Da!Бл…

«Da!Бл…» — беларускі рок-гурт.

Da!Бл…
Краіна	Беларусь
Месца ўтварэньня	Кабыльнік
Мова	беларуская мова
Жанр	панк-рок і грандж

Гісторыя

Гурт быў арганізаваны ў вёсцы Кабыльнік Мядзельскага раёну, Менскай вобласьці, дзе існуе да гэтага часу, дзьвума сябрамі-аднакласьнікамі Віктарам Марозам і Віталем Ананько ў 2003 року. Доўгі час «каркас» гурта не зьмяняўся, пабывалі ў складзе «Da!Бл…» два бубначы, трэці грае да цяперашняй пары, таксама як і два бас-гітарысты (трэці — Зьміцер).

У 2006 року гурт перажыў сапраўдны крызіс: пакінуў гурт Віталь Ананько, бас-гітарыст Іван Міцько, згубілі рэпетыцыйную кропку, сапсавалася большая частка апаратуры, ды яшчэ і бубнач Уладзімер Баркоўскі паехаў вучыцца.

Набываючы новую апартуру, шукаючы новае месца для рэпетыцый і новых удзельнікаў, Віктар Мароз запісаў першы «гаражны» альбом «Пачвара».

На пачатку 2007 рока альбом быў завершаны, знайшоўся бас-гітарыст, разам з рэпетыцыйнаю кропкаю. Усе лета 2007 рока гурт займаўся падрыхтоўкай канцэртнай праграмы, але з-за навучаньня бубнача, змог зайграць колькі канцэртаў толькі ў пачатку 2008 року.

У 2009 року на полацкім фэстывалі-конкурсе «Ноч Ваўкалака» гурт заваяваў адразу два прызы — прыз глядацкіх сымпатыяў і гран-пры: запіс на студыі «Осмас» у Менску 1-й песьні. Такім чынам была запісана першая студыйная песьня ў гісторыі «Da!Бл…» — «Мая дзяўчына — наркаман», якая стала «штуршком» для запісу паўнавартаснага студыйнага альбому.

Напрыканцы 2009 року песьня гурта «Параноя» выйшла на складанцы Прэм’ер Тузін 2009.

На працягу 2009—2011 рокаў на вілейскай студыі Аляксея Сяліцкага быў запісаны альбом Эпоха мод. Дзьве акустычныя кампазыцыі, якія ўвайшлі ў гэты альбом («Знак павуцін» і «Сьнег»), былі запісаны ў Маладэчне, пры падтрымцы Максіма Баслыка. 11 чэрвеня 2011 року альбом Эпоха мод інтэрнэт-рэлізам разам з жывой прэзентацыей у Вялейцы пабачыў сьвет.

Сьпявае гурт з самага пачатку толькі на беларускай мове, стыль і напрамак — сярэдняе паміж панкам і гранджам, з уплывам іншых музычных накірункаў.

Удзельнікі

• Віктар Мароз — сьпеў (2003—н. ч.)
• Віталь Ананько — гітара (2003—2006)
• Іван Міцько — бас-гітара (2003—2006)
• Уладзімер Баркоўскі — бубны (2003—2006)

Дыскаграфія

Студыйныя альбомы

• Пачвара (2006)
• Эпоха мод (2011)

Складанкі

• Прэм’ер Тузін 2009 (2009)

Узнагароды

• Прыз глядацкіх сымпатыяў на фэсьце «Ноч Ваўкалака» (2009, Полацак)
• Гран-пры на фэсьце «Ноч Ваўкалака» (2009, Полацак)

Вонкавыя спасылкі

• Восьмы «Жывы Тузін»: «Da!Бл…» ды група «Вэлясыпэдыстаў» (+відэа)