Дактылічная рыфма

Дактылі́чная ры́фма — від рыфмы, у якой націск падае на трэці ад канца склад сугучных словаў. Яна сустракаецца ў беларускай паэзіі ўсіх часоў, хоць у старажытны пэрыяд выкарыстоўвалася значна радзей, чым у сучаснай вершатворчасьці. Па частаце ўжываньня гэтая рыфма знаходзіцца на трэцім месцы — пасьля жаночай і мужчынскай. Вось прыклады дактылічнай рыфмы:

Антон мало́дзенькі

Піў мёд сало́дзенькі.

Прыкаціўся к бо́чачцы,

Яшчэ трошкі хо́чацца.

(Народная песьня).

Дактылічная рыфма часьцей выкарыстоўваецца не самастойна, а ў спалучэньні з жаночай і мужчынскай, што робіць рытміка-інтанацыйны малюнак вершаванага твора больш разнастайным.

Літаратура

• Рагойша В. П. Паэтычны слоўнік. — 3-е выд., дапрац. і дапоўн. — Менск: Беларуская навука, 2004. — 576 с. — 2000 ас. — ISBN 985-08-0598-6
• Рагойша В. П. Тэорыя літаратуры ў тэрмінах. — Менск: Беларуская энцыклапедыя, 2001. — 384 с. — 1000 ас. — ISBN 985-11-0197-4