Георгі Дзьмітрук

	Георгі Дзьмітрук
Сустаршыня БХД
	2005 — цяперашні час
Асабістыя зьвесткі
Нарадзіўся:	16 красавіка 1968 (56 гадоў); Кобрынь
Партыя:	Беларуская хрысьціянская дэмакратыя
Адукацыя:	БДЭУ

Вікіпэдыя мае артыкулы пра іншых асобаў з прозьвішчам Дзьмітрук.

Георгі Раманавіч Дзьмітрук (нарадзіўся 16 красавіка 1968 году, Кобрынь) — беларускі грамадзка-палітычны дзеяч, сустаршыня аргкамітэту па стварэньні партыі «Беларуская хрысьціянская дэмакратыя».

Сям’я

Нарадзіўся ў шматдзетнай сям’і зь сямі дзяцей. Бацька паводле прафэсіі сталяр, маці — лекар-стаматоляг. Жанаты, мае пяць дзяцей.

Адукацыя

У 1985 скончыў СШ № 7 Кобрыню. У 1987 скончыў Віцебскую мэдвучэльню па спэцыяльнасьці зубны тэхнік, разьмеркаваны ў Столін, які пацярпеў ад катастрофы на Чарнобыльскай АЭС. Скончыў факультэт міжнародных эканамічных адносінаў Беларускага дзяржаўнага эканамічнага ўнівэрсытэту.

Праца

У 1987—1989 служыў у Савецкай арміі ў Далёкаўсходняй ваеннай акрузе. З 1989 працаваў у стаматалягічнай паліклініцы ў Кобрыні. З 1992 — кіраўнік зьнешнеэканамічнага аддзелу Міжрэгіянальнага вытворча-камэрцыйнага аб’яднаньня «АВІЯПРОМ». З 1993 — генэральны дырэктар вытворча-камэрцыйнай фірмы ТАА «АМЕГА». З 2001 — генэральны дырэктар ІП «АМЕГА СЭРВІС» карпарацыі «Текстайл Амега Инк». З 2005 — дырэктар замежнага прыватнага лячэбна-аздараўленчага ўнітарнага прадпрыемства «Белгіхон Юнайтэд».

Грамадзка-палітычная дзейнасьць

З 2005 — сустаршыня аргкамітэту па стварэньні партыі «Беларуская хрысьціянская дэмакратыя», адказны за эканоміку і кампанію «За свабоду веравызнаньня»^[1]. 28 лютага 2009 на ўстаноўчым зьезьдзе абраны на пасаду сустаршыні партыі «Беларуская хрысьціянская дэмакратыя» (незарэгістраваная).

У красавіку 2010 балятаваўся ў мясцовыя саветы дэпутатаў (Кобрынскі раённы і Берасьцейскі абласны), але ня быў абраны. Сябар Рады народных дэпутатаў БХД^[2].

У верасьні — сьнежні 2010 сябар ініцыятыўнай групы кандыдата ў прэзыдэнты ад БХД Віталя Рымашэўскага^[3], яго давераная асоба^[4].

Старшыня Рэспубліканскага грамадзкага аб’яднаньня «Хрысьціянская дзелавая ініцыятыва». Сябар Рады Эўрапейскай асацыяцыі «Эўрапартнэры» (Швайцарыя), Сусьветнай асацыяцыі падтрымкі прадпрымальніцтва «СВМС».

Удзельнік эканамічных форумаў у Швэцыі, Нідэрляндах, Італіі, Нямеччыны.

Крыніцы

Вонкавыя спасылкі

[1] Лідары БХД

[2] Рада народных дэпутатаў

[3] Список членов инициативной группы граждан по выдвижению Рымашевского Виталия Анатольевича кандидатом в Президенты Республики Беларусь

[4] Список доверенных лиц кандидата в Президенты Республики Беларусь Рымашэўскага Віталя Анатольевіча(недаступная спасылка)

[1]

[2]

[3]

[4]