БелХард

«БелХард Груп» (анг. BelHard) — беларускае прадпрыемства распрацоўкі апраграмаваньня, заснаванае ў 1994 годзе ў Менску.

«БелХард»
Тып	закрытае акцыянэрнае таварыства
Дэвіз	Мы працуем з кліентамі з усяго сьвету
Заснаваная	13 студзеня 1994 (30 гадоў таму)
Заснавальнікі	Ігар Мамоненка
Краіна	Беларусь
Разьмяшчэньне	Менск, завулак Ламаносава дом 5
Галіна	інфармацыйныя тэхналёгіі
Прадукцыя	праграмнае забесьпячэньне
Лік супрацоўнікаў	1100 (2015)
Даччыныя кампаніі	«ЭкспэртЦэнтар», газэта «Кампутарныя весьці»
www.belhard.com

Прадукты

• «Аіпсін» — праграма для наркакантролю
• «КрыптаКор» (анг. CryptoCore) — праграма шыфравальнай абароны
• «Маша» — праграма кіраваньня дашкольнай установай
• «СіМона» — праграма нагляду за справаводзтвам
• «Экспэрт» — база зьвестак аб праве Беларусі
• «3D FashionDesign» (бел. 3-вымерны дызайн крою) — праграма мадэляваньня адзеньня

Мінуўшчына

У студзені 1994 г. інжынэр-дасьледнік Беларускага дзяржаўнага тэхналягічнага ўнівэрсытэту Ігар Мамоненка і Андрэй Грыгарцэвіч заснавалі прадпрыемства «БелХард» для збыту кампутараў амэрыканскай кампаніі Hewlett-Packard (Пала-Альта, акруга Санта-Клара(en), штат Каліфорнія). У лістападзе 1995 году прадпрыемства стала дыстрыб’ютарам з уласнай сеткай збыту. У 1996 годзе «БелХард» стаў прадстаўніком у Беларусі амэрыканскага вытворцы праграмаў праектаваньня(en) і абсталяваньня для лёгкай прамысловасьці «Гэрбэр Тэхналёгія»(en) (Толанд(en), шт. Канэктыкут). Пасьля пачаў прадстаўляць у краіне ізраільскага вытворцу тэлефонных станцыяў(en) «Тадыран Тэлекам»(en). Адначасна адчыняюцца майстэрня рамонту кампутараў, газэта «Кампутарныя весьці» і радыёстанцыя. Даччыны «ЭкспэртЦэнтар» пачынае падаваць паслугі доступу да лічбавай базы прававых зьвестак.

У 1998 годзе «БелХард» атрымаў першы замежны заказ на распрацоўку праграмнага забесьпячэньня. У 2002 годзе адчыніў школу праграмаваньня. У 2003 годзе пачаў падаваць паслугі вэб-дызайну. У 2005 годзе пачалася распрацоўка апраграмаваньня пад мабільныя апэрацыйныя сыстэмы. У 2006 годзе «БелХард» адчыніў часопіс «Мой Інтэрнэт». У 2007 годзе ўступіў у Беларускі парк высокіх тэхналёгіяў і асвоіў паслугі сыстэмнай інтэграцыі(en). У 2008 годзе ўпершыню распрацаваў сеціўныя банкаўскія сыстэмы з выкарыстаньнем лічбавага подпісу. У 2009 годзе «БелХард» стварыў праграму шыфраваньня і адчыніў уласную працоўню. У 2014 годзе на прадпрыемстве распрацавалі праграму для наркакантролю «Аіпсін».

Вонкавыя спасылкі

• Даведнік для наркакантролю «Аіпсін» (рас.)
• Кампутарныя весьці (рас.)
• Краіна інфармацыйных тэхналёгіяў: Вучэльня (рас.)
• Праграма кіраваньня дашкольнай установай «Маша» (рас.)
• Прававы даведнік «Экспэрт» (рас.)