Жанэт (сьпявачка)

Жанэт (сьпявачка)
	Жанэт (сьпявачка)
	Janette Anne Dimech
Дата нараджэньня	10 кастрычніка 1951
Месца нараджэньня	Лёндан, Вялікабрытанія;
Прафэсія	сьпявачка
Гады дзейнасьці	1968 — цяпер
Псэўданімы	Jeanette
Жанры	поп, электрапоп, баляда, рок
Вакал	light soprano[d]
Інструмэнты	голас[d] і гітара
Псэўданімы	Jeanette
Лэйблы	Hispavox[d]
Сайт	jeanette-rebelde.blogspot.com
	Жанэт (сьпявачка) у Вікісховішчы

Жанэ́т Га́нна Дымэч (па-гішпанску: Jeanette Anne Dimech; нар. 10 кастрычніка 1951, Лёндан, Вялікабрытанія), сцэнічнае імя Жанэт — гішпанская сьпявачка ангельскага паходжаньня.

Жыцьцяпіс рэдагаваць

Дымэк — дачка бэльгійскага кангалезца мальтыйскага паходжаньня і гішпанкі з Канарскіх астравоў. Нарадзілася ў Лёндане, дзе знаходзіўся бізнэс ейных дзядулі з бабуляй; дзяцінства прабавіла ў Чыкага і Ла Габры. Пасьля разводу бацькоў у 12-гадовым узросьце пераехала з маці і малодшымі дзецьмі ў Барсэлёну. Сьпярша навучалася ў ангельскамоўнай школе, бо не валодала гішпанскай; пасябраваўшы зь мясцовымі дзецьмі, засвоіла гішпанскую^[1].

У 1960-х навучылася граць на гітары і пачала складаць песьні. Сваімі кумірамі лічыла Боба Дылана, Донавана і «The Byrds», таму выконвала амэрыканскі фолк. Пасьля стала сьпявачкай у студэнцкім гурце «Pic-Nic», які дабіўся посьпеху ў 1967 року з фолк-вэрсіяй гішпанскай дзіцячай песьні «Cállate niña» (Жанэт была адной зь ейных аўтарак). Аднак пастаянныя спрэчкі наконт таго, ці варта выконваць ангельскія вэрсіі песьняў, спрычынілі распад калектыву.

Пасьля гэтага Жанэт пераехала з мужам, вугорскім футбалістам Ласла Крыштафам, у Вену, дзе займалася гадаваньнем адзінага дзіцяці, Блайт. Аднойчы ёй патэлефанавалі з колішняга ейнага лэйблу «Hispavox» і ўгаварылі ўзяць удзел у сольным праекце. Тады ў 1971 року Жанэт вярнулася ў Барсэлёну і распачала сольную кар’еру самотнікам «Soy rebelde»^[2] (Я паўстанка). На кружэлцы лэйбл памылкова напісаў ейнае імя (Jeanette замест Janette), і з тае пары яна стала карыстацца варыянтам «Jeanette». Гэтая песьня, а таксама іншыя творы кампазытара Мануэля Аляхандры, такія як «Estoy triste» (Мне сумна) і «Oye mamá, oye papá» (Слухай, мама, слухай, тата), умацавалі пазыцыі сьпявачкі на гішпанскай сцэне.

Найбольшым посьпехам Жанэт стала песьня «Porque te vas» (Таму што ты сыходзіш), якая атрымала міжнародную вядомасьць дзякуючы выкананьню ў фільме «Выкармі крукачоў» (1976). Песьня заняла 1-е месца ў Нямеччыне, 4-е ў Швайцарыі і 13-е ў Аўстрыі.

У 1977 выйшаў супольны альбом Жанэт з францускім кампазытарам Андрэ Попам, «Todo es nuevo» (Усё новае), прычым у дзьвюх вэрсіях: гішпанскай і францускай.

У 1981 сьпявачка запісала свой найбольш прадаваны альбом, «Corazón de Poeta» (Сэрца паэта), скампазаваны, аранжаваны і дырыгаваны Мануэлем Алехандрам. Тры песьні зь яго сталі гітамі: «Corazón de poeta», «Frente a Frente» (Твар у твар) і «El muchacho de los ojos tristes» (Мужчына з сумнымі вачыма).

У наступныя гады выйшлі альбомы «Reluz» (1983), «Ojos en el Sol» (1984) і «Loca por la Música» (1989), а таксама шэраг самотнікаў. Продажы ўпалі, хоць Жанэт заставалася папулярнай сьпявачкай, ейная дыскаграфія была перавыдадзеная ў калекцыі найлепшых гітоў.