянства	Беларусь
Прафэсія	гітарыст, клявішнік
Навуковая сфэра	музыка і філялёгія
Месца працы	Беларускі гуманітарны ліцэй імя Якуба Коласа філялягічны факультэт БДУ
Гады дзейнасьці	1991—
Інструмэнты	гітара, бас-гітара, клявішныя інструмэнты, віялянчэль
Гурты	«Камэлот»

Біяграфія і творчасьць

Па адукацыі — філёляг. У 2002 годзе абараніў дысэртацыю па тэме "Творчасьць Сільвестра Косава ў літаратурным працэсе на Беларусі 30-х гг. XVIІ ст.". Кандыдат філялягічных навук. Граў на гітары, бас-гітары, клявішных інструмэнтах, а часам сядаў за віялянчэль. Напісаў музыку некалькіх сумесных зь іншымі ўдзельнікамі гарту песень, што выйшлі на першым CD, а «Песьню Вартавога ратніка» аднаасобна — і музыку, і тэкст. Асноўная роля Войніча ў першым і другім складзе гурту палягала на сачыненьні аранжыровак. Пасьля творчых разыходжаньняў паміж Басаем і Зьмітром Сідаровічам у 1996 годзе Войніч прыняў бок Басая. Некалькі наступных гадоў Войніч і Басай, набраўшы ў гурт новых музыкаў, пад назвай «Камэлот» далі некалькі дзясяткаў канцэртаў, нават запісалі на дэма новую праграму выключна зь песень Войніча. Зьезьдзілі з канцэртамі ў Польшчу і Данію. Войніч выкладаў польскую літаратуру на філялягічным факультэце БДУ. У 2002 годзе Войнічу не падоўжылі кантракт працы ва ўнівэрсытэце. Адной з прычын была гістарычная і, адпаведна, палітычная ангажаванасьць гарту. «Камэлот» канчаткова быў пазбаўлены рэпэтыцыйнай базы і перастаў увогуле выступаць.

У 2007 годзе Сідаровічам разам з Войнічам рабілася спроба аднавіць калектыў. Але апошні ў канцы году, згодна з паведамленьнямі польскай прэсы, выехаў у Польшчу. Працаваў няштатным апэратарам тэлеканалу «Белсат».

Ігар Войніч працяглы час выкладаў музыку й інфарматыку ў Беларускім гуманітарным ліцэі імя Якуба Коласа.