Апорная рыфма

Апо́рная ры́фма — рыфма, у якой супадаюць націскныя, г. зв. апорныя, склады (пераднаціскны зычны і націскны галосны), у той час як пасьлянаціскныя склады не супадаюць. Ужываўся гэты від рыфмы даволі шырока яшчэ ў беларускім фальклёры:

Ой, брат не брат — татарын:

Прадаў сястрыньку за талер.

Асаблівае пашырэньне апорная рыфма набыла ў сучаснай паэзіі:

З палёгкай тузануўся поезд

і стаў… Я выйшаў на пэрон.

Блішчалі рэйкі, нібы полаз

блішчыць зімоваю парой.

(А. Вярцінскі «Начны бераг»)

Вельмі часта сугучнасьць апорных націскных складоў узбагачаецца за кошт супадзеньня асобных пасьлянаціскных і пераднаціскных гукаў. Такія ўзбагачаныя апорныя рыфмы гучаць выразна, своеасабліва:

А мой певень гаспадар

Ды ўсіх курэй распрадаў.

(Народная песьня)

Літаратура

• Рагойша В. П. Паэтычны слоўнік. — 3-е выд., дапрац. і дапоўн. — Менск: Беларуская навука, 2004. — 576 с. — 2000 ас. — ISBN 985-08-0598-6
• Рагойша В. П. Тэорыя літаратуры ў тэрмінах. — Менск: Беларуская энцыклапедыя, 2001. — 384 с. — 1000 ас. — ISBN 985-11-0197-4