Перакачаўнік

Перака́чаўнік — страва беларускіх татараў, пірог зь вялікай колькасьці пластоў тонка раскачанага цеста бяз дрожджаў.

20 ліпеня 2005 году страва ўнесеная ў сьпіс традыцыйных страваў польскай кухні, які вядзе Міністэрства сельскай гаспадаркі Польшчы й мае толькі прэстыжны характар^[1]. Пры гэтым падкрэсьлівалася, што назву ўзялі зь беларускай мовы^[2]. Прадукт занесены таксама ў рэестар гарантаваных традыцыйных страваў(en), які вядзе Эўрапейская камісія, што гарантуе яму абарону ва ўсім Эўразьвязе^[3]^[4].

Рэцэпты прыгатаваньня

Складнікі

Цеста:

мука — 1 кг
масла — 250 г
сьмятана — 1 шклянка
яйкі — 3—4 шт.
сода — 2 лыжачкі
соль
цукар

Фарш мясны:

фарш ялавічны ці барані — 1 кг
цыбуля — 4 шт.
соль
перац
меленая папрыка

Фарш салодкі:

яблыкі, або тлусты тварог, або сьлівы, або сыр — 1 кг
разынкі — 1 жменя
цукар — 2 лыжкі
сок зь лімона
алей для смажаньня ў фрытуры

З мукі, паловы масла, сьмятаны, яек, соды і цукру (для салодкай начынкі; але солі і перцу — у выпадку мясной начынкі) старанна замяшаць вельмі крутое — гэтак званае макароннае, з найменшай колькасьцю вады (каля 25—35% ад агульнай вагі цеста ці ўдвая менш, чым здольная зьвязаць пшанічная мука) — цеста, даліваючы пакрысе ваду па меры патрэбы. Падзяліць цеста на 4 часткі, кожную раскачаць у як мага больш тонкія пласты. Зьмяшаць кампанэнты фаршу паміж сабой. Нашмараваць асобныя бліны маслам і закрасамі, выкласьці фарш, зьверху пакласьці наступны блін і г. д. Скруціць у рулет, які затым зьвіваецца ў сьпіраль накшталт «сьлімака», зьляпіць краі. Смажыць у рондлі ў вялікай колькасьці алею (які мусіць цалкам пакрываць перакачаўнік), мясны — каля дзьвюх гадзін, салодкі — крыху меней.

Чым больш далікатнымі атрымаюцца бліны і чым драбней пасечанае мяса, тым смачнейшым будзе гэты старадаўні беларуска‑татарскі пірог. Гатовы прадукт, паводле зарэгістраванага польскага стандарту, мае каля 30 см у дыямэтры і важыць каля 3 кг.

Крыніцы

^ Інфармацыя на старонцы Міністэрства сельскай гаспадаркі Польшчы (пол.)
^ Ніна Шчарбачэвіч. «Рэстаратары нарэшце сталі да мяне прыслухоўвацца» // Ігуменскі тракт. — 5 лістапада 2013. — № 37 (52).
^ Інфармацыя на старонцы Міністэрства сельскай гаспадаркі Польшчы(недаступная спасылка) (пол.)
^ Rozporządzenie Komisji (WE) NR 567/2009 z dnia 29 czerwca 2009 r. rejestrujące w rejestrze gwarantowanych tradycyjnych specjalności nazwę (Pierekaczewnik (GTS))(недаступная спасылка) (пол.)

Літаратура

Алесь Белы. Наша страва. Перакачаўнік // «Наша Ніва». — 2007. — № 14.
Наша страва: Сапраўдная беларуская кухня / Алесь Белы, Зьміцер Дядзенка, Алег Дзярновіч і інш. — Другое выданне. — Менск: І. П. Логвінаў, 2010. — 288 с. — ISBN 978-985-6901-72-3

[1] Інфармацыя на старонцы Міністэрства сельскай гаспадаркі Польшчы (пол.)

[2] Ніна Шчарбачэвіч. «Рэстаратары нарэшце сталі да мяне прыслухоўвацца» // Ігуменскі тракт. — 5 лістапада 2013. — № 37 (52).

[3] Інфармацыя на старонцы Міністэрства сельскай гаспадаркі Польшчы(недаступная спасылка) (пол.)

[4] Rozporządzenie Komisji (WE) NR 567/2009 z dnia 29 czerwca 2009 r. rejestrujące w rejestrze gwarantowanych tradycyjnych specjalności nazwę (Pierekaczewnik (GTS))(недаступная спасылка) (пол.)

[1]

[2]

[3]

[4]