Голас вёскі (1941)
«Голас вёскі» — газэта, якая выдавалася з 1 кастрычніка 1941 да 16 чэрвеня 1944 году ў Менску на беларускай мове пад кантролем нямецкіх акупацыйных улад у пэрыяд Другой сусьветнай вайны.
| Голас вёскі | |
| Тып | грамадзка-палітычная |
|---|---|
| Галоўны рэдактар | М. Караленка, Я.Кіпель, А. Сянкевіч |
| Заснаваная | 1 кастрычніка 1941 (83 гады таму) |
| Закрытая | 16 чэрвеня 1944 (80 гадоў таму) |
| Мова | Беларуская |
| Штаб-кватэра | Менск |
Сядзяць (зьлева направа): Уладзіслаў Казлоўскі, Натальля Арсеньнева, Аляксей Сянкевіч.
Стаяць (зьлева направа): Уладзімер Кушаль, Антон Адамовіч, Караленка. Менск, сьнежань 1942 г.
Галоўныя рэдактар: М. Караленка, Яўхім Кіпель, Аляксей Сянкевіч.
Распаўсюджвалася пераважна ў сельскіх раёнах Генэральнай акругі Беларусь. Пісала пра падзеі на франтах 2-й сусьветнай вайны, друкавала распараджэньні акупацыйных улад, прамовы А. Гітлера, А. Розэнберга, В. Кубэ, Крытыкавала калгасную сыстэму, усхваляла «новы аграрны парадак», аналізавала гаспадарчыя магчымасьці беларускіх зямель, сялянскае жыцьцё ў замежных краінах.
Парады земляробам і сельскім жыхарам друкаваліся ў рубрыках «У дапамогу сельскаму гаспадару», «Куток вясковай жанчыны», «Парады гаспадыні», «Вэтэрынарныя парады» і інш. Шмат увагі аддавала гісторыі і культуры Беларусі (праца «Беларусь учора і сеньня» і артыкул «Каляды на Беларусі» Я.Найдзюка, артыкул «Магілёў і яго барацьба за свае правы» З.Байдацкага, «Як верылі нашы продкі» М.Шчаглова, «Народнае выяўленчае мастацтва» У. Глыбіннага), пісала пра сталінскія рэпрэсіі ў 1930-я гады (урыўкі з кнігі «Валадары ГПУ» К.Альбрэхта, артыкул «Апошні разгром беларускай інтэлігенцыі» У.Клішэвіча і інш.). У газэце апублікаваны раман «Наўсуперак лесу» М.Дуброўскага (Р.Мурашкі). Выйшла 130 нумароў.
Літаратура
рэдагаваць- Жумар, С. «Голас вёскі» // Энцыклапедыя гісторыі Беларусі. У 6 т. / Беларус. Энцыкл.; Рэдкал.: Г. П. Пашкоў (гал. рэд.) і інш.; Маст. Э. Э. Жакевіч. — Мн.: БелЭн, 1996. — Т. 3: Гімназіі — Кадэнцыя. — 527 с. — ISBN 985-11-0041-2 С. 56