Telegraf.by

Telegraf.by
	Telegraf.by
Тып	інтэрнэт-партал
Даступныя мовы	ангельская, беларуская, расейская
Уладальнік	ПІУП "Агенцтва Тэлеграф"
Аўтар	ПІУП "Агенцтва Тэлеграф"
Пачатак працы	11 жніўня 2005 (19 гадоў таму)
Камэрцыйны?	Так
Рэгістрацыя	неабавязковая
Рэйтынг Alexa	599
	www.telegraf.by

Telegraf.by — беларускі незалежны грамадзка-палітычны навінавы сайт на ангельскай, беларускай і расейскай мовах. Адзін з найбольш цытуемых беларускіх рэсурсаў за мяжой^[1]. Заснаваны 11 жніўня 2005.

Гісторыя

У 2005 сайт другім у Беларусі надаў паслугі бясплатнае электроннае пошты (дамэны @telegraf.by, @me.by і @biz.by) і першым стварыў яе цалкам беларускамоўны інтэрфэйс.^[2] Перакладам яго на беларускую мову займаліся спэцыялісты Таварыства беларускай мовы імя Францішка Скарыны^[3].

У 2005—2010 на сайце разьмяшчаўся Блог Аляксандра Брэчака.

У жніўні 2007 Telegraf.by першым у Беларусі перавёў сваю пошту на сэрвэр амэрыканскае кампаніі Google.^[4]

1 сакавіка 2010 Telegraf.by запусьціў беларускамоўную вэрсію, 9 сакавіка — ангельскамоўную.

20 кастрычніка 2021 году Міністэрства інфармацыі Рэспублікі Беларусь заблякавала сайт у краіне.

24 траўня 2022 году сайт быў заблякаваны Раскамнаглядам у Расейскай Фэдэрацыі^[5].

Тэматыка

Сайт прысьвечаны, перш за ўсё, беларускім навінам, але пры гэтым асьвячае сусьветныя падзеі і падзеі краінаў блізкага замежжа. Асноўнымі часткамі партала зьяўляюцца: Аўто, Беларусь, Бізнэс, Жыцьцё, Здароўе, ІТ, Крымінал, Меркаваньні, Расея, Рэлігія, Спорт, Сьвет, Украіна(недаступная спасылка), Фота, Шоў-бізнэс.

Выказваньні аб Тэлеграфе

	Мне падабаецца Тэлеграф, я шчыра скажу. Лічу, што рэсурс разьвіваецца, гэта добра. У яго вялікая будучыня. Вельмі важна, што зьявілася англамоўная старонка, таму што, акрамя інфармаваньня беларусаў, грамадзян Беларусі, вялікае значэньне мае інфармаваньне замежнікаў пра тое, што адбываецца ў Беларусі. Добра, што такі рэсурс існуе. Жадаю яму пасьпяховага разьвіцьця і выхаду на першыя ролі.
—Алесь Міхалевіч, экс-кандыдат у прэзыдэнты Беларусі, лідар Саюзу «За Мадэрнізацыю»

	Я вітаю ўсе незалежныя друкаваныя і інтэрнэт-рэсурсы. І, безумоўна, чым больш іх будзе, тым лепей. Я дзякую вам, за тое, што вы існуяце, за тое, што спрабуеце несьці альтэрнатыўную інфармацыю. Гэта вельмі важна. Я таксама вас заклікаю даваць прыклад прафэсійнай журналістыкі, таму што, скажу шчыра, журналістаў прафэсійных у Беларусі адзінкі. Нават сярод незалежных выданьняў, таму што часта мы бачым БТ (Беларускае тэлебачаньне - Тэлеграф), толькі наадварот. Тыя ж самыя мэтады, знаходзяцца тыя ж самыя, у горшым сэнсе гэтага слова, прапагандысцкія брутальныя інфармацыйныя нагоды. Я хачу, каб журналістыка ў нас была іншая, каб быў нейкі журналісцкі кодэкс, які б выконваўся, каб падача інфармацыі была аб'ектыўнай і прафэсійнай. Канечне, кожны чалавек суб'ектыўны. Прынамсі, я лічу, што чалавека трэба паважаць. Можна быць апанэнтам, можна бачыць колькі зла зрабіў чалавек, але Эвангельле нас заклікае паважаць сваіх ворагаў. Часта вельмі журналісты пераходзяць межы і перастаюць таксама ў сваіх выказваньнях быць прафэсіяналамі, перастаюць паважаць людзей. І адпаведна пачынаюць жыць у тым духу. Журналіст – гэта вельмі адказная прафэсія. Я жадаю вашаму рэсурсу, каб ён менавіта такім і быў. А мы будзем яго падтрымліваць, як прыйдзем да ўлады.
—Віталь Рымашэўскі, экс-кандыдат у прэзыдэнты Беларусі, сустаршыня партыі «Беларуская хрысьціянская дэмакратыя»

	Я за тое, каб колькасьць такіх рэсурсаў на Беларусі павялічвалася. Я ведаю, што такое ўваходзіць на ўжо падзелены рынак, але гэта проста неабходна. Калі нехта стала працуе на рынку, там, па-першае, зьмяншаецца канкурэнцыя, і людзі пачынаюць менш круціцца. Па-другое, усе абрастаюць нейкімі сувязямі, сымпатыямі, антыпатыямі, і гэта скажае інфармацыйную карціну. Таму я вельмі ўдзячны вам за тыя намаганьні, якія вы прыкладаеце, каб быць на рынку інфармацыі і каб пашыраць сваю прысутнасьць там. Я шчыра жадаю вам посьпехаў, каб вашая агенцыя была вядучай у нашай краіне.
—Мікола Статкевіч, экс-кандыдат у прэзыдэнты Беларусі, старшыня партыі "Беларуская сацыял-дэмакратычная партыя (Народная Грамада)"