Энцыкляпэдыя жыцьця

«Энцыкляпэдыя жыцьця» (па-ангельску: The Encyclopedia of Life, EOL) — он-лайн-энцыкляпэдыя, якая будзе ўтрымоўваць інфармацыю аб усіх вядомых навуцы біялягічных відах і ствараная сумесна рознымі экспэртамі. Заяўляецца, што ў «Энцыкляпэдыі жыцьця» будуць асобныя артыкулы для кожнага вядомага віду (якіх налічаецца каля 2 млн), дзе будуць відэаматэрыялы, гук, выявы, графіка і тэкставыя зьвесткі.

Encyclopedia of Life Энцыкляпэдыя жыцьця
Тып	мэдыя-сховішча
Даступныя мовы	ангельская мова
Аўтар	Фундацыя Макартур, Фундацыя Слоўн
Пачатак працы	2008
Камэрцыйны?	не
Рэгістрацыя	апцыянальна
Рэйтынг Alexa	45 210
www.eol.org

У рамках праекту ў адзіную базу зьвестак спачатку будуць сабраныя зьвесткі аб жывёлах, расьлінах і грыбах. Затым у каталёг дададуць зьвесткі аб мікраарганізмах, а пазьней — і аб выкапнях біялягічных відах. Любы карыстальнік інтэрнэту, які наведае рэсурс, атрымае доступ да тэкстаў, фатаздымкаў, мапаў, аўдыёзапісаў, відэаролікаў і іншай мультымэдыйнай інфармацыі. Папаўняць каталёг плянуецца па меры ідэнтыфікацыі новых відаў. «Энцыкляпэдыя жыцьця» будзе заснаваная на wiki-тэхналёгіі, што дазволіць інтэрнэтчыкам са ўсяго сьвету рэдагаваць, перарабляць або ўносіць праўкі ў кожны артыкул.

Адной з прыярытэтных задач праекту зьяўляецца зрабіць рэсурс даступным усім людзям незалежна ад моўных і культурных адрозьненьняў, для чаго плянуецца пераклад энцыкляпэдыі на розныя мовы ў супрацоўніцтве з прыватнымі асобамі і арганізацыямі па ўсім сьвеце.

Праект разьлічаны на дзесяць гадоў і ацэньваецца ў 110,5 мільёну даляраў ЗША. Першыя гранты вылучылі дзьве амэрыканскія арганізацыі: 10 мільёнаў даляраў ЗША падала Фундацыя Макартур, а 2,5 мільёну даляраў ЗША выдала Фундацыя Альфрэда Слоўна.

Стварэньнем «Энцыкляпэдыі жыцьця» будзе займацца каманда адмыслоўцаў з 25—30 чалавек. Праектам кіруюць Філдаўскі музэй натуральнай гісторыі ў Чыкага, Гарвардзкі ўнівэрсытэт, Вудсхаўлская лябараторыя біялёгіі мора, Батанічны сад Місуры, Сьмітсанаўскі інстытут і Бібліятэка біялягічных відаў — група, у якую ўваходзяць Лёнданскі нацыянальны музэй натуральнай гісторыі, Нью-ёрскі батанічны сад і Каралеўскі батанічны сад у Кью. Кіраўнікі праекту спадзяюцца, што ў наступным здолеюць прыцягнуць для працы над энцыкляпэдыяй тысячы кваліфікаваных адмыслоўцаў.

27 лютага 2008 году энцыкляпэдыя прадставіла першыя 30 тыс. артыкулаў. З-за наплыву наведвальнікаў у першыя гадзіны працы сэрвэр EOL выйшаў з ладу, дапамога праекту аказалі праграмісты праекту «Вікіпэдыя».

Глядзіце таксама

• Віківіды

Вонкавыя спасылкі

• Encyclopedia of Life