Майкл Флэтлі
Майкл Ра́ян Флэ́тлі (па-ангельску: Michael Ryan Flatley; нарадзіўся 16 ліпеня 1958 году) — ірляндзка-амэрыканскі танцоўшчык, харэограф, актор, музыка. Вядомы сваімі танцавальнымі шоў «Riverdance», «Lord of the Dance», «Feet of Flames» і «Celtic Tiger».
Майкл Флэтлі | |
| Michael Flatley | |
 Майкл Флэтлі ў шоў «Feet of Flames» у Тайпэі (2009) | |
| Імя пры нараджэньні | Michael Ryan Flatley |
|---|---|
| Род дзейнасьці | танцоўшчык, актор |
| Дата нараджэньня | 16 ліпеня 1958 (65 гадоў) |
| Месца нараджэньня | Чыкага, Іліной |
| Месца вучобы | |
| Занятак | танцоўшчык, харэограф, актор |
| Жонка | Бэата Дзямба (1986—1997) Наем о’Браен (з 2006) |
| Дзеці | Майкл Ст. Джэймз Флэтлі |
| Узнагароды |  |
| Сайт | michaelflatley.com |
Жыцьцяпіс рэдагаваць
Майкл Флэтлі нарадзіўся ў ЗША ў ірляндзкай сям’і. Танчыць пачаў у 12-гадовым узросьце, а ў 1975 стаў першым неэўрапейскім удзельнікам, які перамог на чэмпіянаце сьвету па ірляндзкіх танцах. Танцам навучаўся ў Школе ірляндзкага танцу ў Чыкага, скончыў Вышэйшую школу брата Райса і адкрыў уласную танцавальную школу.
У траўні 1989 року Флэтлі ўсталяваў сусьветны рэкорд па хуткасьці выкананьня чачоткі — 28 удараў за сэкунду. У 1991 Нацыянальнае геаграфічнае таварыства ЗША назвала яго Жывым скарбам за дасканалае валоданьне традыцыйнай мастацкай формай, і на той час Майкл стаў наймаладзейшым чалавекам, што атрымаў гэтае званьне.
Да Эўрабачаньня-1994 Майкл Флэтлі і Джын Батлер падрыхтавалі 7-хвілінны нумар пад назваю «Riverdance», які быў паказаны ў паўзе між спаборніцтвамі. Іхняя прэзэнтацыя займела вялізны посьпех і ў выніку была распрацаваная ў паўнавартаснае шоў.
Пасьля першага прадстаўленьня новай праграмы Флэтлі спыніў працу над ёй з прычыны разыходжаньняў з прадусэрамі і зрэжысаваў, спрадусаваў і схарэаграфаваў новае шоў «Lord of the Dance», якое пераважна паказвалася не ў тэатрах, а на вялікіх сцэнах і стадыёнах.
У лютым 1998 року Майкл Флэтлі пабіў уласнае дасягненьне, зрабіўшы нагою 35 стукаў за сэкунду[1]. У 1999 і 2000 Флэтлі ізноў трапіў у кнігу рэкордаў Гінэса як найбольш аплочваны танцоўнік з заробкам $1 600 000 у тыдзень і як танцоўнік з найдаражэйшым страхавым коштам на ногі — $40 000 000[1][2].
У 2004 року Флэтлі атрымаў ганаровае доктарскае званьне Ўнівэрсытэцкага коледжу ў Дабліне, а таксама прэстыжны мэдаль вострава Эліса.
Найноўшае ягонае шоў ірляндзкіх танцаў, «Celtic Tiger», было прэзэнтаванае ў ліпені 2005.
У сакавіку 2006 року Майкл выдаў аўтабіяграфічную кнігу «Lord of the Dance: My Story». У сакавіку 2011 року на экраны кінатэатраў выйшаў фільм «Lord of the Dance 3D», пазьней выдадзены таксама на DVD і Blu-ray.
Сям’я рэдагаваць
У 1986 року Флэтлі ажаніўся з польскай грымэркай Бэатай Дзямбай; яны разьвяліся ў 1997.
14 кастрычніка 2006 року Майкл пабраўся другім шлюбам з Наем о’Браен, якая танчыла ў ягоных шоў[3]. 26 красавіка 2007 у іхняй сям’і нарадзіўся сын Майкл Ст. Джэймз.
Крыніцы рэдагаваць
- ^ а б Awards & Honors (анг.) MichaelFlatley.com. Майкл Флэтлі. Праверана 12 сакавіка 2013 г.
- ^ Awards & Honors (анг.) MichaelFlatley.com. Майкл Флэтлі. Праверана 12 сакавіка 2013 г.
- ^ Flatley dances up aisle (анг.) // Daily Mirror, 15-10-2006 г. Праверана 12 сакавіка 2013 г.
Вонкавыя спасылкі рэдагаваць
Майкл Флэтлі — сховішча мультымэдыйных матэрыялаў
- Афіцыйная бачына (анг.)
- Бачына «Riverdance» (анг.)
- Бачына «Lord of the Dance» (анг.)
- Падрабязныя зьвесткі пра Майкла Флэтлі й ягоныя шоў (анг.)
- Майкл Флэтлі (анг.) на сайце IMDb