Украінскае нацыянальнае аб’яднаньне

Украінскае нацыянальнае аб’яднаньне (па-ўкраінску: Українське національне об'єднання) — палітычная арганізацыя закарпацкіх украінцаў, што паўстала ў 1939 годзе і ўзяла ад Цэнтральнае Ўкраінскае Народнае Рады функцыю адстойваць інтарэсы ўкраінскага насельніцтва.

Украінскае нацыянальнае аб’яднаньне
Українське національне об'єднання
Лідэр партыі	Фёдар Рэвай
Дата заснаваньня	18 студзень 1939
Ідэалёгія	украінскі нацыяналізм
Орган партыйнага друку	«Нова Свобода»

Аґітацыйная брыґада «Карпацкае Сечы» аґітуе галасаваць на выбарах Сойму Карпацкае Ўкраіны за сьпіс УНА

Гісторыя

Заснаванае 18 студзеня 1939 року ў Хусьце з прадстаўнікоў усіх тады існуючых украінскіх партыяў і ґрупаў, за выключэньнем камуністаў. 24 студзеня было названае цэнтральнае кіраўніцтва УНА. Старшынём аб’яднаньня стаў Фёдар Рэвай — старшыня Ўкраінскае Цэнтральнае Народнае Рады (УЦНР), намесьнікам старшыні — Міхайла Тулік, (пасьля — Юры Перавузьнік), ґенэральны сакратар — Андрэй Воран. Да складу галоўнага кіраўніцтва таксама ўвайшлі: сакратар Іван Рагач, рэдактар Васіль Ґрэнджа-Донскі, рэфэрэнт прапаґанды Ўладзімер Камарынскі, кантралёры Мікола Бабота ды Мікола Бандусяк. Апроч таго, беспасярэднімі чальцамі кіраўніцтва партыі УНА сталі: Аўґустын Штэфан, Міхайла Брашчайка, Ірына Нявіцкая, Стэпан Расоха, Юры Пазуханіч, Мікола Далінай, Стэпан Клачурак, Васіль Лар, Дзьмітро Німчук, Міхайла Марушчак, Дзьмітро Паповіч, Іван Клімпуш, Міхайла Гупалоўскі. Пачэсным старшынём УНА быў абраны Аўґустын Валошын. Краёвы сакратарыят (галоўны кіраўнік) партыі месьціўся ў месьце Хусьце.

27 студзеня кіраўніцтва аб’яднаньня сфармавала сьпіс кандыдатаў у кіраўнікі (дэпутаты) да Сойму Карпацкае Ўкраіны з 32 асобаў на чале з Аўґустынам Валошыным, усе зь якіх былі абраныя. Прэсавы орґан — штодзёньнік «Нова Свобода», рэдакцыю якога ачоліў пісьменьнік Васіль Грэнджа-Донскі. Паводле падсумкаў выбараў партыя УНА атрымала масавую падтрымку ў насельніцтва — 92,4 %. Сумарна супраціўнікі партыі УНА ды ўкраінскага нацыянальна-дзяржаўнага вэктару розьвітку краю здабылі толькі 19 645 галасоў.

22 студзеня афіцыйны орґан Украінскага Нацыянальнага Аб’яднаньня «Нова Свобода» ў Львове зьмясьціў перадавы артыкул, у якім праінфармаваў пра стварэньне Прэзыдыюму УНА, ягоны склад ды характар дзейнасьці палітычнага аб’яднаньня. Сьцьверджвалася, што Прэзыдыюм УНА «будзе адыгрываць у Карпацкай Украіне такую ролю, як нацыянал-сацыялістычная партыя ў Нямеччыне, або фашыстоўская ў Італіі».

З акупацыяю Карпацкае Ўкраіны Каралеўствам Вугоршчына Ўкраінскае Нацыянальнае Аб’яднаньне спыніла дзейнасьць.

Глядзіце таксама

• Украінскае Нацыянальнае Аб’яднаньне (Канада)
• Украінскае Нацыянальнае Аб’яднаньне (Нямеччына)
• Украінскае Нацыянальнае Аб’яднаньне (Чэхаславаччына)

Літаратура

• Енциклопедія українознавства(uk) : Словникова частина : [в 11 т.] / Наукове товариство імені Шевченка ; гол. ред. проф., д-р В. Кубійович(uk). — Париж — Нью-Йорк: Молоде життя, 1955—1995. — ISBN 5-7707-4049-3