Тральгэтан

	Тральгэтан
	швэдз. Trollhättan
Герб Тральгэтану
Дата заснаваньня:	1916
Краіна:	Швэцыя
Плошча:	23,78 км²
Насельніцтва (2015)
колькасьць:	48 573 чал.
шчыльнасьць:	2042,6 чал./км²
Часавы пас:	UTC+1
летні час:	UTC+2
Тэлефонны код:	0520
Паштовы індэкс:	461 00–461 98
Геаграфічныя каардынаты:	58°16′58″ пн. ш. 12°17′21″ у. д. / 58.28278° пн. ш. 12.28917° у. д.Каардынаты: 58°16′58″ пн. ш. 12°17′21″ у. д. / 58.28278° пн. ш. 12.28917° у. д.
	Тральгэтан на мапе Швэцыі Тральгэтан
	Галерэя здымкаў у Вікісховішчы
	www.trollhattan.se/

Тральгэ́тан (па-швэдзку: Trollhättan) — горад на захадзе Швэцыі, у ляндскапе Вэстэр’ётлянд, у лэне Вэстра Ёталянд, за 75 км на поўнач ад Гётэборгу. Цэнтар аднайменнай камуны. Невялічкая частка гораду (4 га) належыць да суседняй камуны Вэнэрсборг. Насельніцтва на 31 сьнежня 2015 году — 48 573 чалавекі.

Гісторыя

Першапачаткова назва Тральгэтан ужывалася толькі ў дачыненьні да вадаспаду на рацэ Ёта Эльв. У сярэднявеччы (прыкладна з пачатку XIV і да XVI стагодзьдзя) на высьпе Сьлётсэн на Ёта Эльве існавала фартэцыя, якая ў розных крыніцах завецца па-рознаму: Эдсборг, Экгольмскі замак, або Экэгольмскі замак^[1]. У 1413 у падаткавай кнізе Эрыка Памяранскага згадваецца Тральгэтанскі млын (па-швэдзку: Trollhetta qvarn). Тая частка Тральгэтану, дзе цяпер знаходзіцца цэнтар гораду, называлася Стра́нна (па-швэдзку: Stranna). У пачатку XVII стагодзьдзя пачалася праца па будаўніцтве шлюзаў, але беспасьпяхова. У 1718 швэдзкі вынаходнік Крыстафэр Польгэм аднавіў працу і ў 1753—1755 гг. польгэмаўскія шлюзы былі пабудаваныя. Але выявілася, што яны маюць тэхнічныя праблемы, таму іх ніколі не выкарыстоўвалі. З 1794 да 1800 адмірал Бальтзар фон Плятэн выправіў хібы, а з будаўніцтвам Ёта-каналу зьявілася неабходнасьць пабудаваць яшчэ адны шлюзы, шырэйшыя за плятэнаўскія. Гэта адбылося ў 1844 г., а ў 1916 іх усіх зьмянілі новыя, больш сучасныя шлюзы. У 1857 за Страннай замацавалася назва Тральгэтан, і горад становіцца важным прамысловым цэнтрам.

Эканоміка

У Тральгэтане знаходзіцца шэраг буйных прамысловых прадпрыемстваў: GKN Aerospace Sweden, Saab Automobile (аўтамабілебудаўніцтва), Saab (машынабудаўніцтва), NEVS і інш. Да 1979 г. фірма NOHAB займалася вытворчасьцю лякаматываў.

У 1996 кінакампанія Film i Väst пераносіць свой галоўны офіс у Тральгэтан, і горад становіцца найважнейшым цэнтрам вытворчасьці фільмаў у Швэцыі (цяпер гэта палова ўсіх паўнамэтражных фільмаў), за што й атрымаў мянушку Тралівуд (па аналёгіі з Галівудам).