Гульнара Карымава

Гульнара Ісламаўна Карымава (па-ўзбэцку: Гулнора Исломовна Каримова; нарадзілася 8 ліпеня 1972 году, Фэргана, Узбэцкая ССР, СССР) — старэйшая дачка першага прэзыдэнта Ўзбэкістану Іслама Карымава (1990—2016), сястра Лолы Карымавай.

Гульнара Карымава
па-ўзбэцку: Гулнора Исломовна Каримова
Гульнара Карымава
Імя пры нараджэньні	Гульнара Ісламаўна Карымава
Род дзейнасьці	прадпрымальніца, дзяржаўны дзяяч
Дата нараджэньня	8 ліпеня 1972 (52 гады)
Месца нараджэньня	Фэргана, СССР
Грамадзянства	Узбэкістан
Месца вучобы	Нацыянальны ўнівэрсытэт Узбэкістану[d] Гарвардзкі ўнівэрсытэт Fashion Institute of Technology[d]
Занятак	дыпляматка, палітык, прадпрымальніца, сьпявачка
Псэўданімы	Googoosha
Бацька	Іслам Карымаў
Маці	Тацяна Карымава
Дзеці	Іслам (сын), Іман (дачка)
Гульнара Карымава ў Вікісховішчы

Пасол Узбэкістану ў Гішпаніі са студзеня 2010 году па ліпень 2012 году. Карымаву, лічылі магчымай наступніцай свайго бацькі на пасту прэзыдэнта краіны, аднак пасьля 2013 году ў Гульнары паўсталі сваркі з бацькам і яна стала імкліва губляць уплыў ва Ўзбэкістане. Карымава прафэсійна займаецца дызайнам ювэлірных вырабаў, вядомая як сьпявачка пад сцэнічным псэўданімам Гугуша, зьяўляецца старшынём апякунскай рады няўрадавага фонду «Форум культуры й мастацтва Ўзбэкістану» і шэрагу іншых грамадзкіх арганізацыяў. З 2013 году знаходзілася пад хатнім арыштам.

Паходжаньне. Вучоба

Гульнара — старэйшая дачка Іслама й Тацьцяны Карымавых, нарадзілася ў Фэргане. У 1988 годзе яна скончыла юнацкую матэматычную акадэмію ў Ташкенце, у 1994 годзе — аддзяленьне міжнароднай эканомікі філязофска-эканамічнага факультэта Ташкенцкага дзяржаўнага ўнівэрсытэту са ступеньню бакаляўра. У 1992 годзе таксама навучалася ў Новым Ёрку, ЗША. У 1996 годзе Карымава скончыла магістратуру Інстытуту эканомікі пры Акадэміі навук Рэспублікі Ўзбэкістан, у 2000 годзе атрымала ступень магістра мастацтваў у Гарвардзкім унівэрсытэце. У 2001 годзе яна стала доктарам палітычных навук ва Ўнівэрсытэце сусьветнай эканомікі й дыпляматыі ў Ташкенце, а ў 2009 годзе там атрымала навуковае званьне прафэсар. У 2006 годзе Карымава атрымала ступень бакаляўра ў вобласьці тэлекамунікацыяў у Ташкенцкім унівэрсытэце інфармацыйных тэхналогій.

Работа ў МЗС

У чэрвені 1995 году Карымава стала працаваць у Міністэрстве замежных справаў Узбэкістану, займала пасаду дарадцы міністра. Зь верасьня 2003 па красавік 2005 году яна працавала дарадцам-пасланцам пасоьства Ўзбэкістану ў Расеі, да гэтага была дарадцам сталага прадстаўніцтва Ўзбэкістану ў штаб-кватэры ААН у Новым-Ёрку. У лютым 2008 году яна была прызначана намесьнікам міністра замежных справаў Узбэкістану па пытаньнях міжнароднай супрацы ў культурна-гуманітарнай сфэры. У верасьні 2008 году Карымава была прызначана сталым прадстаўніком Рэспублікі Ўзбэкістан пры ААН і іншых міжнародных арганізацыях у Жэневе. У чэрвені 2013 году агенцтва Франс Прэс са спасылкай на МЗС Узбэкістану паведаміла, што Карымава больш не займае гэтую пасаду.

У студзені 2010 году Карымава была прызначана паслом Узбэкістану ў Гішпаніі. Напачатку ліпеня 2012 году Карымава пакінула гэты пост.

Пачынаючы з 2008 году, экспэрты й палітолагі разглядалі сьвецкую, багатую й уплывовую спадчыньніцу Карымава як магчымую наступніцу свайго бацькі на пасту прэзыдэнта Ўзбэкістану. Сама Гульнара, адказваючы ў 2012 годзе на пытаньне, ці лічыць яна сябе патэнцыйным кіраўніком дзяржавы, растлумачыла, што бачыць сябе амбіцыйным чалавекам, а «патэнцыйным кіраўніком дзяржавы можа быць кожны, хто мае амбіцыі й пры гэтым яшчэ нейкія мазгі й імкненьне». Аднак з 2013 году, пасьля трапленьня ў поле зроку праваахоўных органаў (як на Захадзе, так і на радзіме), сваркі з бацькам і іншых канфліктаў у сям’і, Карымава стала губляць уплыў і апору ва Ўзбэкістане, а потым фактычна апынулася ў ізаляцыі.

Асабістае жыцьцё

У ліпені 1991 году на дне народзінаў сваёй сяброўкі Гульнара пазнаёмілася з узбэкам з Аўганістану, грамадзянінам ЗША Мансурам Максуды, за якога яна выйшла замуж. Пасьля вясельля муж Гульнары атрымаў пасаду дырэктара прадстаўніцтва кампаніі Coca-Cola у Ташкенце. Ад гэтага шлюбу ў 1992 годзе нарадзіўся сын Іслам, а ў 1999 годзе дачка — Іман. У 2001 годзе шлюб распаўся, Карымава разам зь дзецьмі зьехала зь сямейнай хаты ў Нью-Джэрзі. Шлюбаразводны працэс доўжыўся два гады й павярнуўся міжнародным скандалам. Амэрыканскі суд падаў апеку над дзецьмі Максуду, абавязаў Гульнару вярнуць былому мужу дзяцей і выдаў санкцыю на яе затрыманьне. У адказ улады Ўзбэкістану зьвінавацілі Мансура ў махлярстве, утойваньні падаткаў, атрыманьні хабару ў адменна буйных памерах, крадзяжы маёмасьці й адмываньні грошай, і абвясьцілі ў міжнародны вышук. Максуду пазбавілі ўсіх пасадаў і даходаў, а яго сям’ю выгналі з Узбэкістану. 9 ліпеня 2008 году Найвышэйшы суд штата Нью-Джэрзі пастанавіла вярнуць Карымавай поўнае права на дваіх дзяцей.

Не падтрымвае адносін са сваёй малодшай сястрой Лолай з 2001 году

Вонкавыя спасылкі

Гульнара Карымава — сховішча мультымэдыйных матэрыялаў

• Гульнара Каримова: «Меня всегда называли послом Узбекистана»
• Журнал Hello! — Гульнара Каримова
• Журнал Harper’s Bazaar — Гульнара Каримова
• Газета «Коммерсантъ» — Гульнара Каримова пополнила модельный ряд // Дочь президента Узбекистана устроила модный показ
• Гульнары Каримовой GULI – концепция миража
• Официальный Сайт GULI — бренда Гульнары Каримовой