Музэй Станіслава Манюшкі (Сьмілавічы)

Музэ́й Станісла́ва Маню́шкі — біяграфічны музэй у Сьмілавічах (Беларусь). Адзіны музэй у сьвеце, прысьвечаны жыцьцю і творчасьці беларускага ды польскага кампазытара Станіслава Манюшкі.

Музэй Станіслава Манюшкі
Філія	Чэрвеньскага раённага краязнаўчага музэю
Месцазнаходжаньне	Сьмілавічы, Беларусь
Адрас	вул. Школьная, 11
Створаны	5 траўня 1969 г.
Дырэктар	Алена Забаронак
Геаграфічныя каардынаты	53°45′23.7″ пн. ш. 28°1′3.2″ у. д.
Музэй Станіслава Манюшкі на мапе Беларусі Музэй Станіслава Манюшкі

Мінуўшчына

У 1960-я рокі дырэктар васьмігадовай школы ў пасёлку Азёрным Васіль Несьцяровіч пачаў зьбіраць прадметы, зьвязаныя з жыцьцём кампазытара Станіслава Манюшкі, які нарадзіўся ў суседнім маёнтку. Музэйная экспазыцыя ў школе пачала дзейнічаць 5 траўня 1969 да 150-рочча з дня нараджэньня кампазытара. У верасьні 1969 музэй атрымаў званьне «народнага». Большасьць экспанатаў былі сабраныя ў 1980-я рокі, калі дапамагаць Васілю Несьцяровічу стала ягоная дачка Ірына Серада, якая з 1991 року стала дырэктаркай музэю. А Несьцяровіч за захаваньне памяці Станіслава Манюшкі атрымаў званьне Заслужанага работніка культуры Польшчы.

З 1991 року музэй быў філіяй Чэрвеньскага краязнаўчага музэю, з 1993 — Аб’яднаньня дзяржаўных літаратурных музэяў Беларусі, з 2001 — Дзяржаўнага музэю гісторыі тэатральнай і музычнай культуры.

У 2009 року пасьля закрыцьця Азёрнаўскага дзіцячага саду — базавай школы экспанаты перавезьлі ў Чэрвень. Адкрыцьцё новага будынку музэю, збудаванага ў Сьмілавічах, адбылося 2 траўня 2019 року.

Экспазыцыя

У 2008 року асноўны фонд Азёрнаўскага музэю налічваў больш за 500 адзінак захоўваньня. Агульная плошча 64 м², экспазыцыі — 60 м², меў 4 залі. «Музычная гасьцёўня» ў Сьмілавічах мае дзьве залі для экспазыцыі, дзе прадстаўленыя сямейныя партрэты, выданьні нотных твораў кампазытара, фатаздымкі опэрных пастановак, сцэнічныя строі.