Землеўпарадкаваньне Марсу (настольная гульня)

«Землеўпара́дкаваньне Ма́рса» (па-ангельску: Terraforming Mars) — гульня на дошцы для 1—5 гульцоў, распрацаваная Якабам Фруксэліюсам і выдадзеная ў 2016 року. У гэтай стратэгіі гульцы выконваюць ролю карпарацыяў, якія супрацоўнічаюць у засваеньні Марсу шляхам павышэньня тэмпэратуры плянэты, насычэньня атмасфэры тленам, напаўненьня паверхні вадой і стварэньня расьліннасьці і жывёльнага сьвету.

«Землеўпарадкаваньне Марсу»
Дата выпуску	2016
Краіна паходжаньня	Швэцыя
Распрацоўнік(і)	Якаб Фруксэліюс
Аздабляльнік(і)	Ісаак Фруксэліюс
Выдавец	FryxGames
Жанр(ы)	картавая гульня[d]
Колькасьць гульцоў	1—5
Дыяпазон узростаў	ад 12 гадоў
Працягласьць гульні	120 хвілінаў
Уплыў выпадковасьці	сярэдняя
Неабходныя ўменьні	стратэгія, тактыка, лёгіка
Сайт	fryxgames.se/prod… (анг.)
«Землеўпарадкаваньне Марсу» у Вікісховішчы

Гульнявы працэс

Гульцы ў ролі зямных карпарацыяў спаборнічаюць у справе землеўпарадкаваньня Марсу. Гульнявая дошка ўяўляе сабой мапу паверхні плянэты, на якой разьмешчаная 61 шасьцікутная плітка, кожная зь якіх адпавядае прыкладна 1% паверхні Марсу. Гэтыя пліткі прызначаныя для разьмяшчэньня акіянаў, расьліннасьці, местаў ды іншых аб’ектаў. Мэта гульні — дасягнуць трох прыдатных для засяленьня ўмоваў:

• падняць узровень атмасфэрнага тлену да 14%;
• падняць сярэднюю тэмпэратуру ад −30° да +8 °C;
• пакрыць 9% паверхні Марсу акіянам.

Гэтых мэтаў гульцы дабіваюцца, разыгрываючы карткі з разнастайнымі тэхналёгіямі альбо збудаваньнямі, прызначанымі для землеўтварэньня Марсу. Гульня дзеліцца на некалькі пакаленьняў, кожнае зь якіх адпавядае аднаму колу. Пакаленьне складаецца зь некалькіх фазаў:

• выцягваньне картак;
• выкананьне дзеяньняў:
  • выкарыстаньне картак;
  • задзейнічаньне эфэктаў ужо згуляных картак;
  • купляньне магчымасьцяў, прысутных на дошцы;
• зьбіраньне прыбытку і рэсурсаў.

Пасьля гэтага надыходзіць новае пакаленьне.

Адной з унікальных асаблівасьцей «Землеўпарадкаваньня Марсу» ёсьць сыстэма «рэйтынгу землеўпарадкаваньня» (РЗ). Выконваючы дзеяньне, што павялічвае адну з трох глябальных умоваў землеўпарадкаваньня, гулец падвышае і ўласны РЗ. Гэты рэйтынг ня толькі ўплывае на колькасьць здабытых гульцом пераможных пунктаў, але і падвышае ягоны прыбытак у канцы кожнага пакаленьня.

Калі дасягнутыя ўсе тры глябальныя парамэтры землеўпарадкаваньня, гульня працягваецца да апошняй фазы дадзенага пакаленьня. Пасьля гэтага адбываецца падлік рэйтынгаў землеўпарадкаваньня, пабудаваных гульцамі плітак местаў і расьліннасьці, асабістых дасягненьняў і згуляных картак. Перамагае гулец з найбольшай сумай паказьнікаў.

Пашырэньні

Выйшлі пяць дадаткаў да гульні:

• «Эляда і Элізіюм» (анг. Hellas and Elysium; 2017), які ўключае новую двухбаковую гульнявую дошку з двума новымі рэгіёнамі Марсу, кожны з уласным рэльефам і дасягненьнямі ў канцы гульні
• «Наступная — Вэнэра» (анг. Venus Next; 2017), які ўключае новую гульнявую дошку Вэнэры з новымі можнасьцямі землеўпарадкаваньня і новымі карткамі пра Вэнэру
• «Прадслоўе» (анг. Prelude; 2018) з новымі карткамі, якія гульцы атрымліваюць у пачатку гульні дзеля паскарэньня свайго разьвіцьця і марсаўпарадкаваньня
• «Калёніі» (анг. Colonies; 2018), які дадае тэрыторыі для калянізацыі і падарожжаў у Сонечнай сыстэме, прадастаўляючы альтэрнатыўныя спосабы здабываньня рэсурсаў без патрэбы разыгрываньня картак
• «Узрушэньне» (анг. Turmoil; 2019), які дадае марсіянскі ўрад з рознымі палітычнымі фракцыямі з уласнымі праграмамі, на якія гульць могуць уплываць, каб атрымліваць разнастайныя бонусы

Відэагульня

У 2018 року пабачыла сьвет кампутарная адаптацыя «Землеўпарадкаваньня Марсу» францускага выдаўца «Asmodee Digital».

Ацэнкі

Часопіс «Папулярная мэханіка» ўключыў «Землеўпарадкаваньне Марсу» ў 50 найлепшых гульняў году. Паводле стану на 4 лютага 2022 гульня займала 4-е агульнае месца ў сьпісе паводле вэрсіі BoardGameGeek.

Вонкавыя спасылкі

• Інфармацыя на BoardGameGeek  (анг.)