Арганізацыя беларуска-амэрыканскай моладзі

Арганізацыя беларуска-амэрыканскай моладзі, таксама Зьвяз беларуска-амэрыканскай моладзі — грамадзкая арганізацыя беларускай моладзі ЗША, заснаваная 24 верасьня 1950 (паводле іншых вестак — 9 ліпеня 1950 году) як Аб’яднаньне беларускай моладзі ў Амэрыцы (АБМА).

Гісторыя

Утварылася пераважна з былых сябраў Саюзу беларускай моладзі, якія па вайне ў лягерах Ды-Пі бралі актыўны ўдзел у скаўтынгу, навучаліся ў беларускіх школах і гімназіях. Першым старшынёй абралі Міхася Сеньку, заступнікам старшыні — Кастуся Вайцяхоўскага, сакратаром — Лявона Шурака.

30 траўня 1953 году ў Саўт-Рывэры адбыўся II Зьезд, у якім удзельнічала 70 дэлегатаў. Старшынём пераабралі Міхася Сеньку, першым заступнікам — Кастуся Вайцяхоўскага, другім заступнікам стала Валя Дульская. У склад управы ўвайшлі Ўладзімер Пеляса, Анатоль Шурак, Валянціна Вайцяхоўская, Мікалай Ігнатовіч, Віталь Цярпіцкі. Рэвізійную камісію склалі Ўладзімер Траскевіч, Вольга Лапека, Хведар Беразоўскі.

Вяла актыўную грамадзка-палітычную дзейнасьць, праводзіла моладзевыя вечарыны, удзельнічала ў спартовых спаборніцтвам (у складзе спартовага клюбу «Нёман» ), а таксама ў імпрэзах і акцыях, у тым ліку у Парадах ляяльнасьці ці антыкамуністычных акцыях. Мела летнія саколкі, аздобленыя надпісам «Жыве Беларусь!»

Фактычна была моладзевым крылом Злучанага беларуска-амэрыканскага дапамаговага камітэту і Беларускага цэнтральнага прадстаўніцтва ў Амэрыцы, а ад 1951 году і Беларускага кангрэсавага камітэту Амэрыкі. У сярэдзіне 1950-х гадоў на фоне крокаў у збліжэньні розных грамадзка-палітычных суполак Амэрыкі навязала лучнасьць з Згуртаваньнем беларуска-амэрыканскай моладзі. У 1959 годзе правяла супольную спартовую сустрэчу, а ў 1962 годзе пачала супольна выдаваць часопіс «Беларуская моладзь».

Літаратура

• 20 год Арганізацыі Беларуска-Амэрыканскае Моладзі. — USA, 1970. — 172 с., іл.
• Гардзіенка А. Беларускі кангрэсавы камітэт Амэрыкі (БККА). — Смаленск, 2009. — 428 с, [12] с. іл.