Воля народу
«Во́ля наро́ду» — заходнебеларуская газэта. Выдавалася 21—25 кастрычніка 1923 году ў Вільні на беларускай мове.
| Воля народу | |
 | |
| Тып | газэта |
|---|---|
| Выдавец | Уладзіслаў Знамяроўскі |
| Галоўны рэдактар | Уладзіслаў Знамяроўскі |
| Рэдактар | Уладзіслаў Знамяроўскі |
| Заснаваная | 21 кастрычніка 1923 |
| Закрытая | 25 кастрычніка 1923 |
| Мова | беларуская |
| Штаб-кватэра | Вільня, Віленская вул. 12-6 |
Рэдактар-выдавец Уладзіслаў Знамяроўскі. У газэце супрацоўнічалі Янка Пачопка, А. Радкевіч і інш.
Мела рубрыкі: «Палітычныя падзеі», «Весткі зь вёскі», «З польскага сойму», «З газэт», «Хроніка». Выступала супраць палітыкі польскага ўраду, нацыянальнага прыгнёту, уздымала пытаньні сацыяльнага становішча сялянства ў Заходняй Беларусі. Заклікала да гуртаваньня беларускіх сіл і арыентацыі іх на беларускіх паслоў у Сойме, аналізавала палітычнае становішча ў краіне (артыкул «Каму бэндзе гожай», а каму «бэндзе лепей» — пад псэўданімам Віс), разглядала высунутую яшчэ ў 1910-я г. эўрапейскімі сацыял-дэмакратамі ідэю Злучаных Штатаў Эўропы (артыкул «Злучаныя Штаты Эўропы» Радкевіча), выказвала занепакоенасьць узмацненьнем таталітарных тэндэнцыяў у Нямеччыне (публікацыя Кугельмана). Шмат увагі аддавала разьвіцьцю грамадзкага самаўсьведамленьня працоўных, барацьбе за беларускую асьвету, заклікала адкрываць прыватныя беларускія школы, ствараць сельскія каапэратывы (публікацыі пад псэўданімам П. Бахрым), гурты артыстаў-аматараў, пасылаць «хадакоў» у сойм і ўрад.
Зьмешчаны інтэрпэляцыя беларускіх дэпутатаў у сойм у сувязі са злоўжываньнямі польскіх вайскоўцаў на заходнебеларускіх землях, матэрыялы пра рэпрэсіі польскіх уладаў у Валожынскім і Вялейскім павеце, інфармацыя аб падзеях у сьвеце (выступленьні беспрацоўных у Бэрліне, Кёльне і інш. гарадах Нямеччыны, дывэрсіі ў рэдакцыях фашысцкіх газэт і работу парлямэнту ў Італіі, парлямэнцкія выбары ў Аўстрыі, міжнародную сялянскую канфэрэнцыю ў Маскве і інш.). Рэклямавала новыя кнігі, пэрыядычныя выданьні, друкавала парады сельскім гаспадарам. Выйшлі 2 нумары.
Літаратура
рэдагаваць- Чарняева, А. І. «Воля народу» / А. І. Чарняева // Энцыклапедыя гісторыі Беларусі. У 6 т. / Беларус. Энцыкл.; Рэдкал.: Б. І. Сачанка (гал. рэд.) і інш.; Маст. Э. Э. Жакевіч. — Мн.: БелЭн, 1994. — Т. 2: Беліцк — Гімн. — 537 с. — ISBN 5-85700-142-0 С. 357.
Вонкавыя спасылкі
рэдагаваць- Сканы газэты на Кніжнай паліцы
- «Воля народу» (1923) // Бібліятэка Акадэміі навук Летувы імя Ўрублеўскіх (па-летувіску: Lietuvos mokslų akademijos Vrublevskių biblioteka (LMAVB). Žygimantų g. 1, LT-01102 Vilnius)