Леанід Тараненка

Леані́д Арка́дзевіч Таране́нка (13 чэрвеня 1956, Маларыта, БССР) — беларускі і савецкі спартовец, цяжкаатлет. Уладальнік 19 сусьветных рэкордаў, прычым два зь іх — 266 кг у штуршку і 475 кг у дваябор’і — застаюцца неперасягненымі й да сёньня.

Леанід Тараненка
Леанід Тараненка на Алімпіядзе ў Маскве (1980)
Род дзейнасьці	цяжкаатлет
Дата нараджэньня	13 чэрвеня 1956 (68 гадоў)
Месца нараджэньня	Маларыта, БССР
Месца вучобы	Беларускі інстытут мэханізацыі сельскай гаспадаркі[d] Беларускі дзяржаўны ўнівэрсытэт фізычнай культуры[d]
Занятак	цяжкаатлет
Узнагароды
Леанід Тараненка ў Вікісховішчы

Жыцьцяпіс

Скончыў Беларускі інстытут мэханізацыі сельскай гаспадаркі па спэцыяльнасьці інжынэр.

Выступаў за ДСТ «Ураджай» (Менск). Першы трэнэр — Пётра Сацюк.

Спартовая кар’ера

Першы вялікі посьпех прыйшоў да Леаніда Тараненкі на Алімпійскіх гульнях 1980 году, дзе ён здабыў залаты мэдаль у клясе 110 кіляграмаў з вынікам 422,5 кг у дваябор’і. Не прымаў удзелу ў Алімпіядзе ў Лос-Анджэлесе праз байкатаваньне яе Савецкім Саюзам, аднак завочна пераўзышоў вынік алімпійскага чэмпіёна Нарбэрта Абэрбургера на альтэрнатыўных Гульнях дружбы, усталяваўшы сусьветны рэкорд 442,5 кг.

Пасьля гэтага Тараненка выступаў у супэрцяжкай клясе. 26 лістапада 1988 у аўстралійскай Канбэры ён усталяваў сусьветны рэкорд 266 кг у штуршку і 475 кг у суме. Пасьля рэструктурызацыяў вагавых клясаў у 1993 і 1998 гэтыя паказьнікі болей ня лічацца за афіцыйныя сусьветныя рэкорды. Тым ня меней, да гэтага часу яны не пераўзыдзеныя.

У 1992, выступаючы за Аб’яднаную каманду СНД у Барсэлёне, Тараненка здабыў срэбны мэдаль у супэрцяжкай вазе з вынікам 425 кг.

Узнагароды

Заслужаны майстар спорту СССР (1980). Узнагароджаны ордэнамі Дружбы народаў і Працоўнага Чырвонага Сьцяга.

Вонкавыя спасылкі

Леанід Тараненка — сховішча мультымэдыйных матэрыялаў

• Вялікая алімпійская энцыкляпэдыя(недаступная спасылка) (рас.)