Жаночая зборная Тайлянду па валейболе
Жаночая зборная Тайлянду па валейболе — нацыянальная каманда, якая прадстаўляе Тайлянд на міжнародных валейбольных турнірах. Кіруецца Тайляндзкай валейбольнай асацыяцыяй.
| Жаночая зборная Тайлянду па валейболе | |||
 | |||
| Фэдэрацыя | Тайляндзкая валейбольная асацыяцыя | ||
|---|---|---|---|
| Канфэдэрацыя | Азіяцкая канфэдэрацыя валейболу | ||
| Рэйтынг МФВ | 13 | ||
| Колеры | чорны, баграны | ||
| Форма | |||
| |||
| Апошняе абнаўленьне | 30 жніўня 2024 году | ||
Гісторыя
рэдагавацьТайляндзкая валейбольная асацыяцыя была заснаваная ў 1959 годзе. У 1964 годзе яна далучылася да Міжнароднай фэдэрацыі валейболу. Упершыню жаночая зборная Тайлянду была сфармавана ў 1965 годзе да Гульняў паўвостраву Паўднёва-Ўсходняй Азіі, якія ладзіліся ў Малайзіі. На іх нацыянальная тайская каманда заняла першы радок. У наступным годзе валейбалісткі бралі ўдзел у Азіяцкіх гульнях, як і праз чатыры гады. Цягам 16 гадоў на міжнароднай арэне зборная Тайлянду зьяўлялася толькі ў Гульнях краінаў Паўднёва-Ўсходняй Азіі, а таксама на хатніх Азіяцкіх гульнях 1978 году.
У 1998 годзе тайскія валейбалісткі ўпершыню пераадолелі адбор на чэмпіянат сьвету, але на першынстве выглядалі бледна, прайграўшы з сухім лікам усе тры свае паядынкі на турніры зборным Кітаю, Рэспублікі Карэі і Харватыі. З пачаткам XXI стагодзьдзя вынікі жаночай валейбольнай зборнай Тайлянду пачалі няўхільна паляпшацца, што было выклікана значна большай цікавасьцю да гэтага віду спорту ў краіне. На чэмпіянаце Азіі 2001 году, які ладзіўся ў Тайляндзе, тайскія спартоўкі ўпершыню сталі прызэркамі азіяцкіх валейбольных пяршынстваў, абгуляўшы ў матчы за бронзавыя мэдалі зборную Японіі зь лікам 3:2. На чэмпіянце Азіі 2007 году зборная паўтарыла бронзавы посьпех. А чарговае азіяцкае валейбольнае першынство ў 2009 годзе прынесла сэнсацыйны посьпех зборнай Тайлянду, якая па чарзе на стадыі плей-оф абгуляла з аднолькавым лікам 3:1 зборныя Казахстану, Японіі і Кітаю. Найлепшай гульчыхаў чэмпіянату была прызнаная тайская нападніца Онума Сітырак.
Праз год зборная Тайлянду ў трэці раз у сваёй гісторыі была сярод удзельніцаў чэмпіянату сьвету, дзе здабыла 4 перамогі ў 7 праведзеных матчах, але дзеля выхаду ў плэй-оф гэтага не хапіла. У 2012 годзе зборная здабыла Кубак Азіі, а праз год на чарговым чэмпіянаце Азіі зноў сьвяткавала перамогу. Сэзон 2023 году прынёс камандзе Тайлянду посьпех на трох з шасьці турніраў, у якіх яна брала ўдзел, у ліку якіх перамогі на Гульнях Паўднёва-Ўсходняй Азіі і чэмпіянаце Азіі. Таксама ў актыве тайскіх валейбалістак былі бронзавыя мэдалі Азіяцкіх гульняў.