Мікалай (Касаткін)

	Мікалай Японскі
	Мікалай Японскі
Сьвяты
Сьвецкае імя	Іван Касаткін
Манаскае імя	Мікалай
Нарадзіўся	13 жніўня 1836; Бярозаўскі пагост, Бельскі павет, Смаленская губэрня, Расейская імпэрыя
Памёр	16 лютага 1912; Токіё, Японія
Шануецца	праваслаўе
Услаўлены	10 красавіка 1970
У ліку	Роўнаапостальных
Галоўная сьвятыня	часткі мошчаў у Такійскім саборы і Хакадацкай царкве
Дзень памяці	16 лютага
Атрыбуты	кніга, япіскапскі рыштунак
Працы	пераклад на бунга Новага Запавету, Псалтыру і богаслужэбных кнігаў
Падзьвіжніцтва	заснавальнік Праваслаўнай царквы ў Японіі
	Мікалай у Вікісховішчы

Архіяпі́скап Мікала́й (сьвецкае імя — Іва́н Дзьмітрыевіч Каса́ткін; 1 (13) жніўня 1836 — 3 (16) лютага 1912) — япіскап Расейскай Царквы; місіянэр, заснавальнік Праваслаўнай царквы ў Японіі. Праслаўлены ў ліку сьвятых як роўнаапостальны; памяць — 3 лютага паводле Юліянскага календара.

Нарадзіўся ў Смаленскай губэрні ў сям’і дыякана. Скончыў Бельскую духоўную вучэльню і Смаленскую духоўную сэмінарыю. У ліку найлепшых вучняў у 1857 быў рэкамэндаваны і паступіў у Санкт-Пецярбурскую духоўную акадэмію, дзе ў 1860 року, даведаўшыся, што існуе вакансія на пасаду настаяцеля царквы пры нядаўна адчыненым расейскім консульстве ў г. Хакадатэ (Японія, падаў заяўку і быў абраны для гэтага служэньня. Тады ж прыняў пастрыг.

2 ліпеня 1861 прыбыў у Хакадатэ. Першыя гады свайго знаходжаньня ў Японіі айцец Мікалай самастойна вывучаў японскую мову, культуру і побыт японцаў і займаўся арганізацыйнымі пытаньнямі для адкрыцьця падвор’я Расейскай праваслаўнай царквы. Першым хрышчаным японцам у 1868 року стаў сынтаісцкі сьвятар Такума Савабэ, былы самурай, які прыйшоў ў хату да а. Мікалая, каб забіць яго. Да 1870 року праваслаўная суполка налічвала звыш 4 тыс. чалавек, а да 1912 — каля 33 тысячаў чалавек і 266 праваслаўных суполак.

У 1870 року па хадатайніцтве а. Мікалая, узьведзенага ў сан архімандрыта, была адкрытая расейская духоўная місія з цэнтрам у Токіё ў вядзеньні Камчацкай япархіі. У 1880 а. Мікалай узьведзены ў сан япіскапа Рэвельскага, вікарыя Рыскай япархіі. У працэсе місіянэрскай дзейнасьці а. Мікалай перавёў на японскую мову Сьвятое Пісаньне, іншыя багаслужэбныя кнігі, стварыў духоўную сэмінарыю, пачатковыя школы для дзяўчынак і хлопчыкаў, бібліятэку, прытулак і іншыя ўстановы. Выдаваў праваслаўны часопіс «Царкоўны весьнік» на японскай мове. 8 сакавіка 1891 быў асьвячоны катэдральны Васкрасенскі сабор (званы японцамі Нікалай-до).

Падчас расейска-японскай вайны застаўся са сваёй паствай у Японіі, аднак службы ў гэты час не праводзіліся. 24 сакавіка 1906 Найсьвяцейшы Сынод узьвёў яго ў сан архіяпіскапа Такійскага і ўсяе Японіі.

Па сьмерці а. Мікалая японскі імпэратар Мэйдзі асабіста даў дазвол на пахаваньне ў межах гораду.

10 красавіка 1970 прылічаны да ліку сьвятых.

Глядзіце таксама

Храм Мікалая Японскага

Літаратура

Архіепіскап Антоній (Мельникаў). Святой равноапостольный архиепископ Японский Николай. // Богословские труды, 1975, сб.14
О. В. Шаталов. Святитель Николай (Касаткин) в первый период деятельности Российской православной миссии в Японии (1861—1875 гг.)

Вонкавыя спасылкі

Мікалай Японскі, сьвяты, роўнаапостальны на бачыне Расейскае Праваслаўе