Парсэк

Парсэ́к (скарочана пк) — распаўсюджаная ў астраноміі пазасыстэмная адзінка вымярэньня адлегласьці. Назва ўтвараецца ад паралякса кутняй сэкунды й пазначае адлегласьць да аб’екта, гадавая трыганамэтрычная паралякса якога роўная адной кутняй сэкундзе.

Паводле іншага эквівалентнага азначэньня, парсэк — гэтая такая адлегласьць, зь якое сярэдні радыюс зямной арбіты (роўны 1 а. а.), пэрпэндыкулярны прамяню зроку, бачны пад кутом 1″.

1 пк = ${\frac {360\cdot 60\cdot 60}{2\pi }}$ а. а. = 206 265 а. а. = 3,08568×10¹⁶ м = 30,8568 Пм (пэтамэтраў) = 3,2616 сьветлавых гадоў.

Выкарыстоўваюцца таксама кратныя адзінкі: кіляпарсэк (кпк), мэгапарсэк (Мпк) і гігапарсэк (Гпк).

Некаторыя адлегласьці ў парсэках

• 1 астранамічная адзінка складае 4,85×10⁻⁶ парсэк;
• Паводле стану на лістапад 2005 касьмічны апарат «Вояджэр-1» знаходзіўся на адлегласьці ад Сонца 0,00047 пк. (96,9 а. а.);
• Дыямэтар воблака Оорта каля 0,6 пк.;
• Адлегласьць ад Сонца да найбліжэйшай зоркі (Проксіма Цэнтаўра) складае прыкладна 1,3 парсэка;
• Адлегласьць да цэнтра нашай Галяктыкі — каля 8 кіляпарсэк, дыямэтар Галяктыкі прыблізна 30 кпк.;
• Адлегласьць да туманнасьці Андрамэды 0,77 мэгапарсэк;
• Самая блізкая буйная скупнасьць галяктык, скупнасьць Дзевы, знаходзіцца на адлегласьці 18 Мпк.;
• Да гарызонту назіранага Сусьвету — каля 4 Гпк.

Глядзіце таксама

• Сьветлавы год
• Астранамічная адзінка
• Кілямэтар