Бабруйскі мастацкі музэй

Бабруйскі мастацкі музэй імя Георгія Паплаўскага
	Бабруйскі мастацкі музэй імя Георгія Паплаўскага
Філія	Міністэрства культуры Рэспублікі Беларусь
Месцазнаходжаньне	Бабруйск, Беларусь
Адрас	вул. М. Горкага, 28
Велічыня калекцыі	682 (2014)
Створаны	8 ліпеня 2009 г.
Дырэктар	Сьвятлана Прывалава
	artbobruisk.museum.by/be

Бабруйскі мастацкі музэй імя Георгія Паплаўскага — музэй выяўленчага мастацтва ў Бабруйску (Беларусь).

Мінуўшчына

Музэй заснаваны 8 ліпеня 2009 году на базе «Выставачнай залі Бабруйску», якая вядзе сваю гісторыю з 1976 году, калі яе арганізаваў старшыня Бабруйскай мескай арганізацыі Саюзу мастакоў БССР Сямён Абрамаў, які з 1976 па 1989 год быў ейным дырэктарам. Памяшканьне выставачнай залі было самым буйным у Беларусі пасьля менскага Палацу мастацтва.

30 ліпеня 2012 году адбылося ўрачыстае адкрыцьцё музэю для наведвальнікаў пасьля рэканструкцыі памяшканьня^[1]. Музэю было прысвоена імя знакамітага земляка, Народнага мастака Беларусі Георгія Паплаўскага.

Сёньня музэй мае 2 памяшканьні ў Бабруйску: мастацкую галерэю па вул. М. Горкага, 28 і выставачную залю па вул. Сацыялістычнай, 100.

Місія музэю — захаваньне для будучага пакаленьня твораў прафэсійных мастакоў, чыё жыцьцё і творчасьць былі зьвязаны з Бабруйскім краем.

Мастацкі фонд музэю пачаў фармавацца з 2004 году. Асноўнай экспазыцыяй на сёньняшні дзень зьяўляецца экспазыцыя твораў бабруйскіх мастакоў з 1960-х гадоў па 2016. Паводле стану на 1 студзеня 2016 колькасьць адзінак захоўваньня асноўнага фонду — 803^[2]. Найбольш адметныя калекцыі: сучасная мастацкая кераміка, графіка Георгія Паплаўскага, Людвіга Асецкага, Юрыя Нікіфарава, творы Валерыя Назарава (мастака-пастаноўшчыка кінафільму «Анастасія Слуцкая»), расейскага жывапісца Мікалая Давыдава, беларускіх жывапісцаў Паўла Масьленікава, Эдуарда Белагурава, Леаніда Марчанкі, Максіма Калтыгіна, Уладзімера Рубцова, Уладзімера Дамарада й іншых.

Сярод маладых мастакоў, творы якіх папоўнілі экспазыцыю музэю — Жанна Будэйка, Натальля Марчанка, Уладзімер Канцадайлаў, Алег Захарэвіч, Ірына Кустава, Марына Арасланава.

Дэкаратыўна-прыкладное мастацтва ў экспазыцыі музэю прадстаўлена габэленам, батыкам і пано з скуры.

Музэй зьяўляецца арт-пляцоўкай да штогадовых міжнародных пленэраў па кераміцы ў Бабруйску «Арт-Жыжаль», якімі з 2003 году творча кіруе мастак-кераміст Валеры Калтыгін, старшыня Бабруйскай гарадзкой арганізацыі Беларускага саюзу мастакоў.

У 2006 годзе жыхар Бабруйска Віталь Сакалоў перадаў у дар гораду калекцыю ўзораў мінэралаў і горных парод, якая зьяўляецца другой паводле велічыні ў Беларусі пасьля той, што сабраная ў Музэі землязнаўства геаграфічнага факультэту Беларускага дзяржаўнага ўнівэрсытэту. Экспанаты калекцыі папоўнілі дапаможны фонд музэю на 988 прадметаў. Значная іх частка прадстаўлена ў пастаяннай экспазыцыі «Жывапіс зямлі», якая адкрылася ў музэі ў чэрвені 2014 году^[3].

Крыніцы

^ museum.by Бабруйскі мастацкі музей
^ Государственное учреждение культуры «Бобруйский художественный музей» (рас.). Магілёўскі абласны выканаўчы камітэт. Праверана 23 кастрычніка 2018 г.
^ Город художников, «столица керамики» и коллекция камней. Репортаж из Бобруйского художественного музея

Вонкавыя спасылкі

Рэпартаж з Бабруйскага мастацкага музэю (рас.) // TUT.BY

[1] museum.by Бабруйскі мастацкі музей

[2] Государственное учреждение культуры «Бобруйский художественный музей» (рас.). Магілёўскі абласны выканаўчы камітэт. Праверана 23 кастрычніка 2018 г.

[3] Город художников, «столица керамики» и коллекция камней. Репортаж из Бобруйского художественного музея

[1]

[2]

[3]